သင်ၶၸဝ်ႈလႄႈ ၵူၼ်းမိူင်းတႆးတင်းမူတ်း 10 ပၢႆ လႆႈႁပ်ႉသူးၾၢႆႇပူၵ်းပွင်ၽႃသႃ သႃသၼႃလႄႈ တူင်ႇဝူင်းၵူၼ်းတီႈမိူင်းထႆး ။
ဝၼ်းတီႈ 07/07/2019 ၵေႃပွင်ၵၢၼ်ၵမ်ႉၸွႆႈၸိူဝ်ႉၸၢတ်ႈ ၊ ၽႃသႃ၊ သႃသၼႃ မိူင်းထႆး လႆႈၸတ်းႁဵတ်း ပၢင်မွပ်ႈသူးရၢင်းဝလ်း ပၼ်ၽူႈဢၼ်ပိုၼ်ႉပွႆႇပုၼ်ႈလီသုၼ်ႇတူဝ်သေ ႁဵတ်းသၢင်ႈပၼ်ၵူၼ်းတင်းၼမ် လူၺ်ႈတီႈဢမ်ႇ မုင်ႈမွင်းလွင်ႈတွပ်ႇတႅၼ်းသင်။ ပၢင်မွပ်ႈရၢင်းဝလ်း ၸတ်းႁဵတ်းတီႈ ၸႄႈတွၼ်ႈၼၶွၼ်းပထူမ် ၸိုင်ႈထႆး ။
ၼႂ်းၸၢဝ်းၶိူဝ်းတႆး ဢၼ်လႆႈႁပ်ႉသူးၼႆႉမီးမိူၼ်ၼင်ႇ ၸဝ်ႈသြႃႇပေႃႇၵျူဝ်ႇ၊ ၸဝ်ႈၶူးသုၶမ်း ၊ ၸဝ်ႈၶူးၺႃႇၼေႃး၊ ၸဝ်ႈသြႃႇ ဢိၼ်ႇတၵ ၊ ၸဝ်ႈၶူးDr.ၼုမ်ႇလႅင်း ၊ ၸၢႆးပၢၼ်းသႅင် ၸၢႆးသႅင်မိူင်း၊ ၸၢႆးမွင်ႇထုၼ်း၊ ၼၢင်းသႂ်သႂ်သႅၼ်၊ ၼၢင်းမျႃႉၸိင်ႇ ၸိူဝ်းၼႆႉ ။
ၸဝ်ႈၶူး Dr. ၼုမ်ႇလႅင်း လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ “ – လွင်ႈတၢင်းဢၼ်ႁဝ်းႁဵတ်းသၢင်ႈတွၼ်ႈတႃႇ ၵူၼ်းတင်းၼမ်ၵေႃႈလီ တွၼ်ႈတႃႇၸိူဝ်ႉၶိူဝ်းႁဝ်းၵေႃႈလီ ပေႃးႁဝ်းတဵမ်ဢူၵ်းတဵမ်ၸႂ်သေႁဵတ်း ဢမ်ႇမုင်ႈမွင်း လွင်ႈတွပ်ႇတႅၼ်းသင်ၼႆၸိုင် ယုမ်ႇယမ်ဝႃႈ ဝၼ်းၼိုင်ႈႁဝ်းတေႁွတ်ႈထိုင်လႆႈတီႈယိူင်းမၢႆယူႇ” ဝႃႈၼႆ။
ယူႇတီႈၵေႃပွင်ၵၢၼ်ၵမ်ႉၸွႆႈၸိူဝ်ႉၸၢတ်ႈ ၽႃသႃ သႃသၼႃ မိူင်းထႆးလႆႈမွပ်ႈပၼ်ၽူႈဢၼ်တူင်ႉၼိုင်ၼႂ်းတူင်ႇဝူင်းၵူၼ်း ၽႃသႃ ၊ သႃသၼႃ 300 ပၢႆ ဢၼ်လုၵ်ႉမႃးတီႈလၢႆလၢႆမိူင်း မိူၼ်ၼင်ႇ မိူင်းၶႄႇ၊ မိူင်းဢိၼ်ႊတီႊယိူဝ်ႊ ၊ မိူင်းထႆႊဝၼ်ႊ၊ မိူင်းႁူမ်ႈတုမ်မၢၼ်ႈ၊ မိူင်းထႆး ၸိူဝ်းၼႆႉ မွၵ်ႈ 7 မိူင်း သူးရၢင်းဝလ်းၼၼ်ႉပဵၼ်ၶႅပ်းၶူးတီႈမၢႆတွင်းလႄႈ သူး Caja Jakra Award ႁုၼ်ႇႁၢင်ႈၸၢင်ႉ ။