ပလိၵ်ႈတႃႈၶီႈလဵၵ်း ၵူတ်ႇထတ်းတီႉလႆႈယႃႈမဝ်းၵမ် ၼႂ်းၵႃးလမ်းၼိုင်ႈ တီႈပွၵ်ႉသၼ်သၢႆး (ၶ) ၸႄႈဝဵင်းတႃႈၶီႈလဵၵ်း ၸိုင်ႈ တႆးပွတ်းဢွၵ်ႇၶူင်း တင်းမူတ်း တေတူၵ်းမႅၼ်ႈၶၼ်ငိုၼ်းမွၵ်ႈ 800 သႅၼ်ပျႃး။
ဝၼ်းတီႈ 6/7/2019 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉ ပလိၵ်ႈၸႄႈဝဵင်းတႃႈၶီႈလဵၵ်း လႆႈၵူတ်ႇထတ်းၼႂ်းၵႃးလမ်းၼိုင်ႈ တီႈပွၵ်ႉသၼ်သၢႆး (ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ထူပ်းႁၼ် ယႃႈမႃႉ 80,000 မဵတ်ႉ တေတူၵ်းမႅၼ်ႈ ၶၼ်ငိုၼ်း မွၵ်ႈ 800 သႅၼ်ပျႃး။
ၵႅမ်ပလိၵ်ႈၸႄႈမိူင်းတႆး တီႈဝဵင်းၵဵင်းတုင် ၵေႃႉၼိုင်ႈ လၢတ်ႈဝႃႈ “ လႆႈထဵတ်ႈထၢမ် ၶႃ 2 ၵေႃႉၼၼ်ႉ ၶဝ်ဝႃႈ လႆႈၵႂႃႇႁပ်ႉ ဢဝ်မႃးတီႈ ၽူႈၸၢႆးၵေႃႉၼိုင်ႈ တီႈဝၢၼ်ႈၵႅဝ်ႈလူင်။ ယႃႈၸိူဝ်းၼႆႉ ၸိုၵ်းသေဢဝ်မႃး။ ၵဵဝ်ႇၵပ်းလွင်ႈၼႆႉ ပလိၵ်ႈ လႆႈ လူင်းၵူတ်ႇထတ်းႁိူၼ်းၽူႈၸၢႆး ၵေႃႉဢၼ်ပၼ်ယႃႈၶဝ်ၵူၺ်းၵႃႈ မၼ်းၸၢႆး ပၢႆႈလွတ်ႈဝႆႉ ဢမ်ႇၵုမ်းလႆႈတူဝ်မၼ်း။ သွၵ်ႈ တူၺ်းယႃႈမဝ်းၵမ်ၵေႃႈ ဢမ်ႇမီး” ဝႃႈၼႆ။
ယႃႈမဝ်းၵမ် ဢၼ်တီႉလႆႈသမ်ႉ ပဵၼ်ယႃႈမႃႉ တင်းမူတ်း 80,000 မဵတ်ႉ မႅၼ်ႈငိုၼ်း 800 သႅၼ်ပျႃးလႄႈ ၾူၼ်းၼိုင်ႈလုၵ်ႈ။ ၵူၼ်းႁေႃႈၵႃး ပဵၼ်ၼေႇသႃႇ ဢႃယု 40 ပီလႄႈ ၵူၼ်းမႃးၸွမ်းၼႂ်းၵႃးထႅင်ႈၵေႃႉၼိုင်ႈတႄႉ ၸၢႆးၵႅဝ်ႈ ဢႃယု 50 ပီ။ လိူဝ် ၼၼ်ႉ ၸၢႆးၶမ်းပၢင်ႇ ဢႃယု 39 ပီသမ်ႉ ပၢႆႈလွတ်ႈဝႆႉ ဝႃႈၼႆ။
တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈ လႆႈပိုတ်ႇလိူင်ႈၸွႆးတြႃးၶဝ်ဝႆႉ တင်း 3 ၵေႃႉ တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ဝႃႈၼႆ။
ၶေႃႈမုလ်း – The Voice