တွၼ်ႈတႃႇ ၸၢဝ်းၶိူဝ်းမိူင်းႁူမ်ႈတုမ် တေမီးသုၼ်ႇလႆႈၽဵင်ႇပဵင်း၊ သုၼ်ႇလႆႈႁင်းၶေႃၼႆသေ ၸၢဝ်းၶိူဝ်းၼႂ်း မိူင်းႁူမ်ႈတုမ် 7 ၸၢဝ်းၶိူဝ်း ဢၼ်ႁွတ်ႈၽႅဝ် ယူႇသဝ်းႁဵတ်းၵၢၼ်တီႈမိူင်းဢမေႊရိၵႃႊၼၼ်ႉ ႁူမ်ႈၵၼ်ၶွတ်ႇၽွတ်ႇၸုမ်းဢူၺ်းလီ ဝႃႈၼႆ။

ဝၼ်းတီႈ 15/06/2019 ၼၼ်ႉ ၸၢဝ်းၶိူဝ်း ဢၼ်ႁွတ်ႈၽႅဝ်ယူႇဝႆႉတီႈ မိူင်းဢမေႊရိၵႃႊ မိူၼ်ၼင်ႇ တႆး၊ ၶၢင်၊ ယၢင်းလႅင်၊ ယၢင်းၽိူၵ်ႇ၊ ၶျၢင်း၊ မွၼ်းလႄႈ ရၶႅင်ႇ တင်းမူတ်း 7 ၸၢဝ်းၶိူဝ်း ႁူမ်ႈၵၼ်ၶွတ်ႇၽွတ်ႈၸုမ်းဢူၺ်းလီ တီႈမိူင်းလူင် ဝေႃႊသိင်ႊ တၼ်ႊၻီႊသီႊ ဝႃႈၼႆ။

ဢူးတဵင်းမွင်ႇ ၸၢဝ်းရၶႅင်ႇ ၽူႈၶၢၼ်ပၢၵ်ႇၸုမ်းဢူၺ်းလီ လၢတ်ႈဝႃႈ “ ဢၼ်ႁဝ်းၶႃႈ ၶွတ်ႇၽွတ်ႈၶိုၼ်ႈမႃးၼႆႉ ဢမ်ႇယူႇတီႈ ၸၢဝ်းၶိူဝ်းမၢၼ်ႈသေ ၵေႃႇတင်ႈမႃး။ ယူႇတီႈၸၢဝ်းၶိူဝ်း ၼႂ်းမိူင်းႁူမ်ႈတုမ်သေၵေႃႇတင်ႈၶႃႈဢေႃႈ။ ၶေႃႈယိူင်းဢၢၼ်း ဢၼ် ၵေႃႇတင်ႈ ၸုမ်းဢူၺ်း လီၶိုၼ်ႈမႃးၼႆႉ ၼင်ႇႁိုဝ် ႁဝ်းၶႃႈ ပေႃးတေမီးလွင်ႈထၢင်ႇႁၢင်ႈလွတ်ႈလႅဝ်း၊ လွင်ႈပဵၼ်ထမ်းတြႃး မၢၼ်ႇမႅၼ်ႈ၊ လွင်ႈၽဵင်ႇပဵင်း၊ လွင်ႈသုၼ်ႇလႆႈၸတ်းသၢင်ႈႁၢင်ႈပွင် ၸဵမ်ၸိူဝ်းၼႆႉ ဝႆႉပဵၼ်လၵ်း။ ယဝ်ႉၵေႃႈ ၼင်ႇႁိုဝ် တေပဵၼ်မႃး ၻီႊမူဝ်ႊၶရေႊသီႇ ၸိုၼ်ႈၸၢင်ႇၼႆၶႃႈဢေႃႈ” ဝႃႈၼႆ။

ၸၢဝ်းၶိူဝ်း ၼႂ်းမိူင်းႁူမ်ႈတုမ် ဢၼ်ႁွတ်ႈၽႅဝ်ၵႂႃႇတီႈမိူင်းဢမေႊရိၵႃႊၼၼ်ႉ ႁူမ်ႈၵၼ်သေ ၶွတ်ႇၽွတ်ႇၸုမ်းဢူၺ်းလီ ၵၼ် ပွၵ်ႈၼႆႉပဵၼ်ပွၵ်ႈၵမ်းႁႅၵ်ႈ ဝႃႈၼႆ။

ဢူးတဵင်းမွင်ႇ သိုပ်ႇလၢတ်ႈဝႃႈ “ လွင်ႈဝၢင်းၽႅၼ် Plan တႄႉၵေႃႈ ႁဝ်းၶႃႈပႆႇလႆႈဝၢင်း။ ၵူၺ်းၵႃႈ ႁဝ်းၶႃႈ တေၵပ်းသိုပ်ႇၵၼ် သေ ႁဵတ်းၵၢၼ်။ တွၼ်ႈတႃႇၵၢၼ်ငၢၼ်းဢၼ်တေႁဵတ်းၵႂႃႇတၢင်းၼႃႈၼၼ်ႉ ႁဝ်းၶႃႈလႆႈၸႂ်တူၵ်းလူင်းၵၼ်ဝႆႉမူတ်းယဝ်ႉ” ဝႃႈၼႆ။

ၸၢဝ်းၶိူဝ်းၵမ်ႈၼမ်ဢၼ်ႁွတ်ႈၽႅဝ် ယူႇဝႆႉတီႈမိူင်းဢမေႊရိၵႃႊၼၼ်ႉ ၵမ်ႈၼမ်ပဵၼ်ၵူၼ်းပၢႆႈၽေးသိုၵ်း မိူၼ်ၼင်ႇ ၼႂ်း မိူင်းတႆး၊ မိူင်းၶၢင်လႄႈ မိူင်းရၶႅင်ႇ ၸိူဝ်းၼႆႉ ဝႃႈၼႆ။

ၶေႃႈမုလ်း – VOA