လူင်ပွင်ၸိုင်ႈမိူင်းတႆး လၢတ်ႈဝႃႈ ၽႂ်ၽူႈလႂ် ႁဵတ်းဝႂ်ၵပ်းတူဝ်ယဝ်ႉ ၺႃးယွၼ်းငိုၼ်းၼမ်ၸိုင် ႁႂ်ႈတိူင်ႇထိုင်လူင်ပွင်ၸိုင်ႈ မိူင်းတႆး ဝႃႈၼႆ။

ဝၼ်းတီႈ 14/06/2019 ယူႇတီႈၸုမ်းလူင်ပွင်ၸိုင်ႈၸႄႈမိူင်းတႆး ၸတ်းႁဵတ်းပၢင်သပ်းၸႅင်ႈၶၢဝ်ႇ လွင်ႈၼႃႈၵၢၼ်လူင် ပွင် ၸိုင်ႈၸႄႈမိူင်းတႆး ဢၼ်လႆႈႁဵတ်းသၢင်ႈၼႂ်းပီ 2018-2019 ၸတ်းႁဵတ်းတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼၼ်ႉ ၽူႈၵွၼ်းလဝၵ လၢတ်ႈ။

တီႈပၢင်သပ်းၸႅင်ႈၶၢဝ်ႇၼၼ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႃႈ “လဝၵ ႁဵတ်းပၼ်ဝႂ်ၵပ်းတူဝ်ၼႆႉ ၸႂ်ႉၶၢဝ်း ယၢမ်းႁိုင်ၼၼ်း။ ၵဵပ်းငိုၼ်းၼမ်၊ လုၵ်ႈႁဵၼ်းၵေႃႈ ပေႃးတီႈႁူင်းႁဵၼ်းဢမ်ႇႁဵတ်းပၼ်ဝႂ်ႁူင်းႁဵၼ်းၸိုင် ႁူပ်ႉတၢင်းယၢပ်ႇ ၽိုတ်ႇၼႆသေ ၵူၼ်းမိူင်းၸၢဝ်းၶိူဝ်းၼႂ်းၸႄႈဝဵင်းတူၼ်ႈတီး ႁူပ်ႉလွင်ႈယၢပ်ႇၽိုတ်ႇ လွင်ႈၼႆႉလူင်ပွင်ၸိုင်ႈမိူင်းတႆး တေ ၸွႆႈၵႄႈ လိတ်ႈပၼ်လႆႈၸိူင်ႉႁိုဝ်?ဝႃႈၼႆ။

ဢူးဝိၼ်းလုၼ်ႇ ၽူႈၵွၼ်းလဝၵ ၸႄႈမိူင်းတႆး တွပ်ႇလၢတ်ႈဝႃႈ “ ပူၼ်ႉမႃးဢမ်ႇႁိုင်သင်ၼႆႉ လဝၵ တီႈလႃႈသဵဝ်ႈ ၺႃးဢဝ် လိူင်ႈၵဵဝ်ႇၵပ်းၵၢၼ်ၵိၼ်သူး/ ၵိၼ်လၢပ်ႈၵေႃႈမီးမႃးယဝ်ႉ။ ယူႇတီႈသိုဝ်ႇၶၢဝ်ႇတႆး လႆႈတၢင်ႇလၢတ်ႈၸီႉၸမ်ႈၼႄၼႆႉ ႁဝ်းၶႃႈ ပဵၼ်ဢၼ်ႁူမ်ၸူမ်းႁပ်ႉတွၼ်ႈတႄႉၶႃႈ ယွၼ်ႉဝႃႈ တၢင်းၾၢႆႇႁဝ်းၶႃႈၼႆႉ ႁႅင်းဢေႇဝႆႉဢိတ်းၼိုင်ႈ သင်ဝႃႈႁူပ်ႉလွင်ႈယၢပ်ႇ ၽိုတ်ႇၸိူဝ်းၼႆႉၸိုင် ႁႂ်ႈဢွၼ်ၵၼ်ႁဵတ်းလိၵ်ႈတၢင်ႇထိုင် ၸူးတီႈလုမ်းလဝၵသေၵမ်း” ဝႃႈၼႆ။

ၵူၼ်းဢၼ်ဝႃႈပေႃးႁဵတ်းမၢတ်ႈပူင်ႇတိၼ်ႇ(ဝႂ်ၵပ်းတူဝ်) သဵင်ႈငိုၼ်းၼမ်ဢၼ်ဝႃႈၼၼ်ႉ ပဵၼ်ၵူၼ်းၸိူဝ်းဢမ်ႇပေႃး ႁူႉၵႂၢမ်း မၢၼ်ႈသေၵႂႃႇၸၢင်ႈၵူၼ်းယူႇၵႄႈၵိၼ်ၵၢင် (ပွႆးၸႃး) ႁဵတ်းပၼ်လႄႈ ၸင်ႇလႆႈသဵင်ႈငိုၼ်းၼမ်။ သင်ဝႃႈ ဢဝ်မႃးသၢၵ်ႈသေႇ လၢၵ်းထၢၼ်တဵမ်ထူၼ်ႈၸိုင် ယူႇတီႈလုမ်းလဝၵ တိုၼ်းႁဵတ်းပၼ်ႁႂ်ႈယဝ်ႉတူဝ်ႈၼႂ်း 48 ဝၼ်း။ လူၺ်ႈဢမ်ႇလႆႈသဵင်ႈၵႃႈ ၸႂ်ႉၸၢႆႇ။ သင်ဝႃႈ တီႈလုမ်းဢမ်ႇႁဵတ်းပၼ်ႁႂ်ႈယဝ်ႉ ၼႂ်းၶၢဝ်းတၢင်း 48 ဝၼ်းၸိုင် တၢင်ႇလိၵ်ႈထိုင်ႁဝ်းၶႃႈလႆႈ ဢူးဝိၼ်း လုၼ်ႇတႄႉလၢတ်ႇၼႄၼင်ႇၼႆ။