လုၵ်ႈၸုမ်း FPNCC 7 ၸုမ်း ဢုပ်ႇဢူဝ်းၵၼ် တီႈငဝ်ႈငုၼ်းသိုၵ်းဝႃႉ တီႈပၢင်သၢင်း တႃႇၶၢဝ်းတၢင်း 2 ဝၼ်း ဝႃႈၼႆ။

ဝၼ်းတီႈ 16-17/06/2019 ယူႇတီႈ ၶွမ်ႊမတီႊဢုပ်ႇဢူဝ်းၵၢၼ်မိူင်း မိူင်းႁူမ်ႈတုမ် (FPNCC) ႁူပ်ႉဢုပ်ႇၵၼ် တီႈငဝ်ႈငုၼ်း သိုၵ်းဝႃႉ (UWSA) ဝဵင်းပၢင်သၢင်း ၸိုင်ႈတႆးပွတ်းဢွၵ်ႇ။ ပိူင်လူင်မၼ်း ဢုပ်ႇဢူဝ်းၵၼ် ၵဵဝ်ႇလူၺ်ႈလွင်ႈ လုၵ်ႈၸုမ်း ပွတ်းႁွင်ႇ 4 ၸုမ်း မိူၼ်ၼင်ႇ ၶၢင်၊ တဢၢင်း၊ ရၶႅင်ႇလႄႈ ၵဝ်ႈၵၢင်ႉ တင်း လူင်ပွင်ၸိုင်ႈႁူပ်ႉဢုပ်ႇၵၼ် လွင်ႈတေလူင်းလၢႆး မိုဝ်းၵိုတ်းတိုၵ်းၵၼ်ၼၼ်ႉ ဝႃႈၼႆ။

တီႈပၢင်ၵုမ်ဢုပ်းဢူဝ်ႇၵၼ်ၼၼ်ႉ ၽူႈဢွၼ်ႁူဝ်ၸုမ်းယိပ်းၵွင်ႈၵၢင်ႇလုၵ်ႈၸုမ်း FPNCC တင်းမူတ်း ဢွၼ်ၵၼ်မႃးၶဝ်ႈ ႁူမ်ႈ။ ၵူၺ်းၵႃႈ လွင်ႈဢုပ်ႇဢူဝ်းၵၼ် လၢႆးႁူဝ်ယွႆႈမၼ်းတႄႉ ဢမ်ႇလႆႈႁၼ်ပိုၼ်ၽၢဝ်ႇဢွၵ်ႇမႃး ဝႃႈၼႆ။

ပၢင်ၵုမ်ၼႆႉ ယူႇတီႈၸုမ်းသိုၵ်းမိူင်းလႃး၊ ဝၢၼ်ႈႁႆးလႄႈ ဝႃႉ လႆႈတွင်ႈထၢမ် ၵၢင်ၸႂ်ၵၼ်ဝႃႈ ယူႇတီႈၸုမ်းဢူၺ်းလီပွတ်းႁွင်ႇ 4 ၸုမ်း ဢၼ်လႆႈႁူပ်ႉထူပ်းဢုပ်ႇဢူဝ်း တင်းလူင်ပွင်ၸိုင်ႈ လွင်ႈလႆႈၸႂ် တူၵ်းလူင်း တွၼ်ႈတႃႇ တေလူင်းလၢႆးမိုဝ်းၵိုတ်း တိုၵ်းၵၼ်ၼၼ်ႉ ငဝ်းလၢႆးမၼ်းပဵၼ်ဝႆႉၸိူင်ႉႁိုဝ်၊ လႆႈတူၵ်းလူင်းၵၼ် ၸိူင်ႉႁိုဝ် ၸဵမ်ၸိူဝ်းၼႆႉ သိုဝ်ႇၶၢဝ်ႇ RFA ဢွၵ်ႇဝႆႉ ၼင်ႇၼႆ။

ၼွၵ်ႈလိူဝ်ၼၼ်ႉ ၸုမ်းမိူင်းလႃး၊ ဝၢၼ်ႈႁႆးလႄႈ ဝႃႉတႄႉ ပဵၼ်ၸုမ်းဢၼ်လူင်းလၢႆးမိုဝ်းၸၼ်ႉမိူင်းႁူမ်ႈတုမ်ဝႆႉယဝ်ႉလႄႈ တွၼ်ႈတႃႇ ၸုမ်းၶၢင်၊ တဢၢင်း၊ ၵဝ်ႈၵၢင်ႉလႄႈ ရၶႅင်ႇ AA တႄႉ တိုၵ်ႉတေလူင်းလၢႆးမိုဝ်းၵိုတ်းတိုၵ်း ၸုမ်းတေႃႇၸုမ်း Bilateral ဝႃႈၼႆ။

ၸုမ်းဢူၺ်းလီပွတ်းႁွင်ႇ 7 ၸုမ်း ဢၼ်သိုၵ်းဝႃႉ ဢွၼ်ႁူဝ်ၶွတ်ႇၽွတ်ႈဝႆႉၶွမ်ႊမတီႊဢုပ်ႇဢူဝ်းၵၢၼ်မိူင်း မိူင်းႁူမ်ႈတုမ် FPNCC ၼၼ်ႉ မိူၼ်ၼင်ႇ ၸုမ်းမိူင်းလႃး၊ ဝၢၼ်ႈႁႆး၊ ဝႃႉ၊ တဢၢင်း၊ ၵဝ်ႈၵၢင်ႉ၊ ၶၢင်လႄႈ ရၶႅင်ႇ ၸိူဝ်းၼႆႉ။

ၶေႃႈမုလ်း – RFA