Friday, March 29, 2024

ၸဝ်ႈႁႆႈၸဝ်ႈၼႃး လႃႈသဵဝ်ႈ တင်း သိုၵ်းမၢၼ်ႈ ႁူပ်ႉဢုပ်ႇၵၼ် လွင်ႈတီႈလိၼ် သူၼ်ႁႆႈၼႃး ဢၼ်သိုၵ်းႁုပ်ႈယိုတ်းဝႆႉ

Must read

ၸဝ်ႈႁႆႈ/ ၼႃး ၸႄႈဝဵင်းလႃႈသဵဝ်ႈ ႁူပ်ႉဢုပ်ႇၵၼ် တင်းတပ်ႉသိုၵ်းလူင်ပွင်ၸိုင်ႈမၢၼ်ႈ သွင်ၾၢႆႇဢုပ်ႇဢူဝ်း လွင်ႈတီႈလိၼ် သူၼ်ႁႆႈၼႃး ၵူၼ်းမိူင်း ဢၼ်တပ်ႉသိုၵ်းမၢၼ်ႈႁုပ်ႈယိုတ်းဝႆႉ ၸိူဝ်းၼၼ်ႉ။

Photo by – MP SaiOne Leng Kham/ၵူၼ်းမိူင်းလႄႈ သိုၵ်းမၢၼ်ႈ ပၢင်ႁူပ်ႉထူပ်း ဢုပ်ႇဢူဝ်း လွင်ႈတီႈလိၼ်သူၼ်ႁႆႈၼႃး ၵူၼ်းမိူင်းလႃႈသဵဝ်ႈ

ဝၼ်းတီႈ 25/06/2019 ယၢမ်းဝၢႆးဝၼ်း 1 မူင်း ထိုင် 3 မူင်း ၸဝ်ႈႁႆႈၸဝ်ႈၼႃး ၶိူဝ်းၼိမ်း – ၶိူဝ်းၶမ်း၊ ၽူႈၵွၼ်းၸႄႈဝဵင်း၊ ၸႄႈ တွၼ်ႈ၊ ၽူႈတႅၼ်း၊ ၵႅမ်ၽူႈၵွၼ်းတိူင်းသိုၵ်း လႃႈသဵဝ်ႈ ႁူပ်ႉဢုပ်ႇၵၼ်လွင်ႈတီႈလိၼ်သူၼ်ႁႆႈၼႃး တီႈလုမ်းၽူႈၵွၼ်း ၸႄႈ တွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ လႆႈဢုပ်ႇဢူဝ်းငူပ်ႉငီႉၵၼ်သေ ၸဝ်ႈႁႆႈ/ ၼႃးၵူၼ်းမိူင်း တုၵ်းယွၼ်းႁႂ်ႈပၼ်ၶိုၼ်း တီႈလိၼ်ၵူၼ်းမိူင်း ဢၼ်တပ်ႉသိုၵ်းႁုပ်ႈယိုတ်းဝႆႉ ၸိူဝ်းၼၼ်ႉ ဝႃႈၼႆ။

- Subscription -

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်ၼႆႉ လႆႈဢုပ်ႇသင်ၵၼ်ၽွင်ႈၼႆႉ ယူႇတီႈၵႅမ်ၽူႈၵွၼ်းတိူင်းသိုၵ်းလႃႈသဵဝ်ႈဝႃႈ တၢင်းၾၢႆႇၶဝ်ၵေႃႈ ႁႃလၢႆးတၢင်းတႃႇ တေယိုၼ်ႈမိုဝ်းပၼ်လႆႈ ၼႃႈလိၼ်တပ်ႉၶဝ် ႁႂ်ႈပေႃႈႁႆႈမႄႈၼႃးယူႇ။ ၵူၺ်းၵႃႈ ဢမ်ႇယဝ်ႉတီႈၵႅမ်ၽူႈၵွၼ်းတိူင်းသိုၵ်းလႄႈ တိူင်းသိုၵ်းၵူၺ်း မၼ်းတေလႆႈတၢင်ႇၶိုၼ်ႈတၢင်းၼိူဝ်ထႅင်ႈ လၢႆလၢႆၸၼ်ႉလႄႈ ႁဝ်းၶႃႈ မႃးႁႃလၢႆးလီ ယႃႇပေဢဝ်လၢႆး ၼႄ ၵၢင်ၸႂ်တေႃႇၵၼ်၊ ၵွင်လင်တေႃႇၵၼ် ႁႂ်ႈႁႃလၢႆးဝၢႆႇၼႃႈၸူးၵၼ်သေ မိူဝ်ႈၼႆႉ ပဵၼ်ဝၼ်းႁဝ်းၶႃႈ မႃးၵေႃႇသၢင်ႈလွင်ႈယုမ်ႇ ယမ်ၵၼ်ၵႂႃႇ ပွၵ်ႈတီႈ 1 မၼ်းၸဝ်ႈတႄႉ လၢတ်ႈၼႄၼင်ႇၼႆ” ဝႃႈၼႆ။

ၾၢႆႇတၢင်းတပ်ႉသိုၵ်းလၢတ်ႈဝႃႈ “ ၵူၼ်းၸိူဝ်းဢၼ်ဢမ်ႇၸႂ်ႈၸဝ်ႈႁႆႈၸဝ်ႈၼႃးဢၼ်တႄႉမၼ်းၵေႃႈၶဝ်ႈပႃးဝႆႉ” ဝႃႈၼႆ။

Photo by – MP SaiOne Leng Kham/ၵူၼ်းမိူင်းလႄႈ သိုၵ်းမၢၼ်ႈ ပၢင်ႁူပ်ႉထူပ်း ဢုပ်ႇဢူဝ်း လွင်ႈတီႈလိၼ်သူၼ်ႁႆႈၼႃး ၵူၼ်းမိူင်းလႃႈသဵဝ်ႈ

တီႈပၢင်ႁူပ်ႉထူပ်းဢုပ်ႇဢူဝ်းလွင်ႈတီႈလိၼ်သူၼ်ႁႆႈၼႃးၼႆႉ ယူႇတီႈၸဝ်ႈႁႆႈၸဝ်ႈၼႃး တုၵ်းယွၼ်းဝႃႈ တီႈလိၼ်ၸိူဝ်း ၼၼ်ႉ ႁႂ်ႈပၼ်ၵူၼ်းမိူင်းၶိုၼ်း၊ ႁႂ်ႈလႆႈၶဝ်ႈႁဵတ်းၵိၼ်ၽုၵ်ႇသွမ်ႈၼႂ်းမၼ်းၶိုၼ်း ၸဵမ်ၸိူဝ်းၼႆႉ။

ၸၢႆးဝၼ်းလႅင်းၶမ်း လၢတ်ႈဝႃႈ “ 2 ပႃႈ 2 ၾၢႆႇလႆႈႁူပ်ႉၵၼ်ၼႆႉ ဢမ်ႇမီးၶေႃႈတူၵ်းလူင်းၵၼ်သင်ၼႆသေတႃႉၵေႃႈ မၼ်းမီးလွင်ႈႁူပ်ႉထူပ်းၵၼ် ၸဵမ်ပိုင်းမၼ်းမႃးၵေႃႈ ဢမ်ႇတွၼ်ႉလႆႈထူပ်းၺႃးၽူႈမီးၸၼ်ႉမွၵ်ႈၼႆႉ။ ၵမ်းၵမ်းလႆႈၵႂႃႇၺႃး ၸွမ်းၸၼ်ႉပႃႈတႂ်ႈၶဝ်သေ လႆႈထဵင်မေႃးၵၼ်။ ယူႇတီႈတပ်ႉၵေႃႈသမ်ႉဝႃႈ ႁဝ်းဢမ်ႇပၼ်လႆႈ ဢမ်ႇယွမ်းလႆႈ ဝႃႈၼႆတိၵ်း တိၵ်း။ ၾၢႆႇၵူၼ်းဝၢၼ်ႈၵေႃႈ ဢမ်ႇၸႂ်ႈၼႆႉပဵၼ်လိၼ်ႁဝ်းဢိူဝ်ႈ ႁဵတ်းၼႆသေ ၽိတ်းၵၼ်၊ မေႃးၵၼ် ၸင်ႇပဵၼ်ပၼ်ႁႃယႂ်ႇ မႃးမွၵ်ႈၵႃႈၼႆႉ” ဝႃႈၼႆ။

ပၢင်ႁူပ်ႉထူပ်းဢုပ်ႇဢူဝ်း လွင်ႈတီႈလိၼ်သူၼ်ႁႆႈၼႃးၼႆႉ လႆႈဢုပ်ႇဢူဝ်းၵၼ် လွင်ႈတီႈလိၼ်ၼၼ်ႉ ပီႈၼွင်ႉဝၢၼ်ႈၶိူဝ်း ၼိမ်းၸဝ်ႈသူၼ် 48 ၵေႃႉ ၼႆႉၸုမ်းၼိုင်ႈ။ တီႈလိၼ်ၵူၼ်းဝၢၼ်ႈ ထႅင်ႈ 23 ၵေႃႉ ၸုမ်းၼိုင်ႈ။ ထႅင်ႈ 8 ၵေႃႉ ထႅင်ႈၸုမ်းၼိုင်ႈ ဢိၵ်ႇပႃးတင်း တီႈလိၼ်ပီႈၼွင်ႉဝၢၼ်ႈၶိူဝ်းၶမ်း ဝႃႈၼႆ။

ၸၢႆးဝၼ်းလႅင်းၶမ်း လၢတ်ႈဝႃႈ “ ယူႇတီႈၶႃႈၶဝ် ၽူႈတႅၼ်းၽွင်းၵေႃႈ လႆႈတၢင်ႇလၢတ်ႈပႃးၵႂႃႇၸွမ်းဝႃႈ မိူဝ်ႈၼႃးမႃး မီးသင်မႃးၵေႃႈႁဝ်းၶႃႈၶႂ်ႈမႃးငူပ်ႉငီႉ တင်းတပ်ႉ ယႃႇပေႁႂ်ႈလႆႈႁၼ်ၽိတ်းၵၼ် ၾၢႆႇတပ်ႉၵေႃႈ ယႃႇပေပိၵ်ႉ ၽၵ်းတူ၊ ပိုတ်ႇၽၵ်းတူ ပႂ်ႉႁပ်ႉၸဝ်ႈႁႆႈၸဝ်ႈၼႃးၵူၼ်းမိူင်းလႄႈ ၽူႈတႅၼ်းၽွင်းၶဝ် မႃးငူပ်ႉငီႉသေၵမ်း။ ၵွပ်ႈပိူဝ်ႈ ပီႈၼွင်ႉလႃႈ သဵဝ်ႈၼႆႉ မၼ်းမီးပၼ်ႁႃ လွင်ႈလိၼ်သူၼ်ႁႆႈလႄႈ လွင်ႈလိၼ်တပ်ႉသိမ်းၼႆႉ ၺႃးၵၼ်ၼမ်ၼႃႇ သူၸဝ်ႈယွၼ်ႇယၢၼ်း ပၼ်လႆႈၵႃႈႁိုဝ်ၵေႃႈႁဝ်းၶႃႈယိၼ်းၸူမ်းၵႃႈၼၼ်ႉ” ဝႃႈၼႆ။

Photo by – MP SaiOne Leng Kham/ၵူၼ်းမိူင်းလႄႈ သိုၵ်းမၢၼ်ႈ ပၢင်ႁူပ်ႉထူပ်း ဢုပ်ႇဢူဝ်း လွင်ႈတီႈလိၼ်သူၼ်ႁႆႈၼႃး ၵူၼ်းမိူင်းလႃႈသဵဝ်ႈ

“ယူႇတီႈၾၢႆႇတိူင်းသိုၵ်းမၢၼ်ႈၶဝ်တႄႉ ဝႃႈၶဝ်ၵေႃႈၶႂ်ႈႁႃလၢႆးလီ ဝူၼ်ႉဝႃႈတေႁဵတ်းႁိုဝ်။ မၢင်တီႈၼႆႉ ယွၼ်ႉမၼ်းပဵၼ် ၵၢပ်ႈပၢၼ် မိူဝ်ႈၵူႈပွၵ်ႈသိမ်းဝႆႉလႄႈ ဢမ်ႇၸႂ်ႈပဵၼ်ၵၢပ်ႈပၢၼ်တေႃႈလဵဝ်ၼႆႉသိမ်း။ ဢၼ်မႃးမႂ်ႇၼႆႉ တေသိမ်းတီႈလိၼ် ၼႆ ဢမ်ႇမီး။ ယွၼ်ႉဝႃႈလွင်ႈတပ်ႉသိုၵ်းၵဝ်ႇၼၼ်ႉ လိၼ်တပ်ႉလႄႈ လိၼ်ၵူၼ်းဝၢၼ်ႈ ယွၼ်ႉမၼ်းသူၼ်ႈသိၼ်ႈသၢၼ်ၵၼ် ဝႆႉလႄႈ တေၵူတ်ႇထတ်းသေ လွင်ႈၵူၼ်းမိူင်းတၢင်ႇယွၼ်းမႃးၸိူဝ်းၼၼ်ႉ တေတႅမ်ႈသေ တၢင်ႇၶိုၼ်ႈထႅင်ႈတၢင်းၼိူဝ်မူတ်း မူတ်း ပႂ်ႉထွမ်ႇတူၺ်းတၢင်းၼိူဝ်ၸီႉသင်ႇလူင်းမႃး” ၵႅမ်ၽူႈၵွၼ်းတိူင်းသိုၵ်း လႃႈသဵဝ်ႈတႄႉ တွပ်ႈလၢတ်ႈၼႄၵႂႃႇၼင်ႇၼႆ။

ယူႇတီႈတိူင်းသိုၵ်းလႃႈသဵဝ်ႈ ဢၼ်လႆႈယိုတ်းဢဝ်ဝႆႉတီႈလိၼ်ၵူၼ်းမိူင်းၼၼ်ႉ မီးတိုဝ်ႉတၢင်းတႃႇတေပွႆႇပၼ်ၵူၼ်းမိူင်း ၶိုၼ်း။ ၵူၺ်းၵႃႈ တေပွႆႇပၼ်လႆႈၵႃႈႁိုဝ် မွၵ်ႈႁိုဝ် ဢၼ်ဝႃႈၼၼ်ႉ ပႆႇၸၢင်ႈလၢတ်ႈၼႄလႆႈ ဝႃႈၼႆ။

လိူဝ်ၼၼ်ႉ ယူႇတီႈတိူင်းသိုၵ်းလႃႈသဵဝ်ႈ လႄႈ ၽူႈမီးပုၼ်ႈၽွၼ်း ၶႃႈႁၢပ်ႇၵၢၼ်လူင်ပွင်ၸိုင်ႈလႄႈ ၽူႈတႅၼ်း တေလူင်း ပိုၼ်ႉတီႈ ၵႂႃႇႁူပ်ႉထူပ်းၸွမ်းၸဝ်ႈႁႆႈၸဝ်ႈၼႃး တၢင်းဝၢၼ်ႈၶိူဝ်းၶမ်း ၼႂ်းဝၼ်းတီႈ 27 လိူၼ်ၼႆႉ ၵဵဝ်ႇၵပ်းလွင်ႈလိၼ်သူၼ် ႁႆႈၼႃးၼႆႉယဝ်ႉဝႃႈၼႆ။

မိူဝ်ႈဝၼ်းတီႈ 23/06/2019 ၼၼ်ႉ ယူႇတီႈၵူၼ်းမိူင်း ၼပ်ႉႁူဝ်ပၢၵ်ႇ ႁူမ်ႈၵၼ် ၼႄၵၢင်ၸႂ် တုၵ်းယွၼ်းတီႈလိၼ် တႃႇၽုၵ်ႇ သွမ်ႈၶိုၼ်း ၶွၼ်ႈတုမ်ၵၼ် တီႈဝတ်ႉၶိူဝ်းၼိမ်း။ ပဵၼ်ပီႈၼွင်ႉလၢႆၸၢဝ်းၶိူဝ်းလၢႆလၢႆဝၢၼ်ႈ မိူၼ်ၼင်ႇ မၢၼ်ႈဢၢႆႇ၊ ၶိူဝ်းၼိမ်း၊ သႅင်ၶၢႆႉ၊ ဢီႇ ၼၢႆး၊ သူၼ်ၵွႆ၊ ႁူဝ်ပိုၵ်ႉ၊ ၵွင်းၵေး၊ ၼႃးမူၼ်း၊ တႃႈပုင်ႇလႄႈ မၢၼ်ႈပဵင်း ၸဵမ်ၸိူဝ်းၼႆႉ။ လွင်ႈၼႆႉ ယူႇတီႈၵႅမ်ၽူႈ ၵွၼ်းတိူင်းသိုၵ်း လႃႈသဵဝ်ႈ မႃးတုၵ်းယွၼ်း ယႃႇႁႂ်ႈလႆႈၼႄၵၢင်ၸႂ် ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း