ၸဝ်ႈၼႃႈတီႈပလိၵ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ် လႄႈၾၢႆႇၵဵဝ်ႇၶွင်ႈ ၼႂ်းၸိုင်ႈထႆး လူင်းပိုၼ်ႉတီႈၵူတ်ႇထတ်းထူပ်းႁၼ် ယႃႈမဝ်းၵမ်တင်းၼမ် ၼႂ်းထမ်ႈၵဵင်းလၢဝ် ႁိမ်းလႅၼ်လိၼ်။

ဝၼ်းတီႈ 26/06/2019 သိုဝ်ႇၶၢဝ်ႇထႆးPBS ပိုၼ်ႇၽၢဝ်ႇဝႃႈၸဝ်ႈၼႃႈတီႈပလိၵ်ႈ ၾၢႆႇၽဵဝ်ႈမူၺ်ႉယႃႈမဝ်းၵမ်လႄႈ ၾၢႆႇၵဵဝ်ႇ ၶွင်ႈ ဝဵင်းၵဵင်းလၢဝ် လူင်းပိုၼ်ႉတီႈၵူတ်ႇထတ်း ႁိမ်းႁွမ်းဝၢၼ်ႈၼွင်တဝ်း၊ ဝၢၼ်ႈထမ်ႈၵႅပ်ႇ ဢိူင်ႇပိင်းၵူင်ႉ ၸႄႈဝဵင်းၵဵင်းလၢဝ် သေ ထူပ်းႁၼ်ထုင်ႈၸၢၼ်ႈ 64 ၸၢၼ်ႈ ၼႂ်းၼၼ်ႉမီး ယႃႈမႃႉ 5 လၢၼ်ႉ 4 သႅၼ်မဵတ်ႉလႄႈ ယႃႈဢႆႉသ် မွၵ်ႈ 185 ၵီႊလူဝ်ႊၵရမ်ႊ တီႈၼႂ်းထမ်ႈ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ။

ယႃႈမဝ်းၵမ်ဢၼ်တီႉၺွပ်းလႆႈပွၵ်ႈၵမ်းၼႆႉ ပဵၼ်ၶွင်ၽႂ် လုၵ်ႉတီႈလႂ်မႃးဢၼ်ဝႃႈၼၼ်ႉ ပႆႇႁူႉ ယူႇတီႈၸဝ်ႈၼႃႈတီႈသေ တေၸွမ်းႁႃတူဝ် ၸဝ်ႈၶွင်ယႃႈလႄႈ ၽူႈၵဵဝ်ႇၶွင်ႈ ပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ။

တီႈၼႂ်းမိူင်းၸိုင်ႈထႆးၼႆႉ ယူႇတီႈလူင်ပွင်ၸိုင်ႈထႆး ၶတ်းၸႂ်ၵူတ်ႇထတ်းတီႉၺွပ်းယႃႈမဝ်းၵမ်မႃးတႃႇသေႇ ။ ၶၢဝ်ႇငၢဝ်းတီႉၺွပ်းလႆႈယႃႈမဝ်းၵမ်ႈၵေႃႈ မီးယူႇၵူႈဝၼ်း။ ၵမ်ႈၼမ်ၼႄးဝႃႈ ပဵၼ်ယႃႈမဝ်းၵမ် ဢၼ်လုၵ်ႉတၢင်း မိူင်းႁူမ်ႈတုမ်မၢၼ်ႈမႃး။