သိုၵ်းမၢၼ်ႈ လေႃႇယိုဝ်း သိုၵ်း TNLA ဢၼ်တူင်ႉၼိုင်ၵႂႃႇမႃးၸွမ်း ၸႄႈဝဵင်းၼမ်ႉသၼ်ႇ၊ မၢၼ်ႈတူင်ႈလႄႈ ၵူတ်ႉၶၢႆ တၢင်း ၸိုင်ႈ တႆးပွတ်းႁွင်ႇ တႄႇဢဝ် လိူၼ်ဢေႊပရိူဝ်ႊ ထိုင် လိူၼ်ၵျုၼ်ႊၼႆႉ ပဵၼ်ပၢင်တိုၵ်းၵၼ် ဢမ်ႇယွမ်း 8 ပွၵ်ႈယဝ်ႉ ဝႃႈၼႆ။
ဝၼ်းတီႈ 17/06/2019 သိုၵ်းမၢၼ်ႈတင်း သိုၵ်း TNLA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇ။ ၼႂ်းဝၼ်းလဵဝ်ၵူၺ်း ပဵၼ်ၵၼ် 3 ပွၵ်ႈ။ ယၢမ်းၵၢင်ဝၼ်း 11:40 မူင်း ထိုင် 12:30 မူင်း ပဵၼ်ၵၼ်ၵမ်းၼိုင်ႈ တီႈႁိမ်းဝၢၼ်ႈ ၼမ်ႉယူၼ်း။ ယၢမ်းဝၢႆးဝၼ်း 2:50 မူင်း ထိုင် 3:45 မူင်း ထႅင်ႈၵမ်းၼိုင်ႈ ၼႂ်းၵႄႈဝၢၼ်ႈၼမ်ႉယူၼ်းတင်း မၢၼ်ႈမႂ်ႇ။ လိူဝ် ၼၼ်ႉ ယၢမ်းၵၢင်ၶမ်ႈ 5:05 မူင်း ပဵၼ်ၵၼ်ထႅင်ႈတီႈႁိမ်းဝၢၼ်ႈမိူင်းပေႃႈ ၸဵမ်ၸိူဝ်းၼႆႉ။
ႁွင်ႈၵၢၼ်ပိုၼ်ၽၢဝ်ႇ ၶွင်သိုၵ်း TNLA ဢွၵ်ႇဝႆႉဝႃႈ “ သိုၵ်းမၢၼ်ႈ တင်း သိုၵ်း TNLA ပဵၼ်ပၢင်တိုၵ်းၵၼ်ၼႆႉ ယွၼ်ႉသိုၵ်း မၢၼ်ႈ ႁၢင်ႈသိုၵ်းလေႃႇယိုဝ်းတပ်ႉသိုၵ်း TNLA ” ဝႃႈၼႆ။
မိူဝ်ႈဝၼ်းတီႈ 16/6/2019 ယၢမ်းၵၢင်ၼႂ် 6:20 မူင်း ထိုင် 10:00 မူင်း ၼၼ်ႉၵေႃႈ သိုၵ်းမၢၼ်ႈ တပ်ႉမ 99 ပႃႈတႂ်ႈ ၶမယ 430 ပဵၼ်ပၢင်တိုၵ်းၵၼ် တင်း သိုၵ်း TNLA တီႈၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၵမ်းၼိုင်ႈ။ ယၢမ်း 10:50 မူင်းထိုင် 11:10 မူင်း ထႅင်ႈၵမ်းၼိုင်ႈ ဝႃႈၼႆ။
ၼႂ်းလုၵ်ႈလိူၼ်ၵျုၼ်ႊၼႆႉၵူၺ်း သိုၵ်းမၢၼ်ႈ တင်း သိုၵ်း TNLA ပဵၼ်ပၢင်တိုၵ်းၵၼ် ဢမ်ႇယွမ်း 5 ပွၵ်ႈယဝ်ႉ။ ၾၢႆႇၼိုင်ႈၵေႃႈ သိုၵ်းမၢၼ်ႈၼႆႉပိုၼ်ၽၢဝ်ႇဝႆႉဝႃႈ သိုပ်ႇၵိုတ်းတိုၵ်းထႅင်ႈ ၾၢႆႇလဵဝ် တႃႇၶၢဝ်းတၢင်း 60 ဝၼ်း(2 လိူၼ်) တႄႇဢဝ် ဝၼ်းတီႈ 30 လိူၼ်ဢေႊပရိူဝ်ႊ 2019 တေႃႇထိုင် 30 ၵျုၼ်ႊ 2019။ ၵူၺ်းၵႃႈ သိုၵ်းမၢၼ်ႈ တင်း သိုၵ်း TNLA ပဵၼ်ပၢင်တိုၵ်းၵၼ် ဢမ်ႇ ယွမ်း 8 ပွၵ်ႈယဝ်ႉ ဝႃႈၼႆ။
သိုၵ်း TNLA ၼႆႉ ပဵၼ်လုၵ်ႈၸုမ်း ၸုမ်းဢူၺ်းလီပွတ်းႁွင်ႇ 7 ၸုမ်း ဢၼ်တပ်ႉသိုၵ်း UWSA ဢွၼ်ႁူဝ်ဝႆႉ FPNCC ၼၼ်ႉ။ မိူဝ်ႈ ၼႂ်းလိူၼ်မၢတ်ႊၶျ်ၼၼ်ႉ သိုၵ်းမၢၼ်ႈ၊ လူင်ပွင်ၸိုင်ႈလႄႈ ၸုမ်းဢူၺ်းလီ ပွတ်းႁွင်ႇ 4 ၸုမ်း၊ ၸုမ်း KIO၊ သိုၵ်း TNLA၊ သိုၵ်း MNDAA လႄႈ သိုၵ်း AA တေႁူပ်ႉဢုပ်ႇဢူဝ်းၵၼ် လွင်ႈၵိုတ်းတိုၵ်းၵၼ်ၼႆသေ ငူပ်ႉငီႉၵၼ် လွင်ႈဢွင်ႈတီႈတေ ၸတ်း ဢမ်ႇလႆႈလႄႈ ထိုင်ယၢမ်းလဵဝ် ပႆႇပဵၼ်ၸတ်း ဝႃႈၼႆ။
