ပၢင်ၵုမ်ၶိုၵ်ႉၶၵ်ႉ သၽႃးၸႄႈမိူင်းတႆး ၵမ်းပွၵ်ႈ 2 (1/2019) ၼႆႉ ယူႇတီႈၸွမ်ၸိုင်ႈမိူင်းႁူမ်ႈတုမ် သူင်ႇၽိုၼ်လိၵ်ႈၸူး ႁႂ်ႈ ၶႂၢၵ်ႈႁွင်ႈၵၢၼ်ၽွင်းလူင် ၾၢႆႇၵူတ်ႇထတ်းၵူၼ်းၶဝ်ႈမိူင်းလဝၵလႄႈ ငဝ်ႈတိုၼ်းႁႅင်းၵူၼ်းၼၼ်ႉ ယူႇတီႈသၽႃးၸႄႈမိူင်း တႆး ဢမ်ႇၽွမ်ႉ၊ ဢမ်ႇႁပ်ႉ ဝႃႈၼႆ။

ဝၼ်းတီႈ 8/7/2019 သၽႃးၸႄႈမိူင်းတႆး ၸတ်းႁဵတ်းပၢင်ၵုမ်ၶိုၵ်ႉၶၵ်ႉ တီႈလုမ်းသၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ယူႇတီႈၸွမ်ၸိုင်ႈ မိူင်းႁူမ်ႈတုမ် သူင်ႇၽိုၼ်လိၵ်ႈမႃး ႁႂ်ႈၶႂၢၵ်ႈထႅင်ႈႁွင်ႈၵၢၼ်ၽွင်းလူင် ၾၢႆႇၵူတ်ႇ ထတ်းၵူၼ်းၶဝ်ႈမိူင်းလႄႈ ငဝ်ႈတိုၼ်းႁႅင်းၵူၼ်းၼၼ်ႉ ယူႇတီႈၽူႈတႅၼ်းသၽႃးၸႄႈမိူင်းတႆး လႆႈဢဝ် တွတ်ႈၶႅပ်းၵၢင်ၸႂ် တေ တႅပ်းတတ်းၵႂႃႇ ဝႃႈၼႆ။

ၼႂ်းၼၼ်ႉ ၽူႈပၼ်ၶႅပ်းၵၢင်ၸႂ် ဢၼ်ၵမ်ႉထႅမ် 32 ၶႅပ်း၊ ၽူႈသၢၼ်ၶတ်း 87 ၶႅပ်း၊ ယူႇၵၢင် 1 ၶႅပ်းလႄႈ ဢမ်ႇပၼ်ၶႅပ်း ၵၢင်ၸႂ် 1 ၶႅပ်း။ ယွၼ်ႉၼၼ် သဵင်ၵၢင်ၸႂ် ဢၼ်သၢၼ်ၶတ်းၼၼ်ႉ ၼမ်လိူဝ်ၵႂႃႇ ဝႃႈၼႆ။

ၸၢႆးလူင်းသႅင် ႁူဝ်ပဝ်ႈသၽႃးၸႄႈမိူင်းတႆး ပိုၼ်ၽၢဝ်ႇဝႃႈ “ ၸုမ်းလူင်ပွင်ၸိုင်ႈမိူင်းတႆး ဢၼ်တေၶႂၢၵ်ႈထႅင်ႈႁွင်ႈၵၢၼ်ၾၢႆႇ ၵူတ်ႇထတ်းၵူတ်းၶဝ်ႈမိူင်း လဝၵလႄႈ ငဝ်ႈတိုၼ်းႁႅင်းၵူၼ်း ထႅင်ႈဢၼ်ၼိုင်ႈၼၼ်ႉ ယူႇတီႈၽူႈတႅၼ်းသၽႃးၸႄႈမိူင်း တႆး ဢမ်ႇလႆႈၸႂ်” ဝႃႈၼႆ။

ပၢင်ၵုမ်ၶိုၵ်ႉၶၵ်ႉ ပွၵ်ႈၵမ်း 2 (1/2019) ၼႂ်းဝၼ်းထူၼ်ႈၼိုင်ႈၼႆႉ ၽူႈတႅၼ်းသၽႃးတင်းမူတ်းၶဝ်ႈႁူမ်ႈပၢင်ၵုမ် 122 ၵေႃႉ။ ယွၼ်းၶႂၢင်ႉ 18 ၵေႃႉ။ ၽူႈတႅၼ်းသၽႃးမိူင်းတႆး တင်းမူတ်းမီး 140 ၵေႃႉ ဝႃႈၼႆ။

ၽိုၼ်လိၵ်ႈၸွမ်ၸိုင်ႈမိူင်းႁူမ်ႈတုမ် ႁႂ်ႈၶႂၢၵ်ႈထႅင်ႈႁွင်ႈၵၢၼ် ၾၢႆႇၵူတ်ႇထတ်းၵူၼ်းၶဝ်ႈမိူင်းလႄႈ ငဝ်ႈတိုၼ်းႁႅင်းၵူၼ်းၼၼ်ႉ လႆႈသူင်ႇၸူးၵူႈတိူင်းလႄႈ ၵူႈၸႄႈမိူင်း။ ၵူၺ်းၵႃႈ လုမ်းသၽႃးၸႄႈမိူင်းတႆးလႄႈ သၽႃးၸႄႈမိူင်းရၶႅင်ႇ ဢမ်ႇယွမ်းႁပ်ႉ ဢမ်ႇလႆႈၸႂ်ၵႂႃႇ ဝႃႈၼႆ။