ၽူႈတူင်ႉၼိုင်ၾၢႆႇႁႅင်းၵၢၼ် HRDF တူၵ်ႇလၢတ်ႈဝႃႈ လွင်ႈဢၼ်ႁႅင်းၵၢၼ်ယၢၼ်မိူင်း ႁူပ်ႉထူပ်းပၼ်ႁႃ ပလိၵ်ႈထႆးၵူတ်ႇထတ်းတီႉၺွပ်းႁၢဝ်ႈႁႅင်း ယူႇယၢမ်းလဵဝ်ၼႆႉ ၶႂ်ႈႁႂ်ႈလူင်ပွင်ၸိုင်ႈမိူင်းႁူမ်ႈတုမ်မၢၼ်ႈလႄႈ ထႆး ႁပ်ႉႁူႉသေႁူပ်ႉထူပ်းဢုပ်ႇဢူဝ်း ၵၼ် တႃႇႁူမ်ႈၵၼ်ၵႄႈလိတ်ႈပၼ်ႁႃ။

ဝၼ်းတီႈ 01/07/2019 ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ဝဵင်းၵဵင်းမႆႇ လၢတ်ႈဝႃႈ ၽွင်းယၢမ်းမိူဝ်ႈလဵဝ်ၼႆႉ ၸဝ်ႈ ၼႃႈတီႈ ၽူႈမီးပုၼ်ႈၽွၼ်းလၢႆလၢႆႁွင်ႈၵၢၼ် လူင်းပိုၼ်ႉတီႈၵူတ်ႇထတ်း တီႉၺွပ်းႁႅင်းၵၢၼ်ႁၢဝ်ႈႁႅင်း မီးတၢင်းၽိတ်းဢိတ်းဢီႈၵေႃႈ သူင်ႇပွၵ်ႈလႅၼ်လိၼ် ၊ ပေႃႈလဵင်ႉၼၢႆးၸၢင်ႈသမ်ႉဢမ်ႇဢဝ်ပုၼ်ႈၽွၼ်းၸွႆႈထႅမ်သင်လႆႈတႄႉတႄႉ လွင်ႈၼႆႉ ၶႂ်ႈႁႂ်ႈလူင်ပွင်ၸိုင်ႈမိူင်းႁူမ်ႈတုမ်မၢၼ်ႈလႄႈ ထႆး ႁူပ်ႉထူပ်းဢုပ်ႇဢူဝ်းၵၼ်သေ ႁူမ်ႈၵၼ်ႁႃလၢႆးၵႄႈလိတ်ႈ ႁႂ်ႈမီးလွင်ႈသၢင်ႇထုၵ်ႇ ၽဵင်ႇပဵင်းၵၼ်တင်းသွင်ၾၢႆႇဝႃႈၼႆ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၸွမ်းၼင်ႇမၢႆမီႈမိူင်းထႆးမၵ်းမၼ်ႈၼႆႉ ႁႅင်း ၵၢၼ်ယၢၼ်မိူင်းတေလႆႈႁဵတ်းၵၢၼ် “ ၵမ်ႊမၵွၼ်ႊ ” ဢၼ်ပွင်ႇဝႃႈ ႁဵတ်းၵၢၼ်ၵူႈလွင်ႈလွင်ႈဢၼ်ပဵၼ်ၵၢၼ် ႁၢပ်ႇ, မႅၵ်ႇ, ယုၵ်ႉ ၶူဝ်းၶွင်ဢၼ်ၼၵ်းလႄႈ ၵၢၼ်ႁပ်ႉၸႂ်ႉၼႂ်းႁိူၼ်း (မႄႈဝၢၼ်ႈ) ၸိူဝ်းၼႆႉ ၊ မိူၼ်ၼင်ႇၵၢၼ်ၶူၼ်းပုၼ် ၊ ၵၢၼ် ၵေႃႇ ၊ၵၢၼ်သၢပ်ႇ ၼႆႉ ႁဵတ်းဢမ်ႇလႆႈ ပေႃႈလဵင်ႉၼၢႆးၸၢင်ႈသမ်ႉၸႂ်ႉႁဵတ်း ပေႃးႁဵတ်းယဝ်ႉၸဝ်ႈၼႃႈတီႈ ၶဝ်ၵူတ်ႇၺႃး သမ်ႉၺႃးတီႉ သူင်ႇပွၵ်ႈလႅၼ်လိၼ် ပေႃႈလဵင်ႉသမ်ႉဢမ်ႇႁပ်ႉပုၼ်ႈၽွၼ်းသင် လွင်ႈၼႆႉႁဵတ်းႁႂ်ႈႁႅင်းၵၢၼ်ထူပ်းတၢင်ယၢပ်ႇ ၶႂ်ႈႁႂ်ႈလူင်ပွင်ၸိုင်မၢၼ်ႈ – ထႆး ႁၼ်ထိုင်တၢင်းယၢပ်ႇၽိုတ်ႇႁႅင်းၵၢၼ်သေ ႁူပ်ႉဢုပ်ႇၵၼ် ႁႃတၢင်းဢွၵ်ႇပၼ်သေၵမ်း” ဝႃႈၼႆ။

တႄႇဢဝ်ႁူဝ်ပီ 2019 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 1 မႃး ထိုင် ဝၼ်းတီႈ 28 လိူၼ်ၵျုၼ်ႊ 2019 ၼႆႉ ႁႅင်းၵၢၼ်မိူင်း  ႁူမ်ႈတုမ် ဢၼ်လႆႈသူင်ႇပွၵ်ႈမႃးတၢင်းလႅၼ်လိၼ်တႆး – ထႆး တၢင်းၾင်ႇတႃႈၶီႈလဵၵ်းၼႆႉ တင်းမူတ်း မီးၵႂႃႇယဝ်ႉ 1,096 ၵေႃႉ။ ၽူႈၸၢႆး 699 ၵေႃႉ၊ ၽူယိင်း 361 ၵေႃႉလႄႈ လုၵ်ႈဢွၼ်ႇ 36 ၵေႃႉ ဝႃႈၼႆ။