ၸုမ်းလုၵ်ႈဢွၼ်ႇၸၢႆးၸုမ်းၼိုင်ႈ တီႈဝဵင်းၵဵင်းမႆႇ ယိပ်းလႅဝ်းသႃႊမူႊရႆႊသေ ၾၼ်းၵူၼ်းဢွၵ်ႇဢႅဝ်ႇၵၢင်ၶိုၼ်း ၾၼ်းၺႃးလုၵ်ႈႁဵၼ်းတၢႆ 2 ၵေႃႉ။
ဝၼ်းတီႈ 18/06/2019 ယၢမ်းၵၢင်ၼႂ်ၸဝ်ႉ 3 မူင်းပၢႆ ဢွၼ်ႇၸၢႆးႁၢတ်ႈႁၢႆးႁၢႆႉ 2 ၸုမ်း ၽိတ်းမေႃးၵၼ် လမ်းၾၼ်းၵၼ် ႁဵတ်းႁႂ်ႈမီးလုၵ်ႈႁဵၼ်းၸၼ်ႉသုင် လူႉတၢႆ 2 ၵေႃႉ တီႈဢိူင်ႇသီႊၽုမ်ႊ ဝဵင်းၵဵင်းမႆႇ ၸိုင်ႈထႆး။
ၸဝ်ႈၼႃႈတီႈ လူင်းပိုၼ်ႉတီႈၵႂႃႇၵူတ်ႇထတ်းသေ ထူပ်းႁၼ် တူဝ်တၢႆ ၸၢႆးပီႊယင်ႊၵုရ် ပၼ်ႊယႃႊၶူမ်ႊ ဢႃယု 16 လႄႈ ၸၢႆးထိရၽူင်ႊ ၶႂၼ်ႊယိုၼ်ႊ ဢႃယု 16 ပီ (ပဵၼ်လုၵ်ႈႁဵၼ်းထႆးတင်းသွင် ) ၺႃးမိတ်ႈသႃႊမူႊရႆႊၾၼ်း တၢႆထင်တီႈ 1 ၵေႃႉ မၢတ်ႇၸဵပ်းလိူဝ်ႁႅင်း 1 ၵေႃႉ သေလူႉတၢႆၵႂႃႇၽွင်းႁၢမ်တူဝ်သူင်ႇႁူင်းယႃ။
ၸၢႆးပရႃႊသိူတ်ႊ ဢေႊလႅင်ႊ ဢူၺ်းၵေႃႉၽူႈတၢႆ လၢတ်ႈတီႈပလိၵ်ႈဝႃႈ – “ ႁဝ်းၶႃႈပဵၼ်ဢူၺ်းၵေႃႉၵၼ်။ ယၢမ်းတဵင်ႈၶိုၼ်း ၼၼ်ႉ ၸူဝ်းၵၼ်ၵႂႃႇဢႅဝ်ႇတီႈၽၵ်းတူတႃႈပႄး၊ ထူပ်းႁၼ်ၸုမ်းႁၢတ်ႈႁၢႆးၸၢဝ်းတႆး 4 ၵေႃႉ ၽိူဝ်ႇၶဝ်ႁၼ်ႁဝ်းယဝ်ႉ ၶဝ် ၵေႃႈႁေႃႈရူတ်ႉၸွမ်းဢဝ်မိတ်ႈၾၼ်းႁဝ်း။ ႁဝ်းၶႃႈဢမ်ႇယၢမ်ႈႁူႉၸၵ်းၵၼ် ဢမ်ႇယၢမ်ႈႁၼ်ၵၼ်သေပွၵ်ႈ ႁဝ်းၶႃႈၵေႃႈ ၼႅတ်ႈ ၶပ်းရူတ်ႉဝႆးဝႆး ၵူၺ်းၵႃႈရူတ်ႉ ဢူၺ်းၵေႃႉၶႃႈ 2 ၵေႃႉၼၼ်ႉဢမ်ႇတၼ်းပၢႆႈလွတ်ႈလႄႈ ၶဝ်ၺႃးၾၼ်းၼႆယဝ်ႉ ” ဝႃႈၼႆ။
ၵဵဝ်ႇလူၺ်ႈလွင်ႈတၢင်းၸိူဝ်းၼႆႉသေ သိုဝ်ႇထႆးလၢႆလၢႆႁွင်ႈၵၢၼ်ဢွၵ်ႇဝႆႉဝႃႈ ၵူၼ်းႁၢႆႉၼႆႉပဵၼ် ၸုမ်းႁၢတ်ႈႁၢႆးႁၢႆႉၸၢဝ်းတႆး“ ၵႅင်ႉသႃႊမူႊရႆႊ” ဝႃႈၼႆ ၵူၺ်းၵႃႈၸဝ်ႈၼႃႈတီႈယင်းပႆႇတီႉၺွပ်းတူဝ်ၵူၼ်းႁၢႆႉလႆႈ။
ၸၢႆးတႆးထိူၼ်ႇ ၽူႈတူင်ႉၼိုင်ၶႅၵ်ႇလီပၢင်ၸႃႉတႆး ၼႂ်းၵဵင်းမႆႇ လၢတ်ႈဝႃႈ “ ၶႂ်ႈႁႂ်ႈၸဝ်ႈၼႃႈတီႈပလိၵ်ႈတီႉၺွပ်း တူဝ်ၵူၼ်းႁၢႆႉလႆႈယဝ်ႉသေ ထတ်းထၢမ်ၸႅင်ႈလႅင်းယဝ်ႉဝႃႈပဵၼ်တႆးတႄႉၼႆသေ ၸင်ႇဢွၵ်ႇၶၢဝ်ႇဝႃႈပဵၼ်တႆး ၼႆၵေႃႈတေလီယူႇ ယွၼ်ႉဝႃႈမိူဝ်ႈလဵဝ်ၼႆႉ ယင်းဢမ်ႇပႆႇႁူႉဝႃႈၵူၼ်းႁၢႆႉၼႆႉပဵၼ်ၽႂ် ၊ ဢၼ်ၶႂ်ႈၾၢၵ်ႇထိုင်ပီႈ ၼွင်ႉတႆးတႄႉဝႃႈ ဢၼ်ႁဝ်းမႃးယူႇၼႂ်းမိူင်းထႆးၼႆႉယႃႇလိုမ်းဝႃႈႁဝ်းပဵၼ်ၶႅၵ်ႇၵူၺ်း ႁဝ်းလူဝ်ႇၶတ်းၸႂ်ၵဵပ်း ႁွမ်ငိုၼ်းတွင်းသေ ပွၵ်ႈမိူဝ်းမိူင်းႁဝ်း ႁဝ်းယႃႇႁဵတ်းလွင်ႈဢမ်ႇလီၼႂ်းမိူင်းပိူၼ်ႈ” ဝႃႈၼႆ။
ၸဝ်ႈၼႃႈတီႈ တေၵူတ်ႇထတ်းတွင်ႈထၢမ်ၵူၼ်းႁိမ်းႁွမ်းလႄႈ ထတ်းတူၺ်းၼႂ်းၵွင်ႈထၢႆ CCTV ၸွမ်းၶူးမိူင်း သေၸွမ်းႁႃတူဝ်ၵူၼ်းႁၢႆႉပၼ်တူတ်ႈတၢမ်ႇၵႂႃႇၸွမ်းၼင်ႇပၵ်းပိူင်မၢႆမီႈဝၢ ၼ်ႈမိူင်းမီးၼၼ်ႉဝႃႈၼႆ။
