ၵူၼ်းဝၢၼ်ႈသၢႆးလႅင် ႁူမ်ႈၵၼ်ပူၵ်းပၢႆႉ သၢၼ်ၶတ်း ၶွမ်ႊပၼီႊ ၶိုင်ႈႁဵတ်းၾၢႆ ၼိူဝ်ၼမ်ႉမႃႉ

ၵူၼ်းဝၢၼ်ႈၵူၼ်းမိူင်း ဢမ်ႇလႆႈၸႂ် လွင်ႈၶွမ်ႊပၼီႊ ၶိုင်သၢင်ႈတေႁဵတ်းၾၢႆတီႈၼိူဝ်ၼမ်ႉမႃႉ ယွၼ်ႉတေတုမ်ႉတိူဝ်ႉ ၵူၼ်းဝၢၼ်ႈၵူၼ်းမိူင်းလႄႈ ၵူၼ်းဝၢၼ်ႈသၢႆးလႅင် ၸင်ႇႁူမ်ႈၵၼ် ပူၵ်းပၢႆႉ ၼႂ်းမူႇဝၢၼ်ႈသေ သၢၼ်ၶတ်းတေႃႇ ၶွမ်ႊပၼီႊဝႆႉ ဝႃႈၼႆ။

ဝၼ်းတီႈ 30/06/2019 ၵူၼ်းဝၢၼ်ႈသၢႆးလႅင် ထုင်ႉၼမ်ႉမႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူမ်ႈၵၼ် ပူၵ်းပၢႆႉ ၸွမ်း ၼႂ်းၵိဝ်ႇဝၢၼ်ႈ သၢၼ်ၶတ်းတေႃႇၶွမ်ႊပၼီႊ Unienergy Co.Ltd ဢၼ်ၶိုင်ႁဵတ်းၾၢႆၼိူဝ်ၼမ်ႉမႃႉၼၼ်ႉ ယွၼ်ႉဝႃႈ တေ တုမ်ႉတိူဝ်ႉၵူၼ်းဝၢၼ်ႈၵူၼ်းမိူင်း ၸိူဝ်းယူႇၸွမ်းသၢပ်ႇၼမ်ႉမႃႉ ၸိူဝ်းၼၼ်ႉ။

ၸၢႆးတဵင်းမိၼ်ႉ ႁူဝ်ပဝ်ႈၶွၼ်ႈတုမ်ဢဵၼ်ႁႅင်းၵူၼ်းၼုမ်ႇတႆး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈသၢႆးလႅင်ႁဝ်းၶႃႈ တင်း ၸုမ်းၵူၼ်းၼုမ်ႇႁဝ်း ႁူမ်ႈၵၼ်သေ ပူၵ်းပၢႆႉ ၸွမ်းၼႂ်းၵိဝ်ႇဝၢၼ်ႈ သၢၼ်ၶတ်းတေႃႇၶွမ်ႊပၼီႊၶဝ်ဝႆႉၶႃႈ။ ဢၼ်ႁဝ်းၶႃႈ ႁဵတ်း မႃးၼႆႉ မီးၶၢဝ်းတၢင်း 1-2 ဝၼ်းယဝ်ႉ။ ၵူၼ်းဝၢၼ်ႈႁဝ်းၶႃႈ ဢမ်ႇလႆႈၸႂ် ဢမ်ႇႁၼ်လီ ဢမ်ႇၽွမ်ႉၸွမ်းၼၼ်ႉၶႃႈယဝ်ႉ” ဝႃႈ ၼႆ။

လွင်ႈတႃႇတေသၢင်ႈၾၢႆၼိူဝ်မႄႈၼမ်ႉမႃႉၼႆႉ ၵူၼ်းမိူင်းၼႂ်းပိုၼ်ႉတီႈ ဢမ်ႇႁၼ်လီၵမ်ႉထႅမ် ဢမ်ႇယွမ်းႁပ်ႉလႆႈ ဝႃႈၼႆ။

ၵူၼ်းဝၢၼ်ႈ ဢိူင်ႇသၢႆးလႅင် လၢတ်ႈတီႈၽူႈတွႆႇႁွၵ်ႈဝႃႈ “ ပေႃးဝႃႈ ၶဝ်မႃးတဵင်ၾၢႆၼိူဝ်မႄႈၼမ်ႉမႃးၼႆႉၸိုင် ဢၼ်တေၺႃး လွင်ႈတုမ်ႉယွၼ်ႈ မီးၼပ်ႉႁူဝ်သိပ်းဝၢၼ်ႈ တႄႇဢဝ် ၼမ်ႉမႃႉ တေႃႇထိုင် ၼမ်ႉပွင်ႈ၊ မိူင်းပၢႆဝၢၼ်ႈ ၵူၼ်းဢမ်ႇယွမ်း 30 ပၢႆ ႁိမ်း 40 ဝၢၼ်ႈၸိူဝ်းယူႇၸွမ်းသၢပ်ႇၼမ်ႉမႃႉ တေတုမ်ႉတိူဝ်ႉ”ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 10/05/2019 ၼၼ်ႉၵေႃႈ ၵူၼ်းဝၢၼ်ႈသၢႆးလႅင်၊ ဝၢၼ်ႈပဵင်းသႃႇလႄႈ ဝၢၼ်ႈၵွင်းသၢင်း ႁူမ်ႈၵၼ် ႁူဝ်ၵူၼ်း ႁိမ်း 200 ၵေႃႉ ဢွၼ်ၵၼ်ပႂ်ႉတီႈဝၢၼ်ႈသၢႆးလႅင် ဢိူင်ႇသၢႆးလႅင် ၸႄႈဝဵင်းသီႇပေႃႉ ဢဵၼ်ႁႅင်း 200 ပၢႆ ႁူမ်ႈၵၼ် ႁၢင်ႈႁႅၼ်း တႃႇၼႄၵၢင်ၸႂ်သၢၼ်ၶတ်း တေႃႇ ၶွမ်ႊပၼီႊ Unienergy Co.Ltd ဢၼ်တေလူင်းႁူပ်ႉထူပ်း ၽူႈၵွၼ်း ဢိူင်ႇလႄႈ ၵူၼ်းဝၢၼ်ႈတီႈဝၢၼ်ႈသၢႆးလႅင် လွင်ႈတေသၢင်ႈၾၢႆၼိူဝ်မႄႈၼမ်ႉမႃႉၼၼ်ႉ ဝႃႈၼႆ။