ၾူၼ်တူၵ်းႁၢဝ်ႈႁႅင်းသေ ၼမ်ႉႁူၺ်ႈလႆၼွင်းထူမ်ႈ ၼိူဝ်သဵၼ်ႈတၢင်းလူင် မိူင်းႁူမ်ႈတုမ် (ပျီႇထွင်ႇၸူႉ) တၢင်းဝၢၼ်ႈမႄႈ ႁၢၼ်ႇ ၸႄႈဝဵင်း လႃႈသဵဝ်ႈ ႁၢဝ်ႈႁႅင်း။
ဝၼ်းတီႈ 1/7/2019 ယၢမ်းႁူဝ်ၶမ်ႈ မွၵ်ႈ 6 မူင်းပၢႆၼၼ်ႉ ၼမ်ႉလုပ်ႇထူမ်ႈ ၸွမ်းသဵၼ်ႈတၢင်းလူင် မိူင်း ႁူမ်ႈတုမ် လႃႈသဵဝ်ႈ – ဝဵင်းလိူဝ်ႇ တီႈႁိမ်းဝၢၼ်ႈမႄႈႁၢၼ်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ယွၼ်ႉၾူၼ်တူၵ်းႁၢဝ်ႈႁႅင်းလႄႈ ၼမ်ႉႁူၺ်ႈလႆ ထူမ်ႈ မၢင်တီႈလိုၵ်ႉထိုင်ဢႅင်ႈ/ ဢႅဝ် ၵေႃႈမီး ဝႃႈၼႆ။
ၸၢႆးႁၢၼ်ႇ ႁူဝ်ၼႃႈၸုမ်းၵူၼ်းၼုမ်ႇတႆး ပွတ်းႁွင်ႇ TYO လၢတ်ႈတီႈၽူႈတွႆႇႁွၵ်ႈဝႃႈ “ တီႈၼၼ်ႈၼၼ်ႉ မၼ်းပဵၼ်တီႈၼမ်ႉ လေႃႈလွႆမႃးၶႃႈဢေႃႈ၊ ၼမ်ႉလွႆလႆၼွင်းၼမ်ႉၸၢမ်လူၼ်ႉၾင်ႇသေၼွင်းထူမ်ႈၶႃႈဢေႃႈ။ တီႈၸွမ်းၸိူဝ်းမႄႈႁၢၼ်ႇၼၼ်ႉ မၼ်းတိုၼ်းပဵၼ်ၵူႈပီယဝ်ႉၶႃႈ။ ပေႃးဝႃႈ ၾူၼ်ၵိုင်ႉၵၢင်ႉတူၵ်းမွၵ်ႈ 3-4 ၸူဝ်ႈမူင်း ထပ်းၵၼ်ၼႆ ၼမ်ႉၼႆႉမၼ်းတိုၼ်းထူမ်ႈ ၵမ်းလဵဝ်ယဝ်ႉ” ဝႃႈၼႆ။
ဢၼ်ၼမ်ႉၼွင်း ၼမ်ႉထူမ်ႈၵူႈပီၼႆႉ ပဵၼ်ယွၼ်ႉပိူဝ်ႈဢမ်ႇမီးႁွင်ႈၼမ်ႉလႆလီ။ ၾၢႆႇလိူမ်ႈလႆႇဢမ်ႇလၢင်းပၼ်ႁွင်ႈဢၼ်မီး ဝႆႉၸိူဝ်းၼၼ်ႉ ဝႃႈၼႆ။
ၸၢႆးႁၢၼ်ႇ ႁူဝ်ၼႃးၸုမ်းၵူၼ်းၼုမ်ႇတႆး ပွတ်းႁွင်ႇ TYO လၢတ်ႈဝႃႈ “ ၵူၼ်းဝၢၼ်ႈ ဢၼ်ယူႇၸွမ်းဝၢၼ်ႈမႄႈႁၢၼ်ႇၼၼ်ႉ ဢွၼ်ၵၼ်ၶႂၢၵ်ႈဢဝ်တီႈလိၼ်ၵၼ်သေ သမ်ႉဢမ်ႇၶႂ်ႈဝႆႉႁွင်ႈတၢင်းၼမ်ႉလႆၼၼ်ႉၼႃႇ။ ၶႂ်ႈႁႂ်ႈၵူၼ်းမိူင်းႁဝ်း ယႃႇမီးၸႂ် လေႃးၽသေ ၶႂၢၵ်ႈဢဝ်ၼင်လိၼ်ယူႇတိၵ်းတိၵ်း။ ယွၼ်ႉဝႃႈ ႁွင်ႈၼမ်ႉတႃႇတေလႆၼၼ်ႉ တေဢမ်ႇမီးယဝ်ႉ။ လိူဝ်ၼၼ်ႉ ႁွင်ႈၼမ်ႉဢၼ်မီးယူႇၼႃႈႁိူၼ်းၽႂ်မၼ်းၼၼ်ႉ လူဝ်ႇလၢင်းပၼ်ၵူႈပီၵူႈပီ ယိုင်ႈၶႅၼ်းတေလီ။ ယဝ်ႉၵေႃႈ ၽွမ်ႉၵၼ်သေ ၶိုၼ်းတုၵ်းယွၼ်းတီႈလူင်ပွင်ၸိုင်ႈ ႁႂ်ႈၶဝ်ႁဵတ်းပၼ် ႁွင်ႈၼမ်ႉလႆ တႄႇဢဝ် ၼမ်ႉၸၢမ်လူင်း ၸိူဝ်းၼၼ်ႉ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ