ၼႂ်းႁူဝ်လိူၼ်ၵျူႊလၢႆႊၼႆႉၵူၺ်း ၾႆးမႆႈတီႈဝဵင်းၵျွၵ်ႉမႄး 2 တီႈ ထပ်းၵၼ် ဝႃႈၼႆ။
ဝၼ်းတီႈ 9/7/2019 ယၢမ်းၵၢင်ၶမ်ႈမွၵ်ႈ 9 မူင်း ၾႆးမႆႈႁူင်းၶၢႆၼဵင်ႈ တီႈပွၵ်ႉ 3 တီႈၼိုင်ႈ။ မိူဝ်ႈဝၼ်းတီႈ 8/7/2019 သမ်ႉ ၾႆးမႆႈ တီႈႁၢၼ်ႉၵႃႊရႃႊဢူဝ်ႊၶေႊ (KTV) တီႈၼိုင်ႈ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပူၼ်ႉ မႃး 2 ဝၼ်း မိူဝ်ႈဝၼ်းတီႈ 9 ၼၼ်ႉ ၾႆးမႆႈတီႈႁူင်းၶၢႆၼဵင်ႈၼၼ်ႉ ၸႂ်ႈၶႃႈဢေႃႈ။ ၵဵဝ်ႇၵပ်းလူၺ်ႈၾႆးမႆႈၼႆႉ ပဵၼ်ယွၼ်ႉသင်တႄႉတႄႉ ဢၼ်ဝႃႈၼၼ်ႉ ပႆႇလႆႈႁူႉတႅတ်ႈတေႃးလီ” ဝႃႈၼႆ။
ပိူင်ပဵၼ်ၾႆးမႆႈ တီႈႁူင်းၶၢႆၼဵင်ႈ တီႈပွၵ်ႉ 3 ၼၼ်ႉ လႆႈငိၼ်းဝႃႈတႄႉ သၢႆၾႆးၾႃႉပွင်ႇသေ သျွတ်ႉလႄႈ တႄႇလၢမ်းမႆႈတိူၵ်ႈ ၸေႈ၊ ထူင်ၼဵင်ႈ ဢၼ်မီးၼႂ်းႁိူၼ်းၸိူဝ်းၼၼ်ႉသေ တင်းမူတ်းၾႆးမႆႈၵႂႃႇ ထူင်ၼဵင်ႈဢမ်ႇယွမ်း 30 ထူင် ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈၸွႆးတြႃး ၸဝ်ႈၶွင်ႁူင်းၶၢႆၼဵင်ႈ ဝႆႉတီႈႁူင်းပလိၵ်ႈၸႄႈဝဵင်းၵျွၵ်ႉမႄး ယွၼ်ႉဝႆႉမဝ်မၢင်လွင်ႈၾႆး ဝႃႈၼႆ။
မိူဝ်ႈဝၼ်းတီႈ 8/7/2018 ယၢမ်းၵၢင်ၼႂ် 5 မူင်းၶိုင်ႈပၢႆၼၼ်ႉ ၾႆးမႆႈႁၢၼ်ႉၵႃႊရႃႊဢူဝ်ႊၶေႊ(KTV) တီႈၼိုင်ႈ ၼႂ်းၸႄႈဝဵင်း ၵျွၵ်ႉမႄးၼင်ႇၵဝ်ႇ။ ၵဵဝ်ႇလူၺ်ႈလွင်ႈၾႆးမႆႈၼႆႉ ယွၼ်ႉၸဝ်ႈၶွင်ႁၢၼ်ႉ 2 ၵေႃႉ ၽူႈၸၢႆးၼင်ႇၵၼ် ၽိတ်းမေႃးၵၼ်သေ ဢဝ် ၾႆးၽဝ်လႄႈမႆႈ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈပလိၵ်ႈၸႄႈဝဵင်းၵျွၵ်ႉမႄး လႆႈပိုတ်ႇလိူင်ႈၸွႆးတြႃးၸဝ်ႈၶွင်ႁၢၼ်ႉ ၵႃႊရႃႊဢူဝ်ႊၶေႊ ၼႆႉဝႆႉသေ ယၢမ်းလဵဝ်ၼႆႉ ၸဝ်ႈၶွင်ႁၢၼ်ႉၼႆႉ ပၢႆႈလွတ်ႈဝႆႉ ဝႃႈၼႆ။
