ၶူးလႄႈလုၵ်ႈႁဵၼ်းၸုမ်းၵေႃတႆး ဢွၼ်ၵၼ်ၵႂႃႇလဵပ်ႈႁဵၼ်း လွင်ႈၵၢၼ်ၸတ်းပွင်ပၢႆးပၺ်ၺႃ တီႈမိူင်း မွၼ်း ပိူဝ်ႈႁႂ်ႈၵူၼ်းၼုမ်ႇတႆး မီးတၢင်းၶတ်းၸႂ်လွင်ႈၵၢၼ်ပၢႆးပၺ်ၺႃ။

ႁူဝ်လိူၼ်တီႊသႅမ်ႊၿိူဝ်ႊ 2017 ၼႆႉၶူးလႄႈ လုၵ်ႈႁဵၼ်းၸုမ်းၵေႃတႆးႁူမ်ႈ 18 ၵေႃႉဢွၼ် ၵၼ်ဢွၵ်ႇ ၶၢဝ်းတၢင်းၵႂႃႇလဵပ်ႈႁဵၼ်း လွင်ႈၸတ်းပွင်ပၢႆးပၺ်ၺႃ တီႈႁူင်းႁဵၼ်းၸိူဝ်ႉၸၢတ်ႈ ၸၼ်ႉသုင် Bop Htaw Education and Empowerment program တီႈဝဵင်းမေႃႇလမႅင်ႇ ၸႄႈမိူင်းမွၼ်း။

ၶၢဝ်းတၢင်းလဵပ်ႈႁဵၼ်းပွၵ်ႈၼႆႉ လႆႈလဵပ်ႈႁဵၼ်းလွင်ႈ လၢႆးပူၵ်းပွင်ပၢႆးပၺ်ၺႃ ၊ လွင်ႈၸုမ်းသိုၵ်းမွၼ်းဝႆႉ ၵႃႈၶၼ်ၼိူဝ်ပၢႆးပၺ်ၺႃ ၊ လွင်ႈၵူၼ်းမိူင်းမွၼ်း ဝႆႉၵႃႈၶၼ်ၼိူဝ်ပၢႆးပၺ်ၺႃ ၊ လွင်ႈပိူင်တီႇမူဝ်ႇၶရေႇၸီႇ ၸိူဝ်းၼႆႉ။ တီႈမိူင်းမွၼ်းၼႆႉ မီးႁူင်းႁဵၼ်းၸိူဝ်ႉၸၢတ်ႈ 160 တီႈ ဝႃႈၼႆ။

ၼၢင်းႁဵဝ်းသႅင် ၶူးသွၼ်ၵေႃတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ တၢင်ႇၸႄႈမိူင်းၼႆႉ ၵၢၼ်ႁႃ ၵိၼ်လဵင်ႉတွင်ႉယၢပ်ႇသေတႃႉ ၵၢၼ်ပၢႆးပၺ်ၺႃ ပိူၼ်ႈၶိုၼ်ႈယႂ်ႇဝႆႉ ၊ မိူင်းတႆးသမ်ႉၵၢၼ်ႁႃၵိၼ်လဵင်ႉ တွင်ႉငၢႆႈယူႇသေတႃႉ ၵၢၼ်ပၢႆးပၺ်ၺႃႁဝ်းသမ်ႉ တူၵ်းလိုၼ်းပိူၼ်ႈဝႆႉ ၵွပ်ႈၼၼ်လႄႈ ႁႂ်ႈဢွၼ်ၵၼ် သႂ်ႇၸႂ်ၼိူဝ်ၵၢၼ်လိၵ်ႈလၢႆးၼမ်ၼမ်သေၵမ်း ” ဝႃႈၼႆ။

မိူဝ်ႈဝၼ်းတီႈ 14/11/2017 ၼၼ်ႉၵေႃႈ ၶူးသွၼ်လႄႈ လုၵ်ႈႁဵၼ်း ၸုမ်းၵေႃတႆး ဢွၼ်ၵၼ်ၵႂႃႇလဵပ်ႈ ႁဵၼ်း လွင်ႈၵၢၼ်မိူင်း တီႈသၽႃးမိူင်းႁူမ်ႈတုမ်ၼေႇပျီႇတေႃႇ။ လဵပ်ႈႁဵၼ်းလွင်ႈၽူႈတႅၼ်းၶဝ်ႁဵတ်း ၵၢၼ်ၸိူင်ႉႁိုဝ်၊ မီးဢႃႇၼႃႇတႅပ်းတတ်းလႆႈၸိူင်ႉႁိုဝ် ၸိူဝ်းၼႆႉ။

ၸုမ်းၵေႃတႆးၼႆႉ ၵေႃႇတင်ႈမႃးမိူဝ်ႈပီ 1999 ၊ ပူင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ မိူၼ်ၼင်ႇ ၵၢၼ်ၶၢဝ်ႇ၊ ၵၢၼ်မိူင်း၊ ၵၢၼ်တူင်ႇဝူင်းၵူၼ်း၊ လိၵ်ႈဢိင်းၵလဵတ်ႈ၊ ပိုၼ်ႉထၢၼ် Computer ၊ ၵၢၼ်ပူၵ်း ပွင်ဢိူင်ႇဝၢၼ်ႈပိုၼ်ႉတီႈၸိူဝ်းၼႆႉ လိူဝ်ၼၼ်ႉၶပ်းၶိုင်ပၼ်ႁႂ်ႈလုၵ်ႈႁဵၼ်းလႆႈတိုဝ်ႉတၢင်း ၵႂႃႇႁဵၼ်းၼွၵ်ႈ မိူင်း။ ၸိူဝ်းပွၵ်ႈမႃး ၸွႆႈတူင်ႉၼိုင်ၼႂ်းၸုမ်းၶိုၼ်းမီး 30 ပၢႆ ယၢမ်းလဵဝ် ပိုတ်ႇဝႆႉႁူင်းႁဵၼ်းၸိူဝ်ႉၸၢတ်ႈ 3 တီႈ မိူၼ်ၼင်ႇ ၵႃလီႉ၊ မိူင်းၶိူဝ်းလႄႈပၢင်ႇလႅင်းသႂ် ၸိူဝ်းၼႆႉ။