ၼႂ်းၸိုင်ႈတႆးပွတ်းႁွင်ႇ လၢႆလၢႆၸႄႈဝဵင်း သိုၵ်းလူင်ပွင်ၸိုင်မၢၼ်ႈ တင်း သိုၵ်းၶၢင်၊ သိုၵ်းတဢၢင်း လႆႈပဵၼ်ပၢင်တိုၵ်းၵၼ်မႃး လၢႆလၢႆပွၵ်ႈ ဝႃႈၼႆ။

တႄႇဢဝ် ပီ 2018 လိူၼ်ၻီႊသႅမ်ႊပိူဝ်ႊ ဝၼ်းတီႈ 21 ထိုင် လိူၼ်ၵျုၼ်ႊ ဝၼ်းတီႈ 24 ပီ 2019 ၼႆႉ တပ်ႉသိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တႃႇၶၢဝ်းတၢင်း 6 လိူၼ် တႃႇ 5 တိူင်းသိုၵ်း ၸမ်တေၶွပ်ႈတဵမ် 6 လိူၼ် ။ ၵူၺ်းၵႃႈ ၼႂ်းမိူင်း တႆးပွတ်းႁွင်ႇ လၢႆလၢႆၸႄႈဝဵင်းတႄႉ သိုၵ်းမၢၼ်ႈတင်း သိုၵ်း TNLA ပဵၼ်ပၢင်တိုၵ်းၵၼ် ဢမ်ႇယွမ်း 10 ပွၵ်ႈ။ သိုၵ်းမၢၼ်ႈ တင်း သိုၵ်း KIA လႆႈပဵၼ် ပၢင်တိုၵ်းၵၼ် ဢမ်ႇယွမ်း မွၵ်ႈ 20 ပွၵ်ႈယဝ်ႉ ဝႃႈၼႆ။

ၸဝ်ႈႁၢၼ် မၢႆးဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈသိုဝ်ႇၶၢဝ်ႇ 7 day ဝႃႈ “ ၼႂ်းၸႄႈဝဵင်းၵူတ်ႉၶၢႆ ၼႂ်းလိူၼ်ၵျုၼ်ႊ ၼႆႉၵူၺ်း လႆႈပဵၼ်ပၢင်တိုၵ်းၵၼ်တင်းသိုၵ်းမၢၼ်ႈ ဢမ်ႇယွမ်း 10 ပွၵ်ႈယဝ်ႉ” ဝႃႈၼႆ။

ၸဝ်ႈသိုၵ်းလူင် ၼေႃႇပူး ၽူႈၶၢၼ်ပၢၵ်ႇ KIA လၢတ်ႈဝႃႈ “ သိုၵ်းၶၢင် တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ် တၢင်းမိူင်းတႆး ပွတ်းႁွင်ႇ၊ တီႈၸုမ်းဢူၺ်းလီပွတ်းႁွင်ႇ သိုၵ်းၵဝ်ႈၵၢင်ႉ၊ တဢၢင်းလႄႈ ၶၢင် ႁူမ်ႈၵၼ်ယူႇသဝ်း တူင်ႉၼိုင်ဝႆႉၸိူဝ်းၼၼ်ႉ ၼႂ်းမိူင်းၶၢင်တႄႉ ဢမ်ႇလႆႈပိုတ်းယိုဝ်းၵၼ်” ဝႃႈၼႆ။

ယူႇတီႈၾၢႆႇပွင်ႇၶၢဝ်ႇသိုၵ်းမၢၼ်ႈလၢတ်ႈတီႈ သိုဝ်ႇၶၢဝ်ႇ 7 day ဝႃႈ “ ၼႂ်းၸႄႈဝဵင်းၵူတ်ႉၶၢႆၼၼ်ႉ လႆႈပဵၼ်ပၢင်တိုၵ်းၵၼ် တင်းသိုၵ်းတဢၢင်း ၵူႈဝၼ်း။ ႁဝ်းၶႃႈလႆႈငိၼ်းၶၢဝ်ႇဝႃႈ မီးသိုၵ်းၶဝ်ႈမႃးတူင်ႉၼိုင်ၼႆ လႄႈ လႆႈလူင်းၵႂၢတ်ႇလၢင်ႉပိုၼ်ႉ တီႈသေ လႆႈတုမ်ႉတိူဝ်ႉၵၼ် လႆႈပဵၼ်ပၢင်တိုၵ်းတေႃႇၵၼ်” ဝႃႈၼႆ။

သိုၵ်းမၢၼ်ႈတင်း သိုၵ်းၶၢင် ၼႆႉ တႄႇဢဝ်သိုၵ်းမၢၼ်ႈ ပိုၼ်ၽၢဝ်ႇမႃးၶၢဝ်းတၢင်း ၸမ် 6 လိူၼ်ၼႆႉ သွင်ၾၢႆႇလႆႈပဵၼ်ပၢင်တိုၵ်းၵၼ် ဢမ်ႇယွမ်း 20 ပွၵ်ႈယဝ်ႉ ဝႃႈၼႆ။

ၶေႃႈမုလ်း – 7daydaily