ပလိၵ်ႈမၢၼ်ႈၶဝ်ႈၵူတ်ႇထတ်းတီႉလႆႈ ၵူၼ်းၸၢဝ်းထႆး လႄႈ ၶိူင်ႈၵွင်ႈၵၢင်ႇတင်းၼမ် တီႈဝၢၼ်ႈပႃႇလႅင် ၸႄႈဝဵင်းတႃႈၶီႈ လဵၵ်း။
ဝၼ်းတီႈ 2/7/2019 ယၢမ်းၵၢင်ၶမ်ႈ တပ်ႉသိုၵ်းမၢၼ်ႈလႄႈ ၸဝ်ႈၼႃႈတီႈပလိၵ်ႈ ႁူမ်ႈၵၼ် ၶဝ်ႈၵူတ်ႇထတ်းႁိူၼ်းလင်ၼိုင်ႈ တီႈဝၢၼ်ႈပႃႇလႅင် ဢိူင်ႇမိူင်းၽူင်း(ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တီႉလႆႈၸၢဝ်းထႆး 6 ၵေႃႉ ၸၢႆး 3 ၵေႃႉ၊ ယိင်း 3 ၵေႃႉ။ ၵူၼ်းမိူင်းႁူမ်ႈတုမ်ထႅင်ႈ 2 ၵေႃႉ ၸၢႆး 1 ၵေႃႉလႄႈ ယိင်း 1 ၵေႃႉ။ လိူဝ်ၼၼ်ႉ တီႉလႆႈပႃးထႅင်ႈ ၵွင်ႈၵၢင်ႇ 15 လဝ်းလႄႈ မၢၵ်ႇၵွင်ႈ 1,900 လုၵ်ႈပၢႆ ၸဵမ်ၸိူဝ်းၼႆႉ။
ဢူးလႃႉဢူး ပလိၵ်ႈၸႄႈဝဵင်းတႃႈၶီႈလဵၵ်း လၢတ်ႈတီႈသိုဝ်ႇဢေႊရႃႊဝႃႊတီႊဝႃႈ“ မိူဝ်ႈထဵတ်ႈထၢမ်ၶဝ်ၼၼ်ႉ ၶဝ်ဝႃႈ မႃး ႁဵတ်းၵၢၼ်မႆႉ တီႈၼႂ်းထိူၼ်ႇ။ ၵူၺ်းၵႃႈ မႆႉတႄႉဢမ်ႇတီႉလႆႈ။ ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈႁဝ်း တိုၵ်ႉလူင်းပိုၼ်ႉတီႈ ၸွမ်းၵူတ်ႇထတ်းယူႇ။ တေႃႈလဵဝ် တိုၵ်ႉႁၢင်ႈႁႅၼ်း ၸွႆးတြႃးၶဝ်ယူႇ” ဝႃႈၼႆ။
ၶိူင်ႈၵွင်ႈၵၢင်ႇ ဢၼ်ၸဝ်ႈၼႃႈတီႈပလိၵ်ႈတီႉလႆႈၼၼ်ႉ ၵွင်ႈပွတ်း မၢၵ်ႇႁူၵ်းလုၵ်ႈ သွင်လဝ်း၊ ၵွင်ႈ 9 MM သၢမ်လဝ်း၊ AK – 47 သၢမ်လဝ်း၊ M – 16 သွင်လဝ်း၊ ၵွင်ႈ 12 ဝူဝ်ႉ သၢမ်လဝ်းလႄႈ M – 22 ၼိုင်ႈလဝ်း။
လိူဝ်ၼၼ်ႉ တီႉလႆႈပႃးထႅင်ႈ မၢၵ်ႇၵွင်ႈ ၵူႈသႅၼ်းသႅၼ်း တႃႇ 1950 လုၵ်ႈ၊ မႅၵ်ႉၵွင်ႈ 21 ဢၼ်။ ယဝ်ႉၵေႃႈ ၵႃးသႅၼ်းဝီႊၵူဝ်ႊ 3 လမ်း လႄႈ ၵႃးမၢၵ်ႊဢႅၵ်ႉသ် (Mark – x) 1 လမ်း ဝႃႈၼႆ။
