ၸုမ်းတူဝ်တႅၼ်း ၶွမ်ႊပၼီႊႁပ်ႉမဝ်ၵေႃႇသၢင်ႈ ႁူမ်ႈၵၼ်တၢင်ႇယိုၼ်ႈလိၵ်ႈထိုင်ၽူႈၵွၼ်းၸႄႈတွၼ်ႈၵဵင်းမႆႇ ႁႂ်ႈၸွႆႈၵူတ်ႇထတ်းပၼ် လွင်ႈဢၼ်မီးၵူၼ်းဢၢင်ႈတူဝ်ပဵၼ်ၸဝ်ႈၼႃႈတီႈသေ ၵူတ်ႇထတ်းတီႉၺွပ်း ယွၼ်းငိုၼ်း ႁႅင်းၵၢၼ်ယၢၼ်မိူင်းႁၢဝ်ႈႁႅင်း။

ဝၼ်းတီႈ 08/07/2019 တူဝ်တႅၼ်းၶွမ်ႊပၼီႊ ႁပ်ႉမဝ်ၵေႃႇသၢင်ႈ ႁူမ်ႈၵၼ်ၵႂႃႇတၢင်ႇယိုၼ်ႈလိၵ်ႈတီႈ ၽူႈၵွၼ်းၸႄႈ  တွၼ်ႈ ၵဵင်းမႆႇလႄႈ ႁွင်ႈၵၢၼ်ၾၢႆႇၽဵင်ႇပဵင်းပဵၼ်ထမ်း ႁႂ်ႈၸွႆႈၵူတ်ႇထတ်းပၼ် လွင်ႈဢၼ်မီးၵူၼ်းဢၢင်ႈဝႃႈ ပဵၼ်ၸဝ်ႈၼႃႈတီႈသေ ၵူတ်ႇထတ်း မႂ်ငိုၼ်းႁႅင်းၵၢၼ်ႁၢဝ်ႈႁႅင်း။

ၸၢႆးဢၼုၽူင်ႊ ပုၼ်ႊၵလႃႊ တူဝ်တႅၼ်းၸဝ်ႈၶွင်ၶွမ်ႊပၼီႊႁပ်ႉမဝ်ၵေႃႇသၢင်ႈလၢတ်ႈဝႃႈ “ မီးၸုမ်းဢၢင်ႈဝႃႈ ပဵၼ်ၸဝ်ႈၼႃႈတီႈလူင်ပွင်ၸိုင်ႈၼႆသေ ၵႆႉၵႆႉၶဝ်ႈၵႂႃႇၵူတ်ႇထတ်း တီႈႁဵတ်းၵၢၼ်ႁႃတၢင်းၽိတ်းလၢႆၸိူဝ်ႉလၢႆပိူင်သေ တီႉၺွပ်းမႂ်ငိုၼ်း ။ႁႅင်း ၵၢၼ်ယိပ်းၶူဝ်းၶွင်သင်ၵေႃႈဢမ်ႇလႆႈ မိူၼ်ၼင်ႇ ၶွၼ်ႉၸွၵ်း၊သဵမ်၊ ၵိမ်းႁႆး၊ ၶူၼ်းပုၼ်ၸိူဝ်းၼႆႉ ။ မၼ်းတုမ်ႉတိူဝ်ႉၼႃႈၵၢၼ်တႃငၢၼ်းႁဝ်းၶႃႈတႄႉတႄႉဢေႃႈ ” ဝႃႈၼႆ။

ၸၢႆးသူႇၽၶျႆႊ ဢဵမ်ႊသုဝၼ်ႊ ၽူႈၵွၼ်းၸႄႈတွၼ်ႈၵဵင်းမႆႇ ႁပ်ႉဢဝ်ၽိုၼ်လိၵ်ႈသေတေႁႃလၢႆးတၢင်းၵႄႈလိတ်ႈၵႂႃႇ ၼႆယဝ်ႉ ။

သင်ဝႃႈပၼ်ႁႃဢၼ်ၵိူတ်ႇၶိုၼ်ႈပဵၼ်ယူႇယၢမ်းလဵဝ်ၼႆႉ ဢမ်ႇမီးလွင်ႈၵႄႈလိတ်ႈၼႂ်းတၢင်းတီႈလီၶိုၼ်ႈၼႆၸိုင် တေသိုပ်ႇတၢင်ႇယိုၼ်ႈယွၼ်းတၢင်းၸွႆႈထႅမ်ၵႂႃႇတီႈ ႁူင်းပလိၵ်ႈ ၽၢၵ်ႈ 5 ၊ ႁွင်ႈၵၢၼ်ၾၢႆႇႁႄႉၵင်ႈလႄႈ ၽဵဝ်ႈမူၺ်ႉလွင်ႈၵူၼ်းႁဵတ်း ၵၢၼ်လူင်ပွင်ၸိုင်ႈ ၵိၼ်ၸိၵ်း တွၵ်ႇၸွၵ်း ပိူဝ်ႈႁႂ်ႈၵူတ်ႇထတ်းလွင်ႈႁဵတ်းၵၢၼ် ၸဝ်ႈၼႃႈတီႈၽူႈမီးပုၼ်ႈၽွၼ်းလူင် ပွင်ၸိုင်ႈသိုပ်ႇၵႂႃႇ ဝႃႈၼႆ။