ၵူၼ်းမိူင်းၼမ်ႉၶမ်း ၵေႃႉၼိုင်ႈ ဢၼ်ဢဝ်ႁူမ်ႇလူမ်ႈ ၵႃး/ ရူတ်ႉၶိူင်ႈ တီႈႁူင်းယႃလူင်ၼမ်ႉၶမ်းၼၼ်ႉ ၺႃးၵူၼ်းႁၢႆႉ ဢဝ်ၵွင်ႈ ယိုဝ်းသႂ်ႇ လႆႈတိူဝ်ႉၺႃးမၢၵ်ႇၵွင်ႈတီႈၶႃ လုၵ်ႈၼိုင်ႈ။

ဝၼ်းတီႈ 14/6/2019 ယၢမ်းၵၢင်ၶမ်ႈ မွၵ်ႈ 9 မူင်းၼၼ်ႉ ၵူၼ်းမိူင်း ၵေႃႉၼိုင်ႈ ဢၼ်ဢဝ်ႁူမ်ႇလူမ်ႈ ရူတ်ႉၵႃး တီႈႁူင်းယႃ လူင် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇၼၼ်ႉ ၺႃးၵူၼ်းႁၢႆႉ ဢဝ်ၵွင်ႈပွတ်းယိုဝ်းသႂ်ႇမၼ်းၸၢႆး တီႈတၢင်းၼႃႈႁူင်းယႃလူင် ၸႄႈဝဵင်းၼမ်ႉၶမ်းၼၼ်ႉ လႆႈတိူဝ်ႉၺႃးမၢၵ်ႇၵွင်ႈတီႈၶႃၾၢႆႇသၢႆႉသေ လႆႈသူင်ႇယူတ်းယႃတူဝ် တီႈႁူင်းယႃလူင်ၵမ်းလဵဝ်။

ၵူၼ်းမိူင်းပိုၼ်ႉတီႈ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းဝႃႈ မီးၵူၼ်းႁၢႆႉ ဢဝ်ၵွင်ႈယိုဝ်းသႂ်ႇ ၸၢႆးဢၢႆႈ ၸၢႆး ၵူၼ်းဢဝ် ႁူမ်ႇလူမ်ႈ တီႈႁူင်းယႃ ၼမ်ႉၶမ်း။ လွင်ႈတၢင်းမၼ်းတႄႉၶႃႈၶဝ်ၵေႃႈဢမ်ႇပေႃးႁူႉလီ လႆႈငိၼ်းဝႃႈတႄႉ ၺႃးယိုဝ်း ၼႆၵူၺ်းၶႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈသိုဝ်ႇၶၢဝ်ႇတႆးလွတ်ႈလႅဝ်းဢွၵ်ႇဝႆႉတႄႉ “မၼ်းၸၢႆး တင်း ၵူၼ်းႁဵတ်းၵၢၼ်တီႈ ႁူင်းယႃ ႁူမ်ႈၵၼ် ဢဵၼ်ႁႅင်း 6 ၵေႃႉ ၵႂႃႇဝႅတ်ႉလွမ်ႉၵူၼ်းလၵ်ႉၵေႃႉၼိုင်ႈ၊ ဢၼ်ၸၢင်ႈၶိုင်ယႃႉႁၢၼ်ႉၶၢႆၶဝ်ႈသွႆး ဢၼ်မီးတၢင်းၾၢႆႇၼႃႈႁူင်းယႃ ၼမ်ႉၶမ်းၼၼ်ႉ ၺႃးၵူၼ်းလၵ်ႉ/ ႁၢႆႉ ဢဝ်ၵွင်ႈပွတ်း ယိုဝ်းသႂ်ႇ ၵမ်းၼိုင်ႈ တိူဝ်ႉၺႃး တီႈၶႃၸၢႆးဢၢႆႈၸၢႆး ဢၼ်ပဵၼ်ၵူၼ်းဢဝ် ႁူမ်ႇလူမ်ႈ တီႈဝႆႉရူတ်ႉၵႃး ႁူင်းယႃၼၼ်ႉ ဝႃႈၼႆ။

“မိူဝ်ႈလဵဝ် ဝဵင်းၼမ်ႉၶမ်းႁဝ်းၼႆႉ ဢမ်ႇပေႃးၶႂ်ႈလီယူႇ မိူၼ်မိူဝ်ႈၵူႈပွၵ်ႈယဝ်ႉ။ ၵူၼ်းလၵ်ႉ/ ၵူၼ်းႁၢႆႉၵေႃႈၼမ် ၵူၼ်းၽိတ်း မေႃးၵၼ်ၵေႃႈၼမ်။ ယႃႈမဝ်းၵမ်ၵေႃႈလိူင်ႇၼမ်။ ၵူၼ်းၼုမ်ႇမိူင်းႁဝ်း ဢၵျၢင်ႉတၢင်းယၢမ်ႈလူႉ ယွၼ်ႉယႃႈမဝ်းၵမ် မွင်းဝႃႈ ၶမ်ႈယဝ်ႉၼႆၵေႃႈ ဢိုတ်းၽၵ်းတူ ႁိူၼ်းၽႂ်မၼ်း၊ ၸဵမ်ႁၢၼ်ၶၢႆၶူဝ်းၸိူဝ်းၼႆႉ ပိူၼ်ႈ ဢွၼ်ၵၼ်ၵူဝ်။ ၼွၵ်ႈလိူဝ်ၼၼ်ႉ ၵူၼ်း ႁၢႆႉ ဢၼ်ဢဝ်ၵွင်ႈယိုဝ်းသႂ်ႇ တီႈၵူၼ်းဢဝ်ႁူမ်ႇလူမ်ႈၼၼ်ႉ လွင်ႈၼႆႉၵေႃႈလီဝူၼ်ႉ ယူႇ ႁဵတ်းသင်လႄႈ ၵူၼ်းႁၢႆႉၼႆႉ မီးၵွင်ႈ ယိုဝ်းသႂ်ႇ” ဝႃႈၼႆ။

ၼႂ်းၸႄႈဝဵင်းၼမ်ႉၶမ်းၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ၊ ၸုမ်းယိပ်း ၵွင်ႈ ၵၢင်ႇၸၢဝ်းၶိူဝ်းလႄႈ ၸုမ်းပျီႇတူႉၸိတ်ႉၵူၼ်းမိူင်း ၸဵမ်ၸိူဝ်းၼႆႉၵေႃႈ တူင်ႉၼိုင်ၵႂႃႇမႃးယူႇတႃႇသေႇ ဝႃႈၼႆ။