ၾၢႆႇပလိၵ်ႈၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉလႆႈ ယႃႈမဝ်းၵမ် တင်းၼမ် ၼႂ်းၸိုင်ႈတႆး လၢႆလၢႆတီႈ ၵမ်ႈၼမ် ဢမ်ႇတီႉလႆႈၸဝ်ႈၶွင် ၵႃႈၶၼ်ၼပ်ႉႁူဝ်သႅၼ်လၢၼ်ႉ။
ဝၼ်းတီႈ 17/6/2019 ယၢမ်းဝၢႆးဝၼ်းမွၵ်ႈ 1 မူင်းၼၼ်ႉ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် မၢႆ 29 မိူင်းသၢတ်ႇ လႆႈၶဝ်ႈၵူတ်ႇ ထတ်း ႁိူၼ်းၵူၼ်းဝၢၼ်ႈလင်ၼိုင်ႈ တီႈဝၢၼ်ႈမႄႈၵူၵ်း (ဝၢၼ်ႈမႂ်ႇ ဢႃးၶႃႇ) တီႈၸႄႈဝဵင်းမိူင်းသၢတ်ႇ ၸိုင်ႈတႆး ပွတ်းဢွၵ်ႇ ၶူင်း။ ၵူတ်ႇထတ်းလႆႈ ယႃႈမႃႉ 2,850,000 မဵတ်ႉ၊ ယႃႈၾိၼ်ႇၽိူၵ်ႇ 14.4 ၵီႊလူဝ်ႊ၊ ၵွင်ႈၵၢင်ႇ 15 လဝ်းလႄႈ မၢၵ်ႇမိုဝ်ႈၸိုၼ်း ယၢမ်း ၸဵမ်ၸိူဝ်းၼႆႉ။
လိူဝ်ၼၼ်ႉဢမ်ႇၵႃး လႆႈလူင်းၵူတ်ႇထတ်း တီႈၼႂ်းသူၼ်ၵူၼ်းဝၢၼ်ႈ တီႈဝၢၼ်ႈပူႇၼႃးၵူဝ် ၸႄႈဝဵင်းမိူင်းသၢတ်ႇထႅင်ႈ တီႉ လႆႈ ယႃႈၵႃႊၽေႊဢိၼ်ႊ 66 ၵီႊလူဝ်ႊ၊ သူဝ်ႇတီႇယမ်ႇႁၢႆႇတရွၵ်ႉသၢႆႉ 264 ၵီႊလူဝ်ႊ၊ ဢႅတ်ႉသိတ်ႉ 6 လိတ်ႉ၊ ႁၢႆႇတရူဝ်ႇ ၵလူဝ်ႇရိတ်ႉ ဢႅတ်ႉသိတ်ႉ 40 လိတ်ႉ ၸဵမ်ၸိူဝ်းၼႆႉထႅင်ႈ ဝႃႈၼႆ။
မိူဝ်းဝၼ်းတီႈ 17/6/2019 ယၢမ်းဝၢႆးဝၼ်းမွၵ်ႈ 6 မူင်းပၢႆၼၼ်ႉ ပလိၵ်ႈၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ၶဝ်ႈၵူတ်ႇ ထတ်းႁိူၼ်းၵူၼ်းဝၢၼ်ႈလင်ၼိုင်ႈ ယႃႈမႃႉသႂ်ႇဝႆႉၼႂ်းထူင်ပႃး လုၵ်ႈၼိုင်ႈသေ တင်းမူတ်း 5,720 မဵတ်ႉ (မႅၼ်ႈငိုၼ်း 57.2 သႅၼ်ပၢႆ။
ဢၼ်ပလိၵ်ႈတီႉလႆႈၸိူဝ်းၼႆႉ လိူဝ်သေတီႉလႆႈတီႈၾၢႆၶုၼ်ယဝ်ႉၼၼ်ႉ မိူဝ်ႈဝၼ်းတီႈ 18/6/2019 ယၢမ်းဝၢႆးဝၼ်း 1:50 မူင်း တီႈလႆႈထႅင်ႈယႃႈမႃႉ 3,555 မဵတ်ႉ (မႅၼ်ႈငိုၼ်း 71.1 သႅၼ်းပျႃး) တီႈသီႇပေႃႉ။ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ မိူဝ်ႈယၢမ်း ၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ တီႉလႆႈယႃႈမႃႉ 26,000 မဵတ်ႉ(မႅၼ်ႈငိုၼ်း 260 သႅၼ်ပျႃး) လႄႈ ၾူၼ်း 2 လုၵ်ႈ တီႈၸႄႈ ဝဵင်းတူၼ်ႈတီးထႅင်ႈ ဝႃႈၼႆ။
ဝၼ်းတီႈ 14/06/2019 ယၢမ်းဝၢႆးဝၼ်း 3 မူင်း ပလိၵ်ႈၸႄႈဝဵင်းတႃႈၶီႈလဵၵ်း ၵူတ်ႇထတ်းထူပ်းႁၼ် ယႃႈမဝ်းၵမ်လႄႈ ၶိူင်ႈ ၵွင်ႈၵၢင်ႇ ဢၼ်သႂ်ႇထူင်ဝႆႉ 21 ထူင် ၵွင်ပႅတ်ႈဝႆႉတီႈႁိမ်းၼမ်ႉႁွင်ႈသေ ဢဝ်ၵိင်ႇမႆႉ/ ၽိူဝ်မႆႉ ႁူမ်ႇဝႆႉ ႁိမ်းၸမ်ဝၢၼ်ႈပႃႇၶႃး ၸႄႈ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၼႂ်းထူင်ၼၼ်ႉ ၵူတ်ႇထတ်းထူပ်းႁၼ် ယႃႈမႃႉ 42.54 သႅၼ်မဵတ်ႉ( မႅၼ်ႈငိုၼ်း 42,540 သႅၼ်ပျႃး)၊ ယႃႈၽွင်ၶၢဝ် ၼမ်ႉၼၵ်း 1.9 ၵီႊလူဝ်ႊ(မႅၼ်ႈငိုၼ်း 190 သႅၼ်ပျႃး)၊ ႁူဝ်ၸိူဝ်ႉယႃႈ“ၵႅတ်ႉတမိၼ်း” 900 ၵရမ်ႇ (မႅၼ်ႈငိုၼ်း 90 သႅၼ်ပျႃး)။ ယႃႈၾိၼ်ႇ 5 ၵီႊလူဝ်ႊ (မႅၼ်ႈငိုၼ်း 600 သႅၼ်ပျႃး)။
လိူဝ်ၼၼ်ႉ တီႉလႆႈပႃးထႅင်ႈ ၵွင်ႈ 9 လဝ်း၊ မႅၵ်ႉၵွင်ႈ 8 ဢၼ်၊ မၢၵ်ႇၵွင်ႈ 19,279 လုၵ်ႈလႄႈ ၸၢၵ်ႈလၢတ်ႈ 4 လုၵ်ႈ။
ၶေႃႈမုလ်း – CCDAC Myanmar
