ၸုမ်းပွင်ၵၢၼ်ငဝ်ႈငုၼ်းလႄႈ ၽူႈတႅၼ်းသၽႃး ပႃႇတီႇႁူဝ်သိူဝ် လူင်းပိုၼ်ႉတီႈႁူပ်ႉထူပ်း ၵူၼ်းမိူင်း ဝဵင်းၵဵင်းတွင်း ၸိုင်ႈတႆး ပွတ်းၸၢၼ်း မီးၽူႈၶဝ်ႈႁူမ်ႈထွမ်ႇငိၼ်း 200 ပၢႆ။

ဝၼ်းတီႈ 9/7/2019 ယၢမ်းၵၢင်ဝၼ်း12:00 မူင်း ထိုင် 3:30 မူင်းဝၢႆးဝၼ်း ၵႅမ်ႁူဝ်ပဝ်ႈ 2 လုင်းၶမ်းပိူင်ႇၾႃႉလႄႈ ၽူႈၼမ်း ၼႂ်းၵူႈလွင်ႈလွင်ႈ ၸၢႆးလႃႉ ဢွၼ်ႁူဝ်ၸုမ်းၽူႈပွင်ၵၢၼ်ငဝ်ႈငုၼ်းလႄႈ ၽူႈတႅၼ်းသၽႃး ၸိူဝ်ႉၸၢတ်ႈ၊ ၵူၼ်းမိူင်းလႄႈ ၸႄႈမိူင်း ၸိူဝ်းၼႆႉ လူင်းႁူပ်ႉထူပ်း ပီႈၼွင်ႉၵူၼ်းမိူင်း တီႈဝတ်ႉၼမ်ႉပႃမုင်း ပွၵ်ႉ 2 ဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈ တွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

ၸၢႆးလႃႉ ၽူႈၼမ်းၼႂ်းၵူႈလွင်ႈလွင်ႈ မွၵ်ႇလၢတ်ႈၶေႃႈၵႂၢမ်းဝႃႈ “ လွင်ႈလႆႈမႃးႁူပ်ႉထူပ်းၵူၼ်းမိူင်းၵဵင်းတွင်းႁဝ်းၶႃႈ ပွၵ်ႈၼႆႉ မီးဝႆႉလွင်ႈတၢင်းသွင်လွင်ႈၶႃႈ။ လွင်ႈတီႈ 1 တႄႉ ဝၢႆးလင်လိူၵ်ႈတင်ႈ ပီ 2015 ယဝ်ႉ ယွၼ်ႉပိူဝ်ႈဝႃႈ ၵူၼ်းမိူင်းၵဵင်းတွင်း လိူၵ်ႈ တွတ်ႈပၼ်ႁႅင်း ၸုမ်းႁူဝ်သိူဝ်ႁဝ်းၶႃႈ ပေႉပၢင်လိူၵ်ႈတင်ႈမႃး။ ယွၼ်ႉၼၼ် ၶႂ်ႈမႃးႁူမ်ၸူမ်းၶွပ်ႈၸႂ်ထိုင် ပီႈၼွင်ႉ ၵဵင်း တွင်းႁဝ်းၶႃႈၵေႃႈ ပိူင်ၼိုင်ႈ။ လွင်ႈတီႈ 2 တႄႉ ၶႂ်ႈမႃးလဵပ်ႈႁဵၼ်းလွင်ႈယူပ်ႈယွမ်း ၶိုၼ်ႈယႂ်ႇႁုၼ်ႈမုၼ်း လႄႈ လွင်ႈလၵ်း ၼမ်းပေႃႇလသီႇ ၸုမ်းႁူဝ်သိူဝ် ဢၼ်လႆႈပၼ်ၵႂၢမ်းမၼ်ႈဝႆႉ တီႈပီႈၼွင်ႉၵူၼ်းမိူင်းတႆးႁဝ်း ၸိူဝ်းၼၼ်ႉသေ ၸင်ႇလူင်းမႃး ႁူပ်ႉထူပ်းပီႈၼွင်ႉႁဝ်း တႄႇဢဝ် လၢင်းၶိူဝ်း၊ မိူင်းပၼ်ႇ၊ မိူင်းၼၢႆး လႄႈ ၵဵင်းတွင်းၶႃႈ” ဝႃႈၼႆ။

ပၢင်ႁူပ်းထူပ်းၵူၼ်းမိူင်းၼႆႉ မီးၵူၼ်းမိူင်းၶဝ်ႈႁူမ်ႈထွမ်ႇငိၼ်း မွၵ်ႈ 200 ပၢႆ။ ၸုမ်းပွင်ၵၢၼ်ငဝ်ႈငုၼ်းပႃႇတီႇႁူဝ်သိူဝ် ဢၼ် လႆႈလူင်းႁူပ်ႉထူပ်းၵူၼ်းမိူင်း 6 ၵေႃႉ။ ၽူႈတႅၼ်းသၽႃး ၸိူဝ်ႉၸၢတ်ႈ၊ ၵူၼ်းမိူင်းလႄႈ ၸႄႈမိူင်း 9 ၵေႃႉ ႁူမ်ႈၵၼ် 15 ၵေႃႉ။

တီႈပၢင်ႁူပ်ႉထူပ်းၵူၼ်းမိူင်းၼၼ်ႉ ယူႇတီႈပႃႇတီႇႁူဝ်သိူဝ် လႆႈသပ်းလႅင်းၼႄ လွင်ႈမူႇပိူင်ပႃႇတီႇ၊ ၶၵ်ႉၵၢၼ်လွင်ႈငမ်း ယဵၼ် လႄႈ လွင်ႈၵူၼ်းမိူင်းဝႆႉၼမ်ႉၼၵ်း တွတ်ႈၶႅပ်းၵၢင်ၸႂ်ပၼ်။ ယဝ်ႉၵေႃႈ မီးလွင်ႈထၢမ်တွပ်ႇၵၼ်လႄႈ လွင်ႈပၼ်တၢင်းႁၼ် ထိုင်ၵၼ်ၵႂႃႇ ၸဵမ်ၸိူဝ်းၼႆႉ။

မိူဝ်ႈၼႆႉ ဝၼ်းတီႈ 10/7/2019 သမ်ႉ ယူႇတီႈပႃႇတီႇႁူဝ်သိူဝ် တေသိုပ်ႇႁူပ်ႉထူပ်းၵူၼ်းမိူင်းတၢင်းဝဵင်းၶူဝ်လမ်ထႅင်ႈ ဝႃႈၼႆ။

ၶၢဝ်းတၢင်းၽူႈပွင်ၵၢၼ်ငဝ်ႈငုၼ်း ပႃႇတီႇႁူဝ်သိူဝ် ပွၵ်ႈၼႆႉ တေႁူပ်ႉထူပ်းတင်းပီႈၼွင်ႉၵူၼ်းမိူင်း မိူင်းပၼ်ႇ၊ လၢင်းၶိူဝ်း၊ မွၵ်ႇမႆႇ ၊ မိူင်းၼၢႆး၊ ၵဵင်းတွင်း၊ ၼမ်ႉၸၢင်၊ ၶူဝ်လမ် – ၸၢႆးဝၼ်းလႅင်းၶမ်း လၢတ်ႈၼႄၼင်ႇၼႆ။