ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇၶေႃႈပိုၼ်ၽၢဝ်ႇ ၼႂ်းဝၼ်းသၢၼ်ၶတ်း ယႃႈမဝ်း ၵမ်လႄႈ ၵၢၼ်ၵႃႉၶၢႆၼွၵ်ႈမၢႆမီႈ ၵူႈမိူင်းမိူင်း ဝႃႈၼႆ။
မိူဝ်ႈၼႆႉ ဝၼ်းတီႈ 26/06/2019 ပဵၼ်ဝၼ်းသၢၼ်ၶတ်းၽဵဝ်ႈမူၺ်ႉယႃႈမဝ်းၵမ် လုမ်ႈၾႃႉသေ ယူႇတီႈၶွင်ႇသီႇဢဝ်ၶိုၼ်း ၸိုင်းတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇၶေႃႈပိုၼ်ၽၢဝ်ႇ ဢၼ်ၶွင်ႇသီႇဢဝ်ၶိုၼ်းၸိုင်ႈတႆး တမ်းဝၢင်းပေႃႇလသီႇ ၽဵဝ်ႈမူၺ်ႉယႃႈမဝ်းၵမ် တင်ႈတႄႇမိူဝ်ႈၵေႃႇတင်ႈ ၶွင်ႇသီႇဢဝ်ၶိုၼ်းၸိုင်ႈတႆးသေ လႆႈႁဵတ်းသၢင်ႈမႃး ၸွမ်းၼင်ႇပေႃႇလသီႇ ၽဵဝ်ႈမူၺ်ႉယႃႈမဝ်းၵမ် ဢၼ်တမ်းဝၢင်းဝႆႉၼၼ်ႉ တေႃႇထိုင်ဝၼ်းမိူဝ်ႈၼႆႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ RCSS/SSA ဢွၵ်ႇဝႆႉၼၼ်ႉ တင်းမူတ်း မီး 7 ၶေႃႈ။ ၼႂ်းၶေႃႈတီႈ 4 တႅမ်ႈဝႆႉဝႃႈ ၵၢၼ်တႃႇႁူမ်ႈမိုဝ်း ၵၼ် ၽဵဝ်ႈမူၺ်ႉယႃႈမဝ်းၵမ်ၼၼ်ႉ မီးဝႆႉၶေႃႈလႆႈၸႂ်ၵၼ်သွင်ၾၢႆႇၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ် ၼႂ်းၵႄႈၵၢင် RCSS/SSA လႄႈ လူင်ပွင်ၸိုင်ႈမိူင်းႁူမ်ႈတုမ် မိူင်းမၢၼ်ႈ၊ ဢိၵ်ႇလူၺ်ႈ ၼႂ်းၶေႃႈတူၵ်းလူင်းလႆႈၸႂ် NCA ၵၼ် (6) ၶေႃႈတီႈ (25) ၵ (6) ၼၼ်ႉသေတႃႉ ပႆႇၸၢင်ႈႁူမ်ႈမိုဝ်းၵၼ် ႁဵတ်းသၢင်ႈလႆႈႁႂ်ႈထိုင်တီႈ ဝႃႈၼႆ။
လိူဝ်ၼၼ်ႉ ယူႇတီႈ RCSS/SSA မီးၵၢင်ၸႂ်ၶႂ်ႈႁူမ်ႈမိုဝ်းၵၼ် ႁဵတ်းသၢင်ႈၵၢၼ်ၽဵဝ်ႈမူၺ်ႉယႃႈမဝ်းၵမ်လႄႈ ဢၼ်တီႉၺွပ်း လႆႈယႃႈမဝ်းၵမ် ဢႆႉသ် 30 ၵီႊလူဝ်ႊၵရမ်ႊ တီႈၼႂ်းၸႄႈဝဵင်းမိူင်းတူၼ်ၼၼ်ႉ ၸင်ႇလႆႈဢဝ်မွပ်ႈဢၢပ်ႈပၼ် ၾၢႆႇၽဵဝ်ႈမူၺ်ႉ ယႃႈမဝ်းၵမ် လူင်ပွင်ၸိုင်ႈ မိူဝ်ႈ ဝၼ်းတီႈ 8 လိူၼ်မေႊ 2019 ၼၼ်ႉ ဝႃႈၼႆ။
ၼႂ်းၶေႃႈပိုၼ်ၽၢဝ်ႇ ၶေႃႈတီႈ 5 တႅမ်ႈဝႆႉဝႃႈ“ မိူဝ်ႈဝၼ်းတီႈ 27-28/10/2012 ၼၼ်ႉ ႁဵတ်းပၢင်ၵုမ်ၵၼ်သၢမ်ၾၢႆႇ RCSS, UNODC လႄႈ CCDAC တီႈဝဵင်းတႃႈၶီႈလဵၵ်း၊ မီးဝႆႉၶေႃႈတူၵ်းလူင်းၵၼ် 9 ၶေႃႈသေတႃႉ တႃႇၽေႃႇၼမ်ႉၽေႃႇတူဝ် (ၼႄတူဝ်) ႁူမ်ႈၵၼ်ႁဵတ်းသၢင်ႈၼၼ်ႉၵေႃႈပႆႇၸၢင်ႈပဵၼ်မႃးလႆႈႁၢၼ်ႉတေႃႇဝၼ်းမိူဝ်ႈၼႆႉ ဝႃႈၼႆ။
ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လႆႈႁဵတ်းသၢင်ႈမႃးၼႂ်းပီ 2018-2019 သမ်ႉ မိူၼ်ၼင်ႇ ၽဵဝ်ႈသိမ်းလႆႈ ယႃႈမဝ်းၵမ် ယႃႈလမ် 17 ၵီႊလူဝ်ႊၵရမ်ႊ၊ ယႃႈၾိၼ်ႇၽိူၵ်ႇ 212.8 ၵီႊလူဝ်ႊၵရမ်ႇ၊ ယႃႈမ 40707 မဵတ်ႉ၊ ယႃႈ ဢႆႉသ် 30 ၵီႊလူဝ်ႊၵရမ်ႇ၊ တီႉၺွပ်းလႆႈ ၵူၼ်းၵႃႉၶၢႆယႃႈမဝ်းၵမ် 97 ၵေႃႉ။
လိူဝ်ၼၼ်ႉ မူၼ်ႉမႄးပူၵ်းပွင်ပၼ်တၢင်းယၢမ်ႈ ၵူၼ်းတိတ်းၸပ်းယႃႈမဝ်းၵမ် 855 ၵေႃႉ။ ၼႂ်းၼၼ်ႉ ၸၢႆး 841 ၵေႃႉလႄႈ ယိင်း 14 ၵေႃႉ။ လႆႈပၼ်ပိုၼ်ႉႁူႉၵႅတ်ႇၶႄယႃႈမဝ်းၵမ် တီႈၵူၼ်းမိူင်းလႄႈ ၵူၼ်းသိုၵ်းၼႂ်းပိုၼ်ႉတီႈၶွင်ႇသီႇဢဝ်ၶိုၼ်းၸိုင်ႈ တႆး ၵုမ်းၵမ်ဝႆႉၸိူဝ်းၼၼ်ႉ မီး 129 ပွၵ်ႈ။ ၵူၼ်းၶဝ်ႈႁူမ်ႈ ၸၢႆး 9,027 ၵေႃႉ၊ ယိင်း 5602 ၵေႃႉ ႁူမ်ႈ 14,629 ၵေႃႉ ဝႃႈၼႆ။
ၼွၵ်ႈလိူဝ်ၼၼ်ႉ RCSS/SSA လႆႈၸုတ်ႇၽဝ် ယႃႈမဝ်းၵမ် တီႈလွႆၵေႃႇဝၼ်း။
