ပီႈၼွင်ႉတႆးပွတ်းဢွၵ်ႇၶူင်း ႁူမ်ႈၵၼ်ၸတ်းႁဵတ်းပၢင်ပွႆးၾိင်ႈႁိတ်ႈႁွႆးၵႂၢႆးၸူၼ်း (ၵႂၢႆးတေႃး) ၵူၼ်းဝၢၼ်ႈဢွၼ်ၵၼ်ဢဝ်ၵႂၢႆး ၶဝ်ႈၶႅင်ႇ30 တူဝ်။
ဝၼ်းတီႈ 13/12/2017 ၵူၼ်းဝၢၼ်ႈၵူၼ်းမိူင်းထုင်ႉသိုဝ်လိုဝ်း၊ မိူင်းလူၺ်၊ မိူင်းယၢင်း ႁူမ်ႈၵၼ်ၸတ်း ႁဵတ်း ပၢင်ပွႆးၵႂၢႆးၸူၼ်း (ၵႂၢႆးတေႃးၵၼ်) မီးၵႂၢႆးၸဝ်ႈသူၼ်ၸဝ်ႈၼႃး 30 တူဝ်ၶႅင်ႇၵၼ်။
ပၢင်ၶႅင်ႇပွၵ်ႈၼႆႉ တူဝ်ပေႉ ပဵၼ်ၵႂၢႆးၵူၼ်းဝၢၼ်ႈဢူႇတႂ်ႈ၊ ဢၼ်လႆႈတီႈသွင် ပဵၼ်ဝၢၼ်ႈၵဵင်းသၢမ်ၶႃ ။ ဢၼ်ပေႉတီႈၼိုင်ႈလႆႈသူးငိုၼ်းၶႄႇ 1,600 ယႂၼ်တူၵ်းမႅၼ်ႈငိုၼ်းမၢၼ်ႈ 330,000 ပျႃး၊ တူဝ်ပေႉ တီႈသွင် လႆႈ 1,400 ယႂၼ် 280,000 ပျႃး ။ ၼွၵ်ႈသေ သူးငိုၼ်း ယင်းမီး ၶူဝ်းတွၼ်ႈထႅင်ႈလၢႆလၢႆ ယၢင်ႇ – မိူၼ်ၼင်ႇသွၵ်းတိၼ်၊ ၽႃႈၸဵတ်ႉၼႃႈ၊ၽွင်သၵ်ႉၶူဝ်းၸဵမ်ၸိူဝ်းၼႆႉ။
ၸၢႆးလီ ၵူၼ်းမိူင်းယၢင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ပီၼႆႉၸဝ်ႈၼႃႈတီႈလူင်ပွင်ၸိုင်ႈ မၢၼ်ႈ ဢၼ်ပႂ်ႉလၢၼ်ႇၵဵတ်ႉၶဝ်ႈဢွၵ်ႇဝဵင်းမိူင်းယၢင်း တင်းသၢမ်ၾၢႆႇ 3 တီႈ ဢမ်ႇၵူတ်ႇထတ်းၵူၼ်း ၶဝ်ႈၵူၼ်းဢွၵ်ႇဝဵင်း ငိုၼ်းၵေႃႈဢမ်ႇၵဵပ်း ပိုတ်ႇပၼ်ၵူၼ်းၵႂႃႇမႃးလွတ်ႈလႅဝ်း ၵူၼ်းမိူင်းမူၼ်ႈၸႂ်လီ ၸႂ်တႄႉတႄႉ” ဝႃႈၼႆ။
ပၢင်ပွႆးၼႆႉ ၼႂ်းဝၼ်းပုတ်ႉဝူင်ႈၼႃႈ ဝၼ်းတီႈ 20/12/2017 တေၶႅင်ႇၵၼ်ထႅင်ႈ ႁွပ်ႈလိုၼ်းသုတ်း တူဝ်ဢၼ်ပေႉတီႈၼိုင်ႈတေလႆႈသူးငိုၼ်း 1800 ယႂၼ် 360,000 ပျႃး၊ တူဝ်တီႈသွင်သမ်ႉတေလႆႈ 1600 ယႂၼ် မႅၼ်ႈငိုၼ်းမၢၼ်ႈ 330,000 ပျႃး ဝႃႈၼႆ။
ပၢင်ပွႆးၵႂၢႆးတေႃးၵၼ် ပဵၼ်ၾိင်ႈႁိတ်ႈႁွႆးၸဵမ်ပၢၼ်ပူႇမွၼ်ႇ ၵူၼ်းဝၢၼ်ႈႁူမ်ႈၵၼ်ၸတ်းတီႈ ဝဵင်းမိူင်း ယၢင်းၵူႈပီ ။ တႃႇတေတလႆႈသူးၵတ်ႉၶႅၼ်ႇၼၼ်ႉလႆႈ ၸတ်းႁဵတ်း 3 တီႈ၊ သၢမ်ပွၵ်ႈ။ ပီၼႆႉလႆႈ တိုဝ်ႉတၢင်းၸတ်းပၢင်ၶႅင်ႇသွင်ၶၵ်ႉတွၼ်ႈၵူၺ်း ဝႃႈၼႆ။
