ၸဝ်ႈႁႆႈၸဝ်ႈၼႃႈ ၼမ်ႉၶမ်း ၼႄၵၢင်ၸႂ်တေႃႇ ၽူႈၵွၼ်းၾၢႆႇၽုၵ်ႇသွမ်ႈၸႄႈဝဵင်း ပၼ်ၵႂၢမ်းမၼ်ႈယဝ်ႉသေ ဢမ်ႇႁဵတ်း ၸွမ်း ဝႃႈၼႆ။

ဝၼ်းတီႈ 18/6/2019 ယၢမ်းၵၢင်ၼႂ် 9 မူင်း ၸဝ်ႈႁႆႈၸဝ်ႈၼႃး ၵူၼ်းမိူင်းၼမ်ႉၶမ်း တေၸတ်းႁဵတ်း ပၢင်ႁူပ်ႉထူပ်းၸဝ်ႈႁႆႈ ၸဝ်ႈၼႃး တီႈလုမ်းထဵင်ႁႆႈထဵင်ၼႃး ၶိုၵ်ႉတွၼ်း(ၸၶၢၼ်း 3) တီႈပွၵ်ႉတႂ်ႈ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇၼၼ်ႉ ယွၼ်ႉၽူႈၵွၼ်းၾၢႆႇၽုၵ်ႇသွမ်ႈၸႄႈဝဵင်း ႁႄႉႁၢမ်ႈဢမ်ႇပၼ်ၶႂၢင်ႉၸတ်းႁဵတ်းၼႆသေ ၸဝ်ႈႁႆႈၸဝ်ႈၼႃး ႁူမ်ႈၵၼ်လုၵ်ႉ ႁိုၼ်ႇၼႄၵၢင်ၸႂ် တေႃႇၽူႈၵွၼ်းၸႄႈဝဵင်း ဝႃႈၼႆ။

ၸၢႆးဢွင်ႇမိၼ်ႇ ၽူႈၼမ်းၼႂ်း ၸုမ်းၸဝ်ႈႁႆႈၸဝ်ႈၼႃး ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ တႃႇႁဝ်းၶႃႈ တေ ႁဵတ်းပၢင်ၵုမ်ၼႆႉ ႁဝ်းၶႃႈယိူင်းဢၢၼ်းဝႆႉ တႃႇတေႁႂ်ႈလႆႈၽိုၼ်ဝႂ် 7 (ပုံစံ ၇) တီႈႁိမ်းၼမ်ႉၶမ်း၊ ႁိမ်းၶွပ်ႇဝဵင်းလႄႈသင်၊ ၼႂ်း ဝၢၼ်ႈၼႂ်းသူၼ် ၼႂ်းပွၵ်ႉၼႂ်းယွမ်ႇ ၸိူဝ်းၼႆႉ ၸိူဝ်းပႆႇလႆႈ ၽိုၼ်ဝႂ် 7 ၼၼ်ႉ။ မိူဝ်ႈပူၼ်ႉမႃးၼၼ်ႉ တႃႇတေပဵၼ်ဢွင်ႈႁိူၼ်း ၼၼ်ႉ ပိူၼ်ႈမႃးတႅၵ်ႈဝႆႉ မိူဝ်ႈ 1994 ယဝ်ႉ ႁဝ်းၶႃႈၶိုၼ်းမႄးယွၼ်း ႁႂ်ႈလႆႈပဵၼ်ၽိုၼ်ဝႂ် 7 ၵႂႃႇ ႁဝ်းၶႃႈၶိုၼ်းတေဢုပ်ႇၵုမ်ၵၼ်။ ၶႂ်ႈႁႂ်ႈသပ်းလႅင်းပၼ်။ မိူဝ်ႈပူၼ်ႉမႃး ဝၼ်းတီႈ 5 လိူၼ်မၢတ်ႉၶျ် 2019 ၼၼ်ႉ ၸွမ်ၽွင်းလူင်မိူင်းတႆး မႃးပၼ်ၶႂၢင်ႉ ႁႂ်ႈႁဵတ်း ပၼ် ၽိုၼ်ဝႂ် 7 တီႈၸႄႈဝဵင်းၼမ်ႉၶမ်းၼႆသေ ၵမ်းၼႆႉႁဝ်းၶႃႈၸင်ႇတေၸတ်းႁဵတ်းပၢင်ၵုမ်ၵႂႃႇၸိူင်ႉၼႆၵူၺ်း” ဝႃႈၼႆ။

ၸဝ်ႈႁႆႈၸဝ်ႈၼႃး – တေဢွၼ်ၵၼ်ၵႂႃႇႁဵတ်းတီႈလုမ်းထဵင်ႁႆႈထဵင်ၼႃးၶိုၵ်ႉတွၼ်း ၸၶၢၼ်း 3 ပွၵ်ႉတႂ်ႈ။ ၵူၺ်းၵႃႈၽူႈၵွၼ်း ၾၢႆႇၽုၵ်ႈသွမ်ႈၸႄႈဝဵင်းဝႃႈ ဢမ်ႇပၼ်လႆႈ လႄႈၸင်ႇလႆႈၼႄၵၢင်ၸႂ် ဝႃႈၼႆ။

ပေႃးဝႃႈဢမ်ႇပၼ်လႆႈၼႆ ႁဝ်းပေႃးလႆႈမွၵ်ႇဝႆႉပီႈၼွင်ႉယဝ်ႉ။ ၵမ်းၼႆႉ ႁဝ်းၵေႃႈဝႃႈ ဢမ်ႇပဵၼ်သင် ဢမ်ႇပၼ်ႁဵတ်းပၢင်ၵုမ် ၵေႃႈ ႁႂ်ႈႁဝ်းၶႃႈ လႆႈၵႂႃႇၶႂ်ႈၼႄ ပီႈပီႈၼွင်ႉၼွင်ႉႁဝ်းၶႃႈတီႈၼႂ်းလုမ်းမၼ်းလႄႈ ပိုတ်ႇၵၢၵ်ႇသေႃးပၼ်ႁဝ်း။ ႁဝ်းၶႃႈတႄႉ လႆႈတုၵ်းယွၼ်းၼင်ၼႆ။ ၵမ်းၼႆႉ ယူႇတီႈၾၢႆႇၽူႈၵွၼ်းၾၢႆႇၽုၵ်ႇသွမ်ႈ ၸႄႈဝဵင်း ဢူးဢွင်ႇသူဝ်းဢူးဝႃႈ ဢမ်ႇၸၢင်ႈပိုတ်ႇ ပၼ်လႆႈ ယူႇတီႈ တၢင်းၼိူဝ်ဢမ်ႇပၼ်ပိုတ်ႇ။ ႁဝ်းၶႃႈၵေႃႈ ပေႃးသူဢမ်ႇပိုတ်ႇပၼ် ႁဝ်းတေလုၵ်ႉႁိုၼ်ႇၼႆ မၼ်းၵေႃႈဝႃႈ ၶႂ်ႈလုၵ်ႉႁိုၼ်ႇၵေႃႈ ႁိုၼ်ႇ ၶႃႈဢမ်ႇၸၢင်ႈႁဵတ်းႁိုဝ် ၼႆလႄႈ ႁဝ်းၶႃႈလႆႈ လုၵ်ႉႁိုၼ်ႇဝႃႈ – ၽူႈၵွၼ်းၾၢႆႇၽုၵ်ႇသွမ်ႈၸႄႈဝဵင်း ဢမ်ႇပိုတ်ႇၽၵ်းတူထဵင် ၼႃးပၼ်ႁဝ်း ဢမ်ႇမီးၵတိ။ မိူဝ်ႈဝႃး လၢတ်ႈပိူင်ၼိုင်ႈ၊ မိူဝ်ႈၼႆႉ လၢတ်ႈပိူင်ၼိုင်ႈ ဝႃႈၼႆ။

ၸၢႆးဢွင်ႇမိၼ်ႇ လၢတ်ႈဝႃႈ “ တွၼ်ႈတႃႇႁဝ်းၶႃႈ တေႁဵတ်းပၢင်ၵုမ်မိူဝ်ႈၼႆႉ ႁဝ်းၶႃႈလႆႈတၢင်ႇလိၵ်ႈဝႆႉတီႈၾၢႆႇၽုၵ်ႇသွမ်ႈၶဝ် ၸဵမ်မိူဝ်ႈဝႃး 17/6/2019 ၶဝ်ႁၢမ်ႈသီးဝႆႉဝႃႈ တႃႇတေၵႂႃႇႁဵတ်းပၢင်ၵုမ်တီႈလုမ်းထဵင်ႁႆႈထဵင်ၼႃး ၶိုၵ်ႉတွၼ်း ၸၶၢၼ်း 3 ၼၼ်ႉ မၼ်းဝူၺ်ႇႁင်ႈၽႅဝ် တေပႆႇပႃႈၶႅမ်ႉလႅပ်ႈလႄႈ ၵွပ်ႈပိူဝ်ႈၼႆ ၶႂ်ႈႁႂ်ႈၵႂႃႇႁဵတ်းတီႈလုမ်းၽုၵ်ႇသွမ်ႈၶဝ်။ ႁဝ်းၵေႃႈဝႃႈ တီႈဢွင်ႈပၢင်ၵုမ်ၼၼ်ႉႁဝ်းၵႂႃႇၽဵဝ်ႈဝႆႉမူတ်းယဝ်ႉ မၼ်းဢမ်ႇပဵၼ်သင်ႁဝ်းတေၵႂႃႇႁဵတ်းတီႈၼၼ်ႈၵူၺ်း”ဝႃႈၼႆ။

ၽိူဝ်ႇထိုင်မႃး မိူဝ်ႈၼႆႉ ယၢမ်းၵၢင်ၼႂ် 9 မူင်း ၽူႈၵွၼ်းၾၢႆႇၽုၵ်ႇသွမ်ႈၸႄႈဝဵင်း ဢမ်ႇမႃးပိုတ်ႇၵၢၵ်ႇသေႃး ပၼ်ၶႂၢင်ႉ ၶဝ်ႈၸႂ်ႉ ၼႂ်းဢွင်ႈတီႈလုမ်း ထဵင်ႁႆႈထဵင်ၼႃး ၶိုၵ်ႉတွၼ်း ၸၶၢၼ်း 3 ပွၵ်ႉတႂ်ႈ ၸႄႈဝဵင်းၼမ်ႉၶမ်း ဝႃႈၼႆ။

ဝၢႆးသေ ၸဝ်ႈႁႆႈၸဝ်ႈၼႃး လုၵ်ႉႁိုၼ်ႇၼႄၵၢင်ၸႂ်ယဝ်ႉၼၼ်ႉ ၶိုၼ်းသိုပ်ႇၵႂႃႇႁဵတ်းပၢင်ၵုမ်ၵၼ်တီႈထဵင်ၼႃး ႁူဝ်ပဝ်ႈ ၸုမ်းၸဝ်ႈႁႆႈၸဝ်ႈၼႃး လုင်းၸၢႆးယီႈထုၼ်းသေ ဢုပ်ႇဢူဝ်းၵၼ် လႆႈၶေႃႈတႅပ်းတတ်း ၵႂႃႇ 3 ၶေႃႈ။

1) ဢၼ်ၾၢႆႇၸႄႈဝဵင်းတုၵ်းယွၼ်းၶႂ်းမႄးထဵင် (ၸၶၢၼ်း 3) ၼၼ်ႉ ၵူၼ်းမိူင်းတိုၼ်းတေဢမ်ႇပၼ်မႄး၊ တေသၢၼ် ၶတ်း။

2) ၼင်ႇႁိုဝ် ၸၶၢၼ်း 3 ၼၼ်ႉ တေပဵၼ်ၶွင်ၸဝ်ႈႁႆႈၸဝ်ႈၼႃး ၼမ်ႉၶမ်းၶိုၼ်း တေတုၵ်းယွၼ်း။

3) သင်ၸိူဝ်ႉဝႃႈ ၸၶၢၼ်း 3 ၼၼ်ႉ ဢမ်ႇလႆႈၶိုၼ်းၸိုင် – ၵူၼ်းဝၢၼ်ႈၵူၼ်းမိူင်းၼမ်ႉၶမ်း တင်းမူတ်း တေလုၵ်ႉႁိုၼ်ႇ သၢၼ်ၶတ်း ၸဵမ်ၸိူဝ်းၼႆႉ ဝႃႈၼႆ။