ၽႅၼ်ႇလိၼ်ဝႆ တၢင်းႁႅင်း 3.5 ရိၵ်ႊတိူဝ်ႊ ၼႂ်းၸႄႈဝဵင်းၼမ်ႉၸၢင် လွင်ႈၵူၼ်းမၢတ်ႇၸဵပ်း လူႉတၢႆ ဢမ်ႇမီး။
ဝၼ်းတီႈ 16/6/2019 ယၢမ်းၵၢင်ဝၼ်း 11 မူင်းပၢႆ 26 မိၼိတ်ႉ 2 ၸၵၼ်ႉၼၼ်ႉ ၽႅၼ်ႇလိၼ်ဝႆ ၼႂ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တၢင်းၾၢႆႇဢွၵ်ႇဝဵင်းၼမ်ႉၸၢင် ယၢၼ်ဝဵင်းမွၵ်ႈ 36 လၵ်း။ တၢင်းႁႅင်း 3.5 ရိၵ်ႊ တိူဝ်ႊ ဝႃႈၼႆ။
ႁွင်ႈၵၢၼ်ၾၢႆႇၾိင်ႈၾႃႉရႃႇသီႇ ဢွၵ်ႇဝႆႉဝႃႈ “ သုၼ်ၽႅၼ်ႇလိၼ်ဝႆၼႆႉ မီးတၢင်းၾၢႆႇဢွၵ်ႇဝဵင်းၼမ်ႉၸၢင် ယၢၼ်ဝဵင်းမွၵ်ႈ 36 လၵ်း။ တၢင်းႁဵင်း 3.5 ရိၵ်ႊတိူဝ်ႊ ပဵၼ်ၽႅၼ်ႇလိၼ်ဝႆ ဢမ်ႇပေႃးႁၢဝ်ႈႁႅင်း” ဝႃႈၼႆ။
လိူဝ်ၼၼ်ႉ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ယၢမ်းၵၢင်ဝၼ်းၼၼ်ႉ တီႈၸႄႈဝဵင်းၽိဝ်း တိူင်းပႃႇၵိူဝ်ၵေႃႈ ၽႅၼ်ႇလိၼ်ဝႆ တၢင်းႁႅင်း 3.3 ရိၵ်ႊတိူဝ်ႊ ဝႃႈၼႆ။
ၼွၵ်ႈလိူဝ်ၼၼ်ႉ တီႈမိူင်းၶႄႇ ၸႄႈမိူင်း သီးၶျႂၼ်း ဝဵင်းယီႇပိင်း ပွတ်းၸဵင်ႇၸၢၼ်းဝၼ်းတူၵ်း မိူင်းၶႄႇၼၼ်ႉၵေႃႈ မိူဝ်ႈ ဝၼ်းတီႈ 17/6/2019 ယၢမ်းၵၢင်ၶိုၼ်ႈမွၵ်ႈ 9 မူင်းပၢႆ( မိူင်းၶႄႇ) ၼၼ်ႉ ၽႅၼ်ႇလိၼ်ဝႆႁႅင်းသေ မီးၵူၼ်းလူႉတၢႆ 12 ၵေႃႉ တီႈယူႇတၼ်းသဝ်း ႁိူၼ်းယေး၊ ႁွင်ႈသဝ်း လႆႈလူႉလႅဝ်၊ လူႉသုမ်းတင်းၼမ်လၢႆ၊ မၢတ်ႇၸဵပ်း 134 ၵေႃႉ။
