ယႃႈၾိၼ်ႇၽိူၵ်ႇ 2,000 ၵရမ်ႇ သိုဝ်ႉမႃးတၢင်းလႅၼ်လိၼ်တႆး – ထႆး တီႈတႃႈၶီႈလဵၵ်းသေ တေဢၢၼ်းတေႃႉသူင်ႇၵႂႃႇ တၢင်း မိူင်းႁွင်ႊၵွင်ႊ ၺႃးပလိၵ်ႈမၢၼ်ႈတီႉလႆႈတီႈၶူင်ႇႁိူဝ်းမိၼ် တီႈတႃႈၵုင်ႈ။
ဝၼ်းတီႈ 23/06/2019 ယၢမ်းၵၢင်ၼႂ် ၸဝ်ႈၼႃႈတီႈတီႈၶူင်ႇႁိူဝ်းမိၼ်တႃႈၵုင်ႈ X-Ray ထူင်ၶူဝ်းၵူၼ်းဢွၵ်ႇတၢင်း ႁၼ်မႅၼ်ႈ ယႃႈမဝ်းၵမ်ၼႂ်းထူင် မဝိၼ်းတူႇၼၢႆႇ ဢႃႇယု 25 ပီ ဢၼ်တေဢွၵ်ႇၶၢဝ်းတၢင်းၵႂႃႇမိူင်း ႁွင်ႊၵွင်ႊ။ ပလိၵ်ႈမႃးၵူတ်ႇထတ်း ထဵတ်ႈထၢမ်ၶႆႈငိူၼ်ႈ လႆႈႁူႉသၢႆတၢင်းယႃႈမဝ်းၵမ်ၼႆႉသေ တီႉၺွပ်းလႆႈ ၽူႈၵဵဝ်ႇၶွင်ႈ 6 ၵေႃႉ။ ယၢမ်းလဵဝ်ၸိူဝ်းၶဝ်မီးတီႈ ႁူင်း ပလိၵ်ႈ ၸႄႈဝဵင်းမိင်ႇၵလႃႇတူင်ႇလႄႈ ႁူင်းပလိၵ်ႈၸႄႈဝဵင်းပႁၢၼ်း ဝဵင်းတႃႈၵုင်ႈ ၊ ပလိၵ်ႈတေၵူတ်ႇထတ်း ပၼ်တူတ်ႈ တၢမ်ႇၵႂႃႇ ဝႃႈၼႆ။
ယႃႈၾိၼ်ႇၽိူၵ်ႇ ဢၼ်တေတေႃႉသူင်ႇၵႂႃႇတၢင်းမိူင်းႁွင်ႊၵွင်ႊၼၼ်ႉ ၽူႈၸၢႆးၸၢဝ်းၼီႊပေႃႊလ်ၵေႃႉၼိုင်ႈ ဢႃယု 37 ပီ ပဵၼ်ၵေႃႉႁၢင်ႈႁႅၼ်းၶပ်းၶိုင်သေ မဝိၼ်းတူႇၼၢႆႇ ဢႃယု 25 ပဵၼ်ၵေႃႉတေႃႉဢွၵ်ႇ။ ၽူႈဢၼ်ၵဵဝ်ႇၶွင်ႈၸွႆႈထႅမ်ပၼ်သမ်ႉ ပဵၼ် ၵူၼ်းႁေႃႈႁိူဝ်းမိၼ်ၵဝ်ႇၵေႃႉၼိုင်ႈ လႄႈ ၽူႈယိင်းထႅင်ႈ သွင်ၵေႃႉ ႁူမ်ႈၵၼ်ပဵၼ် 5 ၵေႃႉ။
လိၵ်ႈပိုၼ်ၽၢဝ်ႇ ပလိၵ်ႈဢွၵ်ႇဝႆႉဝႃႈ “မိူဝ်ႈၵႂႃႇၵူတ်ႇထတ်းတီႈ ၵူၼ်းႁေႃႈႁိူဝ်းမိၼ်ၵဝ်ႇ ဢၼ်ၶဝ်ႈပႃးၸွႆႈထႅမ်ၼၼ်ႉ တီႉလႆႈ ယႃႈဢႆႉသ် (ICE) 1,800 ၵရမ်ႇတီႈႁွင်ႈသဝ်းမၼ်း။ လိူဝ်ၼၼ်ႉ မီးၽူႈၵဵဝ်ႇၶွင်ႈၸွမ်းထႅင်ႈ 2 ၵေႃႉ ပဵၼ် မဝႃႇဝႃႇဢီႉသူၺ်ႇ ဢႃယု 26 ပီလႄႈ ယုၼ်းႁေႇမၢၼ်ႇ ဢႃယု 24 ပီ။ ပလိၵ်ႈတီႉလႆႈ ယႃႈဢႆႉသ် ၼႂ်းႁူင်းသဝ်းၶဝ် ထႅင်ႈ 0.48 ၵရမ်ႇလႄႈ ၽွင်ယႃႈၵၢတ်ႇတမိၼ်း 5 ၵရမ်ႇ” ဝႃႈၼႆ။
ၼႂ်းဝူင်းၵၢၼ်တေႃႉသူင်ႇယႃႈၼႆႉ မီးထႅင်ႈၽူႈၸၢႆးၵေႃႉၼိုင်ႈ ၸိုဝ်ႈႁွင်ႉ ယႄးမိၼ်း ။မၼ်းၸၢႆးလႆႈဢွၵ်ႇၵႂႃႇပႂ်ႉတီႈ ႁွင်ႊၵွင်ႊ မိူဝ်ႈဝၼ်းတီႈ 22 လိူၼ်ၵျုၼ်ႊ။ ထိုင်မႃးဝၼ်းတီႈ 25 မၼ်းၸၢႆးပွၵ်ႈမႃးၶိုၼ်းလႄႈ ပလိၵ်ႈတီႉလႆႈမၼ်းၸၢႆးတီႈၶူင်ႇႁိူဝ်း မိၼ် တႃႈၵုင်ႈ ဝႃႈၼႆ။
ဝၼ်းတီႈ 26/06/2019 ဝၼ်းသၢၼ်ၶတ်းၽဵဝ်ႈမူၺ်ႉယႃႈမဝ်းၵမ် လုမ်ႈၾႃႉၼၼ်ႉ ဝဵင်းယႂ်ႇဝဵင်းလူင်လၢႆလၢႆဝဵင်း ၼႂ်းမိူင်းႁူမ်ႈတုမ် ၸတ်းႁဵတ်းပၢင်ၽဝ် ယႃႈမဝ်းၵမ် ဢၼ်တီႉ ၺွပ်းလႆႈ ၼႂ်းပီ 2018-2019 ။
ယႃႈမဝ်းၵမ် ဢၼ်လႆႈၽဝ်ပႅတ်ႈတင်းမူတ်းသမ်ႉ ႁူမ်ႈငိုၼ်းမၢၼ်ႈတင်းမူတ်း 451746.377742 လၢၼ်ႉပျႃး (ပေႃးပဵၼ် ငိုၼ်းဢမေႊရိၵႃႊ ၻေႃႊလိူဝ်ႊသမ်ႉ 301.1642517 လၢၼ်ႉ)။ လႆႈႁူႉဝႃႈ ၵႃႈၶၼ်ယႃႈမဝ်းၵမ်ဢၼ်ၽဝ်ၼႂ်းမိူင်းတႆး ၼမ်လိူဝ်ပိူၼ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ