ႁႅင်းၵၢၼ် ယၢၼ်မိူင်းၵေႃႉၼိုင်ႈ ၵႂႃႇယွၼ်းငိုၼ်း ၵႃႈႁႅင်းတီႈပေႃႈလဵင်ႉ – ပေႃႈလဵင်ႉ သမ်ႉဢမ်ႇပၼ်လႄႈ မီးလွင်ႈၽိတ်းမေႃး ပေႃႉထုပ်ႉၵၼ်ၵေႃႉပဵၼ်ပေႃႈလဵင်ႉလူႉတၢႆ။

ဝၼ်းတီႈ 01/07/2019 ႁႅင်းၵၢၼ်ယၢၼ်မိူင်း ၸိုဝ်ႈႁွင်ႉဝႃႈ ဢွင်ႇသၢၼ်း ဢႃယု 35 ပီ ၵႂႃႇယွၼ်းငိုၼ်းတီႈပေႃႈလဵင်ႉ ပေႃႈလဵင်ႉသမ်ႉဢမ်ႇပၼ်လႄႈ မီးလွင်ႈၽိတ်းမေႃးၵၼ် ထိုင်တီႈပေႃႉထုပ်ႉ ပေႃႈလဵင်ႉမၼ်းၸိုဝ်ႈႁွင်ႉ ၸၢႆးသုၼ်ထွၼ်ႊ ရုင်ႊရူတ်ႊ ၶျူတ်ႊၶျူင်ႊ ဢႃယု 50 ပီ တီႈဢိူင်ႇၶျူမ်ႊၽူႊ ၸႄႈဝဵင်းသႃရၽီႊ ၸႄႈတွၼ်ႈၵဵင်းမႆႇ ၸိုင်ႈထႆး။

ၸၢႆးပွႆးၵႅဝ်ႈ ၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း လၢတ်ႈဝႃႈ “ ၶဝ်ယူႇၸွမ်းၵၼ် ႁဵတ်းၵၢၼ်မႃးၸွမ်းၵၼ်ဢၢၼ်ႇႁူဝ် သိပ်းပီမၼ်းယဝ်ႉ ၊ ၶမ်ႈဝႃးၼႆႉ ၵေႃႉပဵၼ်လုၵ်ႈၸၢင်ႈၵႂႃႇယွၼ်းငိုၼ်း ပေႃႈလဵင်ႉမၼ်းသမ်ႉဢမ်ႇပၼ်လႄႈ မီးလွင်ႈ ၽိတ်းမေႃးၵၼ် ပေႃႈလဵင်ႉၶဝ် တေလႃႇမၼ်းၸိူင်ႉႁိုဝ်လၢႆလၢႆဢမ်ႇႁူႉ ထိုင်တီႈပေႃးမီးလွင်ႈႁဵတ်းႁၢႆႉၵၼ် ။ ဝၢႆးလင်ပေႃႈလဵင်ႉမၼ်းတၢႆၵႂႃႇယဝ်ႉ မၼ်းၸၢႆးၵေႃႈဢမ်ႇၵႂႃႇတၢင်းလႂ် ပႂ်ႉမွပ်ႈတူဝ်တီႈၸဝ်ႈၼႃႈတီႈယူႇ ” ဝႃႈၼႆ။

ပီႈၼွင်ႉပေႃႈလဵင်ႉတႄႉ လၢတ်ႈဝႃႈ – “ ပေႃႈလဵင်ႉလႄႈ လုၵ်ႈလဵင်ႉႁဵတ်းၵၢၼ် ၸွမ်းၵၼ်မႃးႁိုင်လုမ်းလႃးတူၺ်း ထိုင်ၵူႈလွင်ႈလွင်ႈ ဢၼ်ပေႃႈလဵင်ႉပႆႇပၼ်ငိုၼ်းၼၼ်ႉ ပဵၼ်ယွၼ်ႉၼႃႈၵၢၼ်ပႆႇယဝ်ႉတူဝ်ႈ ” ဝႃႈၼႆ။

ယူႇတီႈၸဝ်ႈၼႃႈတီႈ ၵူတ်ႇထတ်းလွင်ႈပဵၼ်တႄႉသေ တီႉၺွပ်းၵူၼ်းႁဵတ်းၽိတ်း သူင်ႇႁူင်း ပလိၵ်ႈ ပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းမီးၼၼ်ႉဝႃႈၼႆ။