ႁူင်းပွႆႇသဵင် MAP Radio FM 99 MHz ၸတ်းႁဵတ်းပၢင်သွၼ်ယုၵ်ႉမုၼ်းၼမ်ႉၵတ်ႉ ၽူႈၸတ်းလၢႆး ၵၢၼ် ပွႆႇသဵင် ႁႂ်ႈၽူႈၸတ်းလၢႆးၵၢၼ်မီးၼမ်ႉၵတ်ႉ ပိုၼ်ၽၢဝ်ႇသိုဝ်ႇၼင်ႇထုၵ်ႇမႅၼ်ႈၸိုဝ်ႈၸႂ်ႈ ၶိုတ်းတၼ်း ၶိုတ်းၵၢပ်ႈပၢၼ်။

ဝၼ်းတီႈ 20 – 21/06/2019 ႁူင်းပွႆႇသဵင် MAP Radio FM 99 MHz ဢၼ်ယူႇပႃႈတႂ်ႈ ၶူင်းၵၢၼ် ပၢႆးယူႇလီလႄႈ ပၼ်တၢင်းႁူႉႁႅင်းၵၢၼ်ၸၢဝ်းၶိူဝ်း မုလ်ၼိထိ MAP ၸတ်းႁဵတ်းပၢင်သွၼ်ယုၵ်ႉမုၼ်း ၼမ်ႉၵတ်ႉၽူႈၸတ်းလၢႆးၵၢၼ် မိူင်းၼင်ႇ လွင်ႈပၵ်းပိူင်သိုဝ်ႇ ၊ လွင်ႈတိုဝ်းၵမ်သိုဝ်ႇ၊ ငဝ်းလၢႆးသိုဝ်ႇ ယၢမ်းလဵဝ်၊ လွင်ႈတတ်းတေႃႇသဵင် ၊ လွၵ်းလၢႆးႁဵတ်း Facebook live   ၸိူဝ်းၼႆႉ ၽူႈပၼ်ပၢင် သွၼ်ပဵၼ် ၸၢႆးယွတ်ႈလႄႈ ၸၢႆးပီး ၸဝ်ႈၼႃႈတီႈ ၽူႈမီးပုၼ်ႈၽွၼ်းမုလ်ၼိထိ MAP မီးၽူႈၸတ်း လၢႆးၵၢၼ်မွၵ်ႈ 20 ၵေႃႉ ၶဝ်ႈႁူမ်ႈလဵပ်ႈႁဵၼ်း  ။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99MHz မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇဝႃႈ – “ သိုဝ်ႇဢၼ်ဝႃႈၼၼ်ႉ မၼ်းလမ်ႇလွင်ႈၼႃႇ ၵွပ်ႈၼၼ်လႄႈ ၵူၼ်းႁဵတ်းၵၢၼ်သိုဝ်ႇ တေလႆႈႁူႉပၵ်းပိူင် တေလႆႈမီးပၵ်းပိူင်၊  တေလႆႈၸွမ်းပၵ်းပိူင်။ ၵွၼ်ႇတေပိုၼ်ၽႄႈၶေႃႈမုလ်းၼၼ်ႉ လူဝ်ႇလႆႈထတ်း သၢင်လီလီ ၶေႃႈမုလ်းတႅတ်ႈၼႅတ်ႈယဝ်ႉၸင်ႇပိုၼ်ၽႄႈ ​ပေႃးပိုၼ်ၽႄႈၵႂႃႇယဝ်ႉ တေမီးၽွၼ်း လီၽွၼ်းၸႃႉၸိူင်ႉႁိုဝ်၊ တေၸၢင်ႈမီးၽွၼ်းတုမ်ႉယွၼ်ႈၸိူင်ႉႁိုဝ်ၸိူဝ်းၼႆႉ တၵ်းတေလႆႈၶိုၼ်း  ထတ်းသၢင်မူၼ်ႉမေး” ဝႃႈၼႆ ။

ၼင်ႇႁိုဝ်ၽူႈၸတ်းလၢႆးၵၢၼ် တေမီးၼမ်ႉၵတ်ႉၼၼ်ႉ တင်ႈတႄႇၵေႃႇတင်ႈႁူင်းပွႆႇသဵင်မႃး ယူႇတီႈ MAP Radio သေ ၸတ်းႁဵတ်းပၢင်သွၼ်ယုၵ်ႉမုၼ်းၼမ်ႉၵတ်ႉ ၽူႈၸတ်းလၢႆးၵၢၼ်မႃးယဝ်ႉ ဢမ်ႇယွမ်း 30 ပွၵ်ႈ ။

ၸၢႆးတုမ်ႇမွၵ်ႇႁၢၼ် ၽူႈၵွၼ်းႁွင်ႈၵၢၼ်သိုဝ်ႇ မုလ်ၼိထိ MAP လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈၸတ်းၼႆႉ ပိူဝ်ႈယုၵ်ႉမုၼ်းၼမ်ႉၵတ်ႉ ၽူႈၸတ်းလၢႆးၵၢၼ် ႁႂ်ႈမီးၼမ်ႉၵတ်ႉ တဵမ်ထူၼ်ႈ ၼင်ႇႁိုဝ်တေၸၢင်ႈပိုၼ်ၽႄၶေႃႈမုလ်း ထုၵ်ႇမႅၼ်ႈၸိုဝ်ႈၸႂ်ႈ ၶိုတ်းတၼ်း တႃႇပိုၼ်ၽႄႈ ထိုင်ၽူႈထွမ်ႇလၢႆးၵၢၼ်ႁဝ်း ” ဝႃႈၼႆ။

ႁူင်းပွႆႇသဵင် Mapradio FM 99.0 MHz ၼႆႉ ၵေႃႇတင်ႈမႃးမိူဝ်ႈ ဝၼ်းတီႈ 23 လိူၼ် ၾႅပ်ႊၿိဝ်ႊရီႊ 2004 ၽူႈၸတ်းလၢႆးၵၢၼ်ပဵၼ် ၸၢႆးသႅင်မိူင်း မင်းၵွၼ်း ၊ ၸၢႆးတုမ်ႇမွၵ်ႇႁၢၼ် ၊ ၼၢင်းၶမ်းဢိင်ႇ လႆႈၵႂႃႇႁူမ်ႈၸတ်းတီႈ FM 99.0 MHz ဢၼ်ဢႃးၸၢၼ်ဢူႊထႆႊဝၼ်ႊ ပဵၼ်ၸဝ်ႈၶွင်ဝႆႉ။

ထိုင်မႃး ပီ 2007 ၵေႃႈလႆႈသိုဝ်ႉဢဝ် ႁူင်းပွႆႇသဵင်သေ ပဵၼ်မႃးႁူင်းပွႆႇသဵင် Map radio ၵမ်းသိုဝ်ႈ ၸႂ်ႉတိုဝ်းၸိုဝ်ႈဝႃႈ သဵင်ထႅမ်ႁႅင်းမႂ်ႇ ၼႆတေႃႇထိုင်ယၢမ်းလဵဝ် ။