ၽူႈတူင်ႉၼိုင် သိင်ႇဝႅတ်ႉလွမ်ႉၸိုင်ႈတႆး တူၵ်ႇတၵ်ႉဝႃႈ ဢၼ်လူင်ပွင်ၸိုင်ႈ ပၼ်ၶႂၢင်ႉသူင်ႇမႆႉၶၢႆၼွၵ်ႈမိူင်းၼႆႉ မိူၼ်တင်းပၼ်ႁႅင်းႁႂ်ႈ ယႃႉလူႉသၽႃႇဝ သိင်ႇဝႅတ်ႉလွမ်ႉထႅင်ႈ ဝႃႈၼႆ။

မိူဝ်ႈဝၼ်းတီႈ 31/05/2019 ဢိင်ၼိူဝ် ႁွင်ႈၵၢၼ်ၽွင်းလူင်ၾၢႆႇႁၵ်ႉသႃသိင်ႇဝႅတ်ႉလွမ်ႉလႄႈ ၶူဝ်းၶွင်ၼိူဝ်လိၼ်တႂ်ႈလိၼ် လူင်ပွင်ၸိုင်ႈ မိူင်းႁူမ်ႈ တုမ်မၢၼ်ႈ ပိုၼ်ၽၢဝ်ႇပၼ်ၶႂၢင်ႉ (ဢၼုၺၢတ်ႈ) ဢဝ်မႆႉၼႂ်းမိူင်းႁူမ်ႈတုမ် သူင်ႇၶၢႆၼွၵ်ႈမိူင်းၶိုၼ်း ၼၼ်ႉ –
ၵဵဝ်ႇၵပ်းလူၺ်ႈလွင်ႈၼႆႉ ၸၢႆးၶိူဝ်းသႅင် ၽူႈတူင်ႉၼိုင် သိင်ႇဝႅတ်ႉလွမ်ႉ ၸိုင်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“ တူၼ်ႈမႆႉၼႆႉတႃႇတေယႂ်ႇ ၸႂ်ႉၶၢဝ်းယၢမ်းဢၢၼ်ႁူဝ်သိပ်းပီ ယဝ်ႉၵေႃႈဢမ်ႇမီးၽႂ် တေမႃးထတ်းဝႃႈ မႆႉၸိူဝ်းၼၼ်ႉ ပဵၼ်မႆႉၽုၵ်ႇဢဝ်ႁင်းၵူၺ်းႁႃႉ ဢဝ်တီႈလႂ်မႃး၊ ပေႃးႁႂ်ႈလီတႄႉ ၽိူဝ်ႇပၼ်ၶႂၢင်ႉႁႂ်ႈသူင်ႇၶၢႆၼွၵ်ႈမိူင်းၼၼ်ႉ တႃႉႁွင်ႉဢဝ်ၽူႈလူင်ႉလႅၼ်ႇၶဝ် မႃးသွၼ် လၢႆးႁဵတ်း furniture သေၸင်ႇၶၢႆဢွၵ်ႇၼွၵ်ႈမိူင်းၼႆႉ ၼမ်ႉမႅတ်ႈၼမ်ႉတွၼ်ႈမၼ်းၵေႃႈတေလႆႈၼမ် သိင်ႇဝႅတ်ႉလွမ်ႉၵေႃႈတေ ဢမ်ႇပေႃးလူႉၼမ် ” ဝႃႈၼႆ။

ဢူးၺီႇၺီႇထုၼ်း ၽူႈၸတ်းၵၢၼ်ၵူႈလွင်ႈလွင်ႈ ႁွင်ႈၵၢၼ်ၾၢႆႇသဵၼ်ႈမၢႆလႄႈ ၶူင်းၵၢၼ်မႆႉ မိူင်းမၢၼ်ႈ လၢတ်ႈဝႃႈ- “ မႆႉသၵ်းလႄႈ မႆႉၼိူဝ်ႉၵႅၼ်ႇ ဢၼ်တေပၼ်ဢၼုၺၢတ်ႈ သူင်ႇၶၢႆၼွၵ်ႈမိူင်းယၢမ်းလဵဝ်ၼႆႉ ပဵၼ်ဢၼ်ၽုၵ်ႇဢဝ်ႁင်းၵူၺ်း သုၼ်ႇတူဝ်။ ဢမ်ႇၸႂ်ႈပႃႇမႆႉၶွင်ၸိုင်ႈမိူင်း။ လွင်ႈၼႆႉၵေႃႈ ယူႇတီႈၾၢႆႇပႃႇမႆႉတေဢဝ်ပုၼ်ႈၽွၼ်းၼႆ လႆႈဢွၵ်ႇလိၵ်ႈဝႆႉ ၸဵမ်မိူဝ်ႈဝၼ်းတီႈ 31 မေႊ 2019 ယဝ်ႉ ”ဝႃႈၼႆ။

ယူႇတီႈ ယေးငိုၼ်းလုမ်ႈၾႃႉ (World Bank) ၶူၼ်ႉၶႂႃႉႁဵတ်းဢွၵ်ႇၽိုၼ်ႁၢႆးငၢၼ်း ၵဵဝ်ႇၵပ်း သိင်ႇဝႅတ်ႉလွမ်ႉ မိူင်းမၢၼ်ႈ မိူဝ်ႈဝၼ်းတီႈ 11 ၵျုၼ်ႊ 2019 ၼၼ်ႉပႃးဝႆႉဝႃႈ မိူင်းမၢၼ်ႈၼႆႉ တင်ႈဢဝ်ပီ 1990 ထိုင် 2015 ပႃႇမႆႉမူၺ်ႉ 10 လၢၼ်ႉႁႅၵ်ႊတိူဝ်ႊ။ ပီ 2010 တေႃႇထိုင် ပီ 2015 သမ်ႉ မိူင်းဢၼ်ပႃႇမႆႉမူၺ်ႉၼမ် သုတ်းၼႂ်းလုမ်ႈၾႃႉၼႆႉ မိူင်းမၢၼ်ႈပဵၼ်တီႈသၢမ် ဝႃႈၼႆဝႆႉ။