ၽူႈၸၢႆးၵေႃႉၼိုင်ႈ ဢႃယု မွၵ်ႈ 60 ပီ ၵူၼ်းဝၢၼ်ႈၼွင်ပႃယဵၼ်ႇ ၸႄႈဝဵင်းမိူင်းတူၼ် ၺႃးပၢတ်ႇၶေႃးၶႃႈတၢႆ ၽွင်းၵႂႃႇ ႁဵတ်းၵၢၼ် တီႈၼႂ်းသူၼ်။
ဝၼ်းတီႈ 9/7/2019 ယၢမ်းၵၢင်ၼႂ် မွၵ်ႈ 10 မူင်းၼၼ်ႉ ဢူးဢၢႆႈတူး ဢႃယု မွၵ်ႈ 60 ပီ ပဵၼ်ၵူၼ်းဝၢၼ်ႈၼွင်ပႃယဵၼ်ႇ ၸႄႈ ဝဵင်းမိူင်းတူၼ် ၺႃးပၢတ်ႇၶေႃးၶႃႈတၢႆ တီႈၼႂ်းသူၼ်မၼ်းၸၢႆး တီႈပွၵ်ႉၼွင်ပႃယဵၼ်ႇ ၽွင်းမၼ်းၵႂႃႇႁဵတ်းၵၢၼ်သူၼ်။ ပဵၼ်ၼမ်ႉမိုဝ်းၽႂ် ႁဵတ်းဢၼ်ဝႃႈၼၼ်ႉ ပလိၵ်ႈယင်းပႆႇႁူႉ တေႃႈလဵဝ် တိုၵ်ႉထဵတ်ႈထၢမ် ၼႃႇမူၺ်း ၵေႃႉပဵၼ်မေး ၽူႈတၢႆဝႆႉ ဝႃႈၼႆ။
ၵူၼ်းမိူင်းတူၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ လႆႈငိၼ်းဝႃႈတႄႉ ၵေႃႉပဵၼ်ၽူႈၸၢႆး ဢၼ်တၢႆၼၼ်ႉ တႄႉ ၺႃးပၢတ်ႇၶေႃး။ ႁူဝ်မီးတီႈၼိုင်ႈ၊ တူဝ်မီးတီႈၼိုင်ႈ။ ပဵၼ်တီႈၼႂ်းသူၼ်မၼ်းၸၢႆးၶိုၼ်းၵူၺ်း။ တီႈသူၼ်ၼၼ်ႉ ဢမ်ႇ ၵႆဝၢၼ်ႈ၊ ယူႇၼႂ်းဝၢၼ်ႈၼွင်ပႃယဵၼ်ၼၼ်ႉၵူၺ်းၼင်ႇၵဝ်ႇ။ ၵဵဝ်ႇၵပ်းလွင်ႈၵၢၼ်တၢႆၼႆႉ ပဵၼ်ယွၼ်ႉသင် ပဵၼ်ၽႂ်ႁဵတ်းဢၼ် ဝႃႈၼၼ်ႉ ဢမ်ႇလႆႈႁူႉ။ ငိၼ်းၶဝ်ဝႃႈတႄႉ တီႈႁိူၼ်းၼၼ်ႉ ၶဝ်ယူႇၸွမ်းၵၼ် 3 ၵေႃႉ။ ၽူႈၸၢႆး ထႅင်ႈၵေႃႉၼိုင်ႈ ဢၼ်ယူႇ ၸွမ်းၶဝ်ၼၼ်ႉ (ၸိုဝ်ႈၵျေုႇသူၺ်ႇပႃး) လႅပ်ႈတေလဵၼ်ႈၵဝ်းၵၼ်တင်းမေး ၵေႃႉဢၼ်တၢႆၼၼ်ႉႁိုဝ်ၵေႃႈဢမ်ႇႁူႉ။ ၵူၺ်းၵႃႈ ၽူႈၸၢႆးၵေႃႉၼၼ်ႉ ပၢႆႈလွတ်ႈဝႆႉ” ဝႃႈၼႆ။
ဢူးဢၢႆႈတူးၼႆႉ ပဵၼ်ၸၢဝ်းၶၢင်၊ ၺႃးပၢတ်ႇၶေႃးၶႃႈႁႅမ်တၢႆ မိူဝ်ႈဝၼ်းတီႈ 9 ၼႆႉၵူၺ်း ၼင်ႇၵဝ်ႇ၊ ယၢမ်းၵၢင်ၼႂ် ၶႃၽူဝ်မေး ၽိတ်းမေႃးၵၼ်သေ မၼ်းၸၢႆးဢွၵ်ႇၵႂႃႇႁဵတ်းၵၢၼ်တီႈၼႂ်းသူၼ်ပႅတ်ႈ ဝႃႈၼႆ။
“မိူင်းႁဝ်းၼႆႉ ဢမ်ႇႁူႉဝႃႈၽႂ်ပဵၼ်ၽႂ်ယဝ်ႉ ၵူၼ်းၵေႃႈၼမ် ယႃႈမဝ်းၵမ်ၵေႃႈလိူင်ႇ ဢွၼ်ႇၸၢႆးၼုမ်ႇ၊ ပေႃႈႁိူၼ်း ၼုမ်ႇ ၸိူဝ်း ၼႆႉတႄႉ ဢွၼ်ၵၼ်သူႇသမ်းၵိၼ်ယႃႈမဝ်းၵမ် ဢၵျၢင်ႉတၢင်းယၢမ်ႈလူႉၵၼ်ၵေႃႈၼမ်တႄႉၶႃႈ။ ၶႃႈထၢင်ႇတႄႉ ၵဵဝ်ႇၵပ်း လူၺ်ႈၵၢၼ်တၢႆၼႆႉ တေမီးၵူၼ်းယွင်ႇ ယႃႈမဝ်းၵမ်သေ ၶႃႈႁႅမ်တၢႆၶႃႈယူဝ်ႉ။ ထိုင်တီႈပေႃးလႆႈႁတ်း ပၢတ်ႇၶေႃး ၵၼ်တၢႆ ၸိူင်ႉၼႆ” ၵူၼ်းမိူင်းတူၼ်ၵေႃႉၼိုင်ႈတႄႉ လၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၵၢၼ်တၢႆ ဢူးဢၢႆႈတူးၼႆႉ တေႃႈလဵဝ် ယူႇတီႈပလိၵ်ႈၶဝ် လႆႈထဵတ်ႈထၢမ် ၵေႃႉပဵၼ်မေးမၼ်း ၼႃႇမူၺ်း တီႈ ႁူင်းပလိၵ်ႈမိူင်းတူၼ်သေ ပိုတ်ႇလိူင်ႈၸွႆးတြႃးဝႆႉ ၽူႈၸၢႆးၵေႃႉဢၼ်ပၢႆႈလွတ်ႈဝႆႉ ၸိုဝ်ႈႁွင်ႉ ၵျေႃႇသူၺ်ႇပႃးဝႆႉ ဝႃႈၼႆ။