ၵူၼ်းႁၢႆႉ 2 ၵေႃႉ ပဵၼ်ၽူႈၸၢႆး ဢမ်ႇႁူႉၸၵ်းၸိုဝ်ႈ ၶဝ်ႈၸူၼ်ႁၢၼ်ႉၶၢႆၶမ်း “သျိၼ်ႊတႃႊ” တီႈတႃႈၶီႈလဵၵ်း။
ဝၼ်းတီႈ 8/7/2019 ယၢမ်းၵၢင်ၼႂ်မွၵ်ႈ 8 မူင်းၼၼ်ႉ ၽူႈၸၢႆး 2 ၵေႃႉ ဢမ်ႇႁူႉၸၵ်းၸိုဝ်ႈ ပႃးၵွင်ႈပွတ်းလဝ်းၼိုင်ႈသေ ၶဝ်ႈ ၸူၼ်ႁၢၼ်ႉၶၢႆၶမ်း သျိၼ်ႊတႃႊ တီႈပွၵ်ႉဝၢၼ်ႈၵွင်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႆႈၵႂႃႇသၢႆၶေႃးၶမ်း 2 သဵၼ်ႈ ဝႃႈၼႆ။
ဢူးၶျၢၼ်းမေႉၸေႃႇ ၽူႈၵွၼ်းပွၵ်ႉဝၢၼ်ႈၵွင်း ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၽူႈၸၢႆး 2 ၵေႃႉၼၼ်ႉ ၶီႇရူတ်ႉၶိူင်ႈမႃး။ ၶဝ်ပႃးၵွင်ႈပွတ်းမႃးၸွမ်းလဝ်းၼိုင်ႈ။ ၶဝ်ႈၵႂႃႇၸူၼ်ၼႂ်းႁၢၼ်ႉၼၼ်ႉသေ တၼ်းလႆႈသၢႆၶေႃးၶမ်းၵႂႃႇ 2 သဵၼ်ႈ ယဝ်ႉၵေႃႈ လႅၼ်ႈပၢႆႈလွတ်ႈၵႂႃႇ။ တေႃႈလဵဝ်ၼႆႉ ပႆႇတီႉလႆႈၵူၼ်းႁၢႆႉ 2 ၵေႃႉၼၼ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၸႄႈဝဵင်းတႃႈၶီႈလဵၵ်း တိုၵ်ႉၵူတ်ႇထတ်းသွၵ်ႈႁႃတူဝ်ၵူၼ်းႁၢႆႉ 2 ၵေႃႉၼၼ်ႉယူႇ ဝႃႈၼႆ။
လိူဝ်ၼၼ်ႉ ယူႇတီႈၸဝ်ႈၶွင်ႁၢၼ်ႉၶၢႆၶမ်း သျိၼ်ႊတႃႊၼၼ်ႉ လႆႈပိုတ်ႇလိူင်ႈၸႅင်ႈၵႂၢမ်းဝႆႉတီႈ ႁူင်းပလိၵ်ႈ ၸႄႈဝဵင်း တႃႈၶီႈ လဵၵ်းဝႆႉ ၵဵဝ်ႇလူၺ်ႈၵူၼ်းႁၢႆႉ 2 ၵေႃႉ ဢၼ်ၶဝ်ႈၸူၼ်ႁၢၼ်ႉၶၢႆၶမ်းၼၼ်ႉ ႁႂ်ႈတီႉၺွပ်းမႃး ပၼ်တူတ်ႈတၢမ်ႇ ၸွမ်းၼင်ႇပၵ်း ပိူင်ဝၢၼ်ႈမိူင်းမီး ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ပူၼ်ႉမႃးၼႂ်းလိူၼ်သွင်လိူၼ်ၼႆႉၵေႃႈ ႁၢၼ်ႉၶၢႆၶမ်း ၼၢင်းၼၢင်းဝုၼ်းၵႅဝ်ႈသွင်တီႈၺႃးၸူၼ် ၶဝ်ႈတင်းသွင်တီႈ။