သင်ၶၸဝ်ႈ ၵူၼ်းမိူင်းလႄႈ RCSS ႁူမ်ႈၵၼ် ၽုၵ်ႇတူၼ်ႈမႆႉ တႃႇ 800 တူၼ်ႈ တီႈၵဵင်းတုင် ပဵၼ်ပွၵ်ႈၵမ်းႁႅၵ်ႈ ၼင်ႇႁိုဝ် ၾိင်ႈၾႃႉရႃႇသီႇဢုတု ပေႃးတေၵတ်းယဵၼ်လႄႈ ႁၢင်ႈလီၶဵဝ်ၸမ်ႉၼမ်ႉလိူင်ႇ ဝႃႈၼႆ။
ဝၼ်းတီႈ 03/07/2019 ယၢမ်းၵၢင်ၼႂ် သင်ၶၸဝ်ႈ၊ ၵူၼ်းမိူင်း၊ ၸုမ်းတူင်ႉၼိုင်တူင်ႇဝူင်းတႆး၊ ၸုမ်းပႃႇတီႇၵၢၼ်မိူင်းလႄႈ လုမ်းၵပ်းသၢၼ် RCSS တီႈၵဵင်းတုင် ႁူမ်ႈၵၼ်ၽုၵ်ႇတူၼ်ႈမႆႉ တီႈႁူင်းႁဵၼ်းပၵ ဝတ်ႉဝၢၼ်ႈငႅၼ်း ဢိူင်ႇၵၢတ်ႇတဝ်ႇ၊ ႁူင်း ႁဵၼ်းၸိူဝ်ႉၸၢတ်ႈတႆး တီႈထၢတ်ႈႁူဝ်သိူဝ် ဢိူင်ႇၵၢတ်ႇၽႃႉလႄႈ တီႈႁိမ်းဝၢၼ်ႈၵၢင် (ပႃႇၸႃႉပီႈၼွင်ႉတႆးၼိူဝ်) ဢိူင်ႇမိူင်း လၢပ်ႈ ၸဵမ်ၸိူဝ်းၼႆႉ။
ၸၢႆးသၢမ်တိပ်ႉသိူဝ် ၽူႈၸတ်းၵၢၼ် ႁူင်းႁဵၼ်းၸိူဝ်ႉၸၢတ်ႈတႆး တီႈထၢတ်ႈႁူဝ်သိူဝ်/ ၵႅမ်ႁူဝ်ပဝ်ႈပႃႇတီႇၵွင်ၸႆး လၢတ်ႈတီႈ ၽူႈတွႆႇႁွၵ်ႈဝႃႈ “ ယူႇတီႈလုမ်းၵပ်းသၢၼ် RCSS တီႈၵဵင်းတုင် ဢွၼ်ႁူဝ်သေ ၽုၵ်ႇတူၼ်ႈမႆႉ။ မီးပီႈၼွင်ႉၵူၼ်းမိူင်းၶဝ်ႈႁူမ်ႈ တင်းၼမ်။ လႆႈငိၼ်းဝႃႈတႄႉ ယူႇတီႈ တိူင်းသိုၵ်းသၢမ်ၸဵင်ႇ ဢမ်ႇပၼ်ၽုၵ်ႇႁႄႉႁၢမ်ႈၼႆဝႃႇ လွင်ႈၼႆႉတႄႉ ႁဝ်းဢမ်ႇလႆႈ ႁူႉလီ ႁဵတ်းသင်လႄႈ ႁႄႉႁၢမ်ႈ ဢၼ်ဝႃႈၼၼ်ႉ။ ၵူၺ်းၵႃႈ ၵၢၼ်ၽုၵ်ႇတူၼ်ႈမႆႉတႄႉ လႆႈၽုၵ်ႇယဝ်ႉၵႂႃႇ တင်း 3 ဢွင်ႈတီႈ ယဝ်ႉ” ဝႃႈၼႆ။
ၵဵဝ်ႇၵပ်းလွင်ႈတိူင်းသိုၵ်းသၢမ်ၸဵင်ႇ ၵဵင်းတုင် ႁႄႉႁၢမ်ႈ ဢမ်ႇပၼ်ၽုၵ်ႇတူၼ်ႈမႆႉၼၼ်ႉ ယွၼ်ႉသင်လႄႈ ဢမ်ႇပၼ်ၽုၵ်ႇ ၼႆၼၼ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇၵႂႃႇတီႈၸၢႆးၸူဝ်းမိူင်း ၽူႈၼင်ႈလုမ်းၵပ်းသၢၼ် RCSS တီႈလုမ်း ၵဵင်းတုင် လၢႆလၢႆၵမ်း ဢမ်ႇမီးၵၢၼ်ႁပ်ႉသၢႆ တွပ်ႇလၢတ်ႈသင်။
တီႈႁွင်ႈၵၢၼ်ပိုၼ်ၽၢဝ်ႇၶွင် RCSS ဝႅပ်ႊသၢႆႊ တႆးလွတ်ႈလႅဝ်း ဢွၵ်ႇဝႆႉတႄႉ မိူဝ်ႈဝၼ်းတီႈ 2/7/2019 ယၢမ်းဝၢႆးဝၼ်း 2 မူင်းၶိုင်ႈၼၼ်ႉ ၸွမ်ႁၢၼ်ၶိၼ်ႇလၢႆႇ ၽူႈၵွၼ်းတိူင်းသိုၵ်းသၢမ်ၸဵင်ႇ ႁွင်ႉၸၢႆးၸူဝ်းမိူင်း ၽူႈၸတ်းၵၢၼ် လုမ်းၵပ်းသၢၼ် လူင်ပွင်ၸိုင်ႈမၢၼ်ႈ RCSS ဢၼ်ပၵ်းလုမ်းဝႆႉတီႈၵဵင်းတုင်ၼၼ်ႉ ၵႂႃႇႁူပ်ႉတီႈတပ်ႉသေ လၢတ်ႈဝႃႈ ႁႂ်ႈတူၺ်းႁၼ်ထိုင် သရေႇၼႃႈတႃ ၾၢႆႇသိုၵ်းမၢၼ်ႈလႄႈ လွင်ႈတေၽုၵ်ႇတူၼ်ႈမႆႉၼၼ်ႉၵေႃႈ ဢမ်ႇပၼ်ၸတ်းႁဵတ်း လၢတ်ႈဝႃႈၼင်ႇၼႆ။
ၸၢႆးသၢမ်တိပ်ႉသိူဝ် လၢတ်ႈဝႃႈ “ မိူဝ်ႈလဵဝ်ၼႆႉ ဝၢၼ်ႈမိူင်းႁဝ်း မၼ်းမႆႈႁႅင်းၼႃႇယဝ်ႉ ဢၼ်တႅပ်းၵေႃႈ တႅပ်းၵႂႃႇၼမ် ၼႃႇယဝ်ႉ။ တႅပ်းယဝ်ႉသေ သမ်ႉဢမ်ႇၽုၵ်ႇပၼ်ၶိုၼ်းလူး။ မိူင်းတႆးႁဝ်းၼႆႉ မိူဝ်ႈဢွၼ်တၢင်းတႄႉ ၵတ်းယဵၼ်လီတႄႉ။ မိူဝ်ႈလဵဝ်ၼႆႉ မၼ်းမႆႈႁႅင်းၼႃႇ ယွၼ်ႉၼၼ်လႄႈ လူဝ်ႇလႆႈဢွၼ်ၵၼ်ၽုၵ်ႇပၼ်တူၼ်ႈမႆႉၼမ်ၼမ်ၶႃႈယဝ်ႉ” ဝႃႈၼႆ။
