ၸဝ်ႈႁႆႈၸဝ်ႈၼႃး တင်း ၵႅမ်တိူင်းသိုၵ်းလႃႈသဵဝ်ႈ ႁူပ်ႉဢုပ်ႇၵၼ် လွင်ႈတီႈလိၼ်သူၼ်ႁႆႈၼႃးထႅင်ႈ

ၵႅမ်ၽူႈၵွၼ်းတိူင်းသိုၵ်းယမၶလႃႈသဵဝ်ႈလၢတ်ႈဝႃႈ လွင်ႈဢၼ်တပ်ႉသိုၵ်းၸွႆးတြႃးဢဝ်လိူင်ႈၸဝ်ႈႁႆႈၸဝ်ႈၼႃး လွင်ႈတီႈ လိၼ်သူၼ်ႁႆႈၼႃး မီးဝႆႉ 3-4 လိူင်ႈၼၼ်ႉ တေယုၵ်ႉလိူၵ်ႈပူတ်းပွႆႇပၼ်လိူင်ႈလၢဝ်း ဝႃႈၼႆ။

ဝၼ်းတီႈ 28/6/2019 ယၢမ်းၵၢင်ၼႂ် 9:30 မူင်းထိုင် 1 မူင်းဝၢႆးဝၼ်းၼၼ်ႉ ၸဝ်ႈႁႆႈၸဝ်ႈၼႃး ဢဵၼ်ႁႅင်း မွၵ်ႈ 30 ၵေႃႉတင်း ၵႅမ်ၽူႈၵွၼ်းတိူင်းသိုၵ်းလႃႈသဵဝ်ႈ ႁူပ်ႉဢုပ်ႇၵၼ်တီႈဝတ်ႉဢွင်ႇသူႉပၢၼ်ႇ ဝၢၼ်ႈၶိူဝ်းၶမ်း ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဢုပ်ႇဢူဝ်းၵၼ် လွင်ႈတီႈလိၼ်သူၼ်ႁႆးၼႃး ၵူၼ်းမိူင်း ဢၼ်တပ်ႉသိုၵ်းယိုတ်းဢဝ်ဝႆႉၼၼ်ႉ တေႁဵတ်းၸိူင်ႉႁိုဝ် လူတ်းယွၼ်ႇပွႆႇပၼ်ၵူၼ်းမိူင်းၶိုၼ်း ၸဵမ်ၸိူဝ်းၼႆႉ။

ၸၢႆးႁၢၼ်ႇ ႁူဝ်ၼႃႈၸုမ်းၵူၼ်းၼုမ်ႇတႆး ပွတ်းႁွင်ႇ TYO လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈလႆႈဢုပ်ႇဢူဝ်းၵၼ် ၵႂႃႇၸိူင်ႉ ႁိုဝ်ၼႆ တၢင်းၾၢႆႇသိုၵ်းမၢၼ်ႈၶဝ်တႄႉ ၶဝ်ပၼ်ၵႂၢမ်းမၼ်ႈဝႆႉတႄႉၵေႃႈ လွင်ႈတႃႇတေႁဵတ်းၸွမ်းၵျွင်းမုၼ်ၸဝ်ႈ တီႈၶိူဝ်း ၶမ်းၼႆႉ တႃႇတီႈလိၼ် 2 ဢေႊၶိူဝ်ႊၼႆႉ ၶဝ်တေၸတ်းပၼ်။ ယဝ်ႉၵေႃႈ ဢၼ်ၶဝ်ၸွႆးတြႃးၸဝ်ႈႁႆႈၸဝ်ႈၼႃး 3-4 လိူင်ႈ ၼၼ်ႉ ၶဝ်တေပူတ်းပွႆႇပၼ်ပႅတ်ႈမူတ်းမူတ်း” ဝႃႈၼႆ။

သိုပ်ႇလၢတ်ႈဝႃႈ “ၼင်လိၼ်ၸိူဝ်းၼႆႉ ၶဝ်တေလူင်းပိုၼ်ႉတီႈသေ ႁွင်ႉၾၢႆႇတႅၵ်ႈၼႃႈလိၼ်ၶဝ် လူင်းတႅၵ်ႈသေ ပေႃးဝႃႈ တီႈဢၼ်ဢမ်ႇပႃးၼႂ်းၼင်လိၼ်တပ်ႉတြႃးဝၢင်ႇတႄႉတႄႉၵေႃႈ ၶဝ်တေၶိုၼ်း ၸုၼ်ႉပၼ်ၵူၼ်းမိူင်း၊ ပေႃးဝႃႈ ၶွင်ၵူၼ်းမိူင်း ဢၼ်ပႃးၵႂႃႇၼႂ်းၼင်လိၼ်တပ်ႉၼၼ်ႉတႄႉၵေႃႈ ပေႃးဝႃႈမီး (ပြေစာ) သၢၵ်ႈသေလၵ်းထၢၼ်ႇမၼ်းယူႇၸိူင် ၶဝ်တေႁႃ တႅၼ်းတီႈမၼ်းပၼ်။ လွင်ႈၼႆႉ သင်ဝႃႈ ၶဝ်ႁဵတ်းၸွမ်းၼင်ႇ ဢၼ်ၶဝ်ပၼ်ၵႂၢမ်းမၼ်ႈဝႆႉတႄႉယူႇၸိုင် ၸဝ်ႈႁႆႈၸဝ်ႈၼႃး ႁဝ်းၶႃႈၵေႃႈ တေလႆႈဝႃႈ ပဵၼ်ၶၢဝ်ႇလီတႄႉ” ဝႃႈၼႆ။

ၵဵဝ်ႇၵပ်းလွင်ႈဢၼ်တပ်ႉသိုၵ်းမၢၼ်ႈ ႁုပ်ႈယိုတ်းဢဝ်ဝႆႉတီႈလိၼ်ၵူၼ်းမိူင်း လႃႈသဵဝ်ႈၼၼ်ႉ ယူႇတီႈတၢင်းၾၢႆႇ သိုၵ်းမၢၼ်ႈတေႁွင်ႉၾၢႆႇတႅၵ်ႈၼႃႈလိၼ်ၶဝ်သေ လူင်းၵူတ်ႇထတ်းတႅၵ်ႈၼႃႈလိၼ်ၵႂႃႇ ၼႂ်းလိူၼ်ၵျူႊလၢႆႊၼႆႉ ဝႃႈၼႆ။

မိူဝ်ႈဝၼ်းတီႈ 25/6/2019 ယၢမ်းဝၢႆးဝၼ်း 1 မူင်းထိုင် 3 မူင်းၼၼ်ႉ ၸဝ်ႈႁႆႈၸဝ်ႈၼႃး ၶိူဝ်းၼိမ်း – ၶိူဝ်းၶမ်း၊ ၽူႈၵွၼ်းၸႄႈ ဝဵင်း၊ ၸႄႈတွၼ်ႈ၊ ၽူႈတႅၼ်း၊ ၵႅမ်ၽူႈၵွၼ်းတိူင်းသိုၵ်း လႃႈသဵဝ်ႈ ႁူပ်ႉဢုပ်ႇၵၼ်လွင်ႈတီႈလိၼ်သူၼ်ႁႆႈၼႃး တီႈလုမ်းၽူႈ ၵွၼ်းၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ လႆႈဢုပ်ႇဢူဝ်းငူပ်ႉငီႉၵၼ်သေ ၸဝ်ႈႁႆႈ/ ၼႃးၵူၼ်းမိူင်း တုၵ်းယွၼ်းႁႂ်ႈ ပၼ်ၶိုၼ်း တီႈလိၼ်ၵူၼ်းမိူင်း ဢၼ်တပ်ႉသိုၵ်းႁုပ်ႈယိုတ်းဝႆႉ ၸိူဝ်းၼၼ်ႉမႃးယဝ်ႉၵမ်းၼိုင်ႈ ဝႃႈၼႆ။

တီႈလိၼ်ၸိူဝ်းၼႆႉ ၺႃးတပ်ႉမၢႆ 242 ႁုပ်ႈယိုတ်းဢဝ်ႁဵတ်း ႁူင်းၵဵပ်းမၢၵ်ႇမိုဝ်ႉၸိုၼ်းယမ်း၊ တပ်ႉမၢႆ 7 ၾၢႆႇသၢႆလူမ်း၊ တပ်ႉ ၾၢႆႇတမ်းဝၢင်းတီႈလိၼ် ပၼ်မေးၵူၼ်းသိုၵ်း ၵူၼ်းသိုၵ်းၸိူဝ်းဢၼ်လႆႈလူႉၵႂႃႇၼႂ်းပၢင်တိုၵ်း။ တပ်ႉမၢႆ 8 ႁူင်းၽိုၵ်းသွၼ် ၸိူဝ်းၼႆႉ ႁုပ်ႈယိုတ်းဢဝ် ၸမ် 1000 ဢေႊၶိူဝ်ႊ။ တႄႇႁုပ်ႈယိုတ်းမႃး မိူဝ်ႈပီ 1992 တေႃႇထိုင်ဝၼ်းမိူဝ်ႈၼႆႉ ဝႃႈၼႆ။

ဝၢႆးသေၼႄၵၢင်ၸႂ် ပွၵ်ႈၵမ်းႁႅၵ်ႈ ၼႂ်းလိူၼ်ဢေႊပရိူဝ်ႊပူၼ်ႉမႃးၼၼ်ႉ ၸဝ်ႈႁႆႈၸဝ်ႈၼႃးၶိုၼ်းလႆႈလိၼ်သူၼ်ႁႆႈ ၼႃးၵမ်ႈ ၽွင်ႈ ပဵၼ်ပွတ်းပဵၼ်တွၼ်ႈယူႇ ဝႃႈၼႆ။