ၸဝ်ႈသၢင်ႇဢွၼ်ႇ 20 တူၼ်ပၢႆ ဢၼ်ယူႇတီႈတိူၵ်ႈသွၼ်လိၵ်ႈ(ထမ်း) တီႈဝိႁၢရ်ၼမ်ႉသိမ်ႇ ၸႄႈဝဵင်းသီႇပေႃႉၼၼ်ႉ ၵိုင်ႉ ၵၢင်ႉပဵၼ်တၢင်းပဵၼ် ၶီႈႁၢၵ်ႈသွင်ႁူၼ်သေ ထိုင်တီႈလႆႈၶိုၼ်ႈႁူင်းယႃ။

ဝၼ်းတီႈ 17/6/2019 ယၢမ်းၵၢင်ၶမ်ႈ 5 မူင်း ၸဝ်ႈသၢင်ႇဢွၼ်ႇ ဢႃယု မွၵ်ႈ 10 ၶူပ်ႇ ထိုင် 18 ၶူပ်ႇ တင်းမူတ်း 22 တူၼ် တီႈ တိူၵ်ႈသွၼ်လိၵ်ႈ(ထမ်း) ဝတ်ႉဝိႁၢရ်ၼမ်ႉသိမ်ႇ ၸႄႈဝဵင်းသီႇပေႃႉ ၵိုင်ႉၵၢင်ႉပဵၼ် တၢင်းပဵၼ် ၶီႈႁၢၵ်ႈသွင်ႁူၼ်သေ လႆႈသူင်ႇ ၶိုၼ်ႈႁူင်းယႃလူင် တီႈဝဵင်းသီႇပေႃႉ ဝႃႈၼႆ။

ၵူၼ်းမိူင်းပိုၼ်ႉတီႈ သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ဝတ်ႉဝိႁၢရ်ၼမ်ႉသိမ်ႇၼႆႉ သင်ၶရႁၢၼ်းမီးၼမ်၊ ၵူၺ်းၵႃႈ ၾၢႆႇ ၶဝ်ႈၽၵ်းသွမ်းတႄႉ ဢမ်ႇပေႃးတဵမ်ထူၼ်ႈ။ ယွၼ်ႉၼၼ်လႄႈ ပေႃးထိုင်တၢမ်းၶမ်ႈ 4 မူင်းၼၼ်ႉ ၸဝ်ႈသၢင်ႇဢွၼ်ႇၶဝ် လႆႈၵႂႃႇဝႆႉၵျႅင်ႉသွမ်းတီႈႁိူၼ်းပေႃႈဢွၵ်ႇမႄႈဢွၵ်ႇၶဝ် တီႈၼႂ်းဝၢၼ်ႈသေ ပေႃးထိုင်ၵၢင်ၼႂ် ယၢမ်း 8 မူင်းၼၼ်ႉ ၸင်ႇၵွႆႈ ၵႂႃႇၵဵပ်းၶိုၼ်း ၵျႅင်ႉသွမ်း ၸိူဝ်းၼၼ်ႉ ဢဝ်မႃးသုင်းသွမ်းဝၼ်း။ ၽၵ်းသွမ်းဢၼ်လိူဝ်ၵၢင်ဝၼ်းၼၼ်ႉ တႃႇႁႂ်ႈပဵၼ်ၶိုၼ်း သွမ်းၼႂ် မိူဝ်ႈၽုၵ်ႈထႅင်ႈၼႆသေ ၶိုၼ်း ဢဝ်ဢုၼ်ႇဝႆႉ၊ ပေႃးထိုင်ၵၢင်ၼႂ်မႃးၵေႃႈ ၶိုၼ်းဢွၼ်ၵၼ် ဢုၼ်ႇၵိၼ်ၶိုၼ်း။ တေႃႈ လဵဝ်ၼႆႉ ရႃႇသီႇဢုတုသမ်ႉမႆႈ၊ ၶဝ်ၸဝ်ႈသမ်ႉ လႆႈသုင်းၶဝ်ႈယဵၼ် ၽၵ်းယဵၼ်ၵေႃႈႁင်းမၼ်း၊ ပေႃးတွင်ႉမႆႈမႃး ၸဝ်ႈသၢင်ႇ မၢင်တူၼ်သမ်ႉ တေလႃႈလီႈဢဝ် ၵိၼ်မၢၵ်ႇမႆႉ မဵဝ်းဢၼ်ဢမ်ႇယၢမ်ႈၵိၼ်(ဢၼ်ပိူၼ်ႈဢမ်ႇၵိၼ်) ၸိူဝ်းၼၼ်ႉၵေႃႈပႃး ၵွပ်ႈ ၼႆလႄႈ လႆႈဢွၼ်ၵၼ်ၵိုင်ႉၵၢင်ႉ ပဵၼ် ၶီႈႁၢၵ်ႈသွင်ႁူၼ်သေ လႆႈၶိုၼ်ႈႁူင်းယႃလူင် တီႈသီႇပေႃႉဝႆႉ”ဝႃႈၼႆ။

တိူၵ်ႈသွၼ်လိၵ်ႈ/ထမ်း တီႈဝတ်ႉဝိႁၢရ်ၼမ်ႉသိမ်ႇၼႆႉ ပဵၼ်ဝတ်ႉဝႃး ဢၼ်ၵဝ်ႇၵႄႇၵိုၵ်းပိုၼ်းၼပ်ႉႁူဝ်ပၢၵ်ႇပီမိူင်း၊ ပဵၼ် ဝတ်ႉလူင်ဢၼ်ဢႃယု တဵမ် (100) ပီ။ ပဵၼ်ဝတ်ႉဢၼ်တၵ်ႉၵႃႇသတ်ႉထႃး ဢိူင်ႇၼမ်ႉသိမ်ႇ ၶိုၼ်ႈၵျွင်းလွင်းမွၵ်ႇၵူႈသိၼ် သေ ၽူႈၵွၼ်းဝတ်ႉသမ်ႉ ပဵၼ်ၸဝ်ႈတူၼ်ၶူးပၺ်ၺႃၽေႃးၵ။ တင်းမူတ်းမီးသင်ၶၸဝ်ႈ 40 တူၼ်။

ၸဝ်ႈသၢင်ႇတီႈဝိႁၢရ်ၼမ်ႉသိမ်ႇၼႆႉ ၵမ်ႈၽွင်ႈ ၸိူဝ်းသွၼ်လိၵ်ႈထမ်း/ပိတၵၢတ်ႈ တီႈၼႂ်းဝတ်ႉၵေႃႈမီး။ ၵမ်ႈၽွင်ႈ ၵႂႃႇၶိုၼ်ႈ ႁူင်းႁဵၼ်းလူင်ပွင်ၸိုင်ႈဢၼ်မီးဝႆႉၼႂ်းဝၢၼ်ႈၼမ်ႉသိမ်ႇၼၼ်ႉၵေႃႈမီး ဝႃႈၼႆ။

ထိုင်မႃး ဝၼ်းတီႈ 18/6/2019 ယၢမ်းတၢမ်းၶမ်ႈ 4 မူင်းၼၼ်ႉ ၸဝ်ႈသၢင်ႇ ၸိူဝ်းဢၼ်ၶႅၼ်းၸိုၼ်ႈ ဢမ်ႇမီးလွင်ႈမႆႈၸႂ်ၼၼ်ႉ လႆႈလူင်းႁူင်းယႃၶိုၼ်း 19 တူၼ်ယဝ်ႉ။ လိူဝ်ၼၼ်ႉ တိုၵ်ႉလႆႈသိုပ်ႇၶိုၼ်ႈႁူင်းယႃသေ ယူတ်းယႃတၢင်းပဵၼ်ဝႆႉယူႇ ဝႃႈၼႆ။