ၼႂ်းၶၢဝ်းတၢင်း 6 လိူၼ်မႃးၼႆႉ ႁႅင်းၵၢၼ်ယၢၼ်မိူင်း ၵူၼ်းမိူင်းႁူမ်ႈတုမ် ဢၼ်လၵ်ႉၶဝ်ႈမိူင်းထႆးႁဵတ်းၵၢၼ် ဢမ်ႇပဵၼ် တၢင်းၵၢၼ်ၼၼ်ႉ ထုၵ်ႇပလိၵ်ႈထႆးတီႉၺွပ်းၵုမ်းၶင်တူဝ်သေ သူင်ႇပွၵ်ႈတၢင်းလႅၼ်လိၼ်တႆး – ထႆး တၢင်းၾင်ႇတႃႈၶီႈ လဵၵ်း မီးၵႂႃႇ 1,107 ၵေႃႉယဝ်ႉ။
ဝၼ်းတီႈ 1/7/2019 ယၢမ်းၵၢင်ၼႂ် ပလိၵ်ႈထႆး သူင်ႇတူဝ်ႁႅင်းၵၢၼ်မွပ်ႈပၼ်တၢင်းၾၢႆႇပလိၵ်ႈၾင်ႇတႃႈၶီႈလဵၵ်းထႅင်ႈ 11 ၵေႃႉ။ ၼႂ်း 11 ၵေႃႉၼၼ်ႉ တႃႇ 7 ၵေႃႉ ပဵၼ်ၵူၼ်းမိူင်းတႆး ပွတ်းၸၢၼ်း၊ တႃႇ 4 ၵေႃႉသမ်ႉ ပဵၼ်းၵူၼ်းမိူင်းတႆးပွတ်းဢွၵ်ႇ ၶူင်း ဝႃႈၼႆ။
ႁႅင်းၵၢၼ်ၸိူဝ်းဢၼ်ပလိၵ်ႈထႆးလႆႈသူင်ႇတူဝ်ပွၵ်ႈတၢင်းလႅၼ်လိၼ် တႆး – ထႆး (မႄႈသၢႆ – တႃႈၶီႈ လဵၵ်း) ၼႆႉ ၵမ်ႈၼမ် ယွၼ်ႉဢမ်ႇမီးဝတ်းဝႂ်၊ ၶၢမ်ႈပူၼ်ႉလႅၼ်ၶႅၼ်ႈ ဢၼ်မၵ်းတတ်းဝႆႉ ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်သူင်ႇတူဝ်ပွၵ်ႈမႃးတၢင်းၾင်ႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ တႄႇဢဝ် ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊမႃး တေႃႇထိုင် 1 လိူၼ်ၵျူႊလၢႆႊၼႆႉ တင်းမူတ်းမီးၵႂႃႇယဝ်ႉ 1,107 ၵေႃႉ။ ၼႂ်းၼၼ်ႉ ၽူႈၸၢႆး 710 ၵေႃႉ၊ ၽူႈယိင်း 361 ၵေႃႉလႄႈ လုၵ်ႈဢွၼ်ႇ 36 ၵေႃႉ ဝႃႈၼႆ။
ၶေႃႈမုလ်း – Tachileik News Agency
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ