မုၵ်ႉၸုမ်းၼႃႈလိၼ်သိုၵ်းမၢႆ 1 ၸတ်းႁဵတ်းပွႆးၵူပ်ႉၵူႈပဵၼ်ႁိူၼ်း ပၼ်ၵေႃႉႁၢၼ်/ ၼၢင်းႁၢၼ် တႃႇႁူၵ်းၵူႈ ပဵၼ်ပွၵ်ႈၵမ်းႁႅၵ်ႈ။
မိူဝ်ႈၼႆႉ ဝၼ်းတီႈ 7/7/2019 ယၢမ်းၵၢင်ၼႂ် 9 မူင်း ထိုင် 12 မူင်းၵၢင်ဝၼ်း ယူႇတီႈၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၵႅမ်ၽူႈ ပွင်ၵၢၼ်သိုၵ်း (2) တပ်ႉသိုၵ်းၸိုင်ႈတႆး ၽူႈၵွၼ်းၼႃႈလိၼ်သိုၵ်းမၢႆ 1 တီႈလွႆၵေႃႇဝၼ်း ၸတ်းပွင်ပဵၼ်ပၢင်ၵူပ်ႉၵူႈပဵၼ်ႁိူၼ်း ပၼ်ၵေႃႉသိုၵ်းႁၢၼ်/ ၼၢင်းႁၢၼ် တီႈႁူင်းႁဵၼ်းၸိူတ်ႉၸၢတ်ႈမၢႆ 2 ၼႃႈလိၼ်သိုၵ်းမၢႆ 1 လွႆၵေႃႇဝၼ်း။
ၽူႈမီးပုၼ်ႈၽွၼ်း တီႈလွႆၵေႃႇဝၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းဢၼ်လႆႈၸတ်းႁဵတ်း ပွႆးၵူပ်ႉၵူႈ ပၢင်ၶႅၵ်ႇၼႆႉ ၼင်ႇႁိုဝ်ၵေႃႉသိုၵ်း/ ၵေႃႉႁၢၼ်လီ တႃႇၸိူဝ်ႉၸၢတ်ႈလႄႈသင်၊ ယဝ်ႉၵေႃႈ ႁႂ်ႈၶဝ်ပဵၼ်ပေႃႈလီ/ မႄႈလီသေ ဢမ်ႇၵႃး ႁႂ်ႈၸိူဝ်ႉၸၢတ်ႈၸိူဝ်ႉၶိူဝ်းႁဝ်းၵေႃႈတေလီ။ မႆႉဢမ်ႇပွမ်ႈၵေႃႈ ဢမ်ႇၸိူၼ်းၼႆလႄႈ ၵူၼ်းႁဝ်းၼႆႉ ပေႃးပႆႇတေႇ ၼႃႈ ႁိူၼ်း ပႆႇယဝ်ႉလႄႈ ဢၼ်ၶဝ်ၸဝ်ႈတႄႇၼႃႈႁိူၼ်းမႃးၼႆၵေႃႈ ၼင်ႇႁိုဝ် ပေႃးတေသိုပ်ႇၸိူဝ်ႉၸၢတ်ႈၸိူဝ်ႉၶိူဝ်းႁဝ်း ၵႂႃႇမိူဝ်းၼႃႈၼၼ်ႉ ၼင်ႇႁိုဝ်တေမီးမႃးလုၵ်ႈလၢင်းလီၼႆသေ ႁဝ်းၶႃႈယိူင်းဢၢၼ်း ၸိူဝ်းၼၼ်လႄႈ ၸင်ႇလႆႈၸတ်းႁဵတ်းပၼ်” ဝႃႈၼႆ။
သိုပ်ႇလၢတ်ႈဝႃႈ “ ထႅင်ႈလွင်ႈၼိုင်ႈၵေႃႈ ယွၼ်ႉပိူဝ်ႈဝႃႈ ၸၢႆးႁၢၼ် ၼၢင်းႁၢၼ် ၽူႈမီးၸၼ်ႉႁဝ်း ယွၼ်းဢၼုၺၢတ်ႈ တၢင်ႇ ယွၼ်းမႃး မိူဝ်ႈလဵဝ်ၵၼ်လႄႈ ၵူၼ်းလူင်ႁဝ်းၶႃႈၵေႃႈႁၼ်ထိုင်ဝႃႈ ၼႂ်းတပ်ႉသိုၵ်း ႁဝ်းဢမ်ႇယၢမ်ႈမီးသေပွၵ်ႈ လွင်ႈၼႆႉၼႆ သေ ယူႇတီႈမုၵ်ႉၸုမ်းႁဝ်း ၸင်ႇလႆႈၶပ်ႉၶိုင်ၸတ်းပၼ် ၽွမ်ႉၽွမ်ႉမိူဝ်ႈလဵဝ်ၵၼ်” ဝႃႈၼႆ။
ၵေႃႉသိုၵ်းႁၢၼ် ၵူပ်ႉၵူႈပဵၼ်ႁိူၼ်းသမ်ႉ ၶုၼ်သိုၵ်း ၸၢႆးပေႇတႃႉ(ၽူႈလႆႈႁပ်ႉသူး သုၸၼ်ႇတီႇ) လႄႈ ၼၢင်းသႅင်ၸိင်ႇ၊ ႁူဝ် ႁၢၼ် ၸၢႆးလူင်သႅင်လႄႈ ၼၢင်းၶမ်းၵျေႃႇ၊ ႁူဝ်ႁၢၼ် ၸၢႆးၼုမ်ႇသီလႄႈ ႁူဝ်ႁၢၼ်ယိင်း ယိင်းမူဝ်ၼုမ်ႇ၊ ႁူဝ်ႁၢၼ် ၸၢႆးမၢႆလႄႈ ၼၢင်းမူဝ်ၶမ်း၊ ႁူဝ်ႁၢၼ် ၸၢႆးၼုမ်ႇလႃႈ လႄႈ သိုၵ်းႁၢၼ်ယိင်း ၼၢင်းသႅင်ၽူးလႄႈ ႁူဝ်ႁၢၼ်ၸၢႆးယူင်း ၼၢင်းသေႃႈ ၸဵမ် ၸိူဝ်းၼႆႉ။
ပၢင်ၵူပ်ႉၵူႈပဵၼ်ႁိူၼ်းႁူၵ်းၵူႈၼႆႉ တေမီးၽူႈယႂ်ႇၵူၼ်းလူင် တီႈၸမ်ၵႆ ၼႂ်းတပ်ႉသိုၵ်း ၶဝ်ႈႁူမ်ႈပၼ်ႁႅင်း ပၼ်ပွၼ်းမတ်ႉ မိုဝ်းဢဝ်မင်ႇၵလႃႇ ၸဝ်ႈမၢဝ်ႇ/ ၸဝ်ႈသၢဝ် ယၢမ်းၵၢင်ၼႂ် 9 မူင်း။ လိူဝ်ၼၼ်ႉ ပေႃးထိုင်ယၢမ်း 12 မူင်းသမ်ႉ ႁပ်ႉတွၼ်ႈပီႈ ၼွင်ႉၶႅၵ်ႇလႄႈ လဵင်ႉလူတႃႇၶဝ်ႈၵႂႃႇ ဝႃႈၼႆ။
