ပၢင်ဢုပ်ႇဢူဝ်းလႅၵ်ႈလၢႆႈ ၵူၼ်းမိူင်း၊ ၽူႈတႅၼ်းသၽႃးလႄႈ ၽူႈႁၢပ်ႇၵၢၼ်လူင်ပွင်ၸိုင်ႈၸတ်းႁဵတ်းတီႈဝဵင်းလႃႈသဵဝ်ႈ တွၼ်ႈတႃႇႁဵတ်းသၢင်ႈလွင်ႈႁုၼ်ႈမုၼ်းၶိုၼ်ႈယႂ်ႇၼႂ်းပိုၼ်ႉတီႈ။

ဝၼ်းတီႈ 15/06/2019 ယၢမ်းၵၢင်ၼႂ် 10 မူင်းၶိုင်ႈ ထိုင် 12 မူင်းပၢႆ ၵူၼ်းမိူင်းၼႂ်းပိုၼ်ႉတီႈလႄႈ ၽူႈတႅၼ်းသၽႃး ဢိၵ်ႇ ၽူႈႁၢပ်ႇၵၢၼ်လူင်ပွင်ၸိုင်ႈ ၸတ်းႁဵတ်းပၢင်ဢုပ်ႇဢူဝ်းလႅၵ်ႈလၢႆႈ တွၼ်ႈတႃႇလွင်ႈႁုၼ်ႈမုၼ်းၶိုၼ်ႈယႂ်ႇၼႂ်းပိုၼ်ႉတီႈ ၼႂ်း ပွၵ်ႉ၊ ဢိူင်ႇ လႄႈ ဝၢၼ်ႈ။ ပၢင်ဢုပ်ႇဢူဝ်းၼႆႉ ၸတ်းႁဵတ်းတီႈ ဝတ်ႉဝိႁၢရ် ဝၢၼ်ႈပုင်းထုၼ် ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။

ၼႂ်းပၢင်ဢုပ်ႇဢူဝ်းလႅၵ်ႈလၢႆႈ တွၼ်ႈတႃႇႁုၼ်ႈမုၼ်းၶိုၼ်ႈယႂ်ႇ ၼႂ်းပိုၼ်ႉတီႈၼၼ်ႉ ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်။ ၽူႈၵွၼ်းၸႄႈဝဵင်းလႃႈသဵဝ်ႈ မွၵ်ႇ လၢတ်ႈၶေႃႈၵႂၢမ်းသေ သပ်းလႅင်းတၢင်ႇၼႄ လွင်ႈႁုၼ်ႈမုၼ်းၶိုၼ်ႈယႂ်ႇ။

တီႈၼႂ်းပၢင်ဢုပ်ႇဢူဝ်းလႅၵ်ႈလၢႆႈၼၼ်ႉ ႁွင်ႈၵၢၼ်ၾၢႆႇပွင်ႇၶၢဝ်ႇ၊ ၵူၼ်းမိူင်း၊ ၶွမ်ႊမတီႊ ၶူင်းၵၢၼ်ၸႄႈဝဵင်းလႄႈ ၽူႈတႅၼ်း သၽႃးၸိူဝ်ႉၸၢတ်ႈ ႁွင်ႈၵၢၼ်လူင်ပွင်ၸိုင်ႈထႅင်ႈ 11 ႁွင်ႈၵၢၼ် ၶဝ်ႈႁူမ်ႈဢုပ်ႇဢူဝ်းၵၼ် တင်းမူတ်းမီးၸမ် 200 ၵေႃႉ။

ၵူၼ်းဝၢၼ်ႈၼႂ်းဢိူင်ႇပုင်းထုၼ် မိူၼ်ၼင်ႇ ဝၢၼ်ႈၼမ်ႉၵတ်း၊ ဝၢၼ်ႈပႃႇသႃ၊ ဝၢၼ်ႈၼမ်ႉလုၵ်း တၢင်ႇလၢတ်ႈၼႄတီႈၼႂ်း ပၢင် ဢုပ်ႇဢူဝ်းၼၼ်ႉဝႃႈ ပၼ်ႁႃမူင်ႈမႅင်းယႃႉသူၼ်ၶဝ်ႈၵၢပ်ႇၵူၼ်းမိူင်း၊ တေႁဵတ်းႁိုဝ် ၵႄႈလိတ်ႈပၼ်၊ လွင်ႈသုၼ်ႇလႆႈတီႈ လိၼ်ၽုၵ်ႇသွမ်ႈတူၼ်ႈမႆႉ၊ လွင်ႈမႄႇၶႂၢၵ်ႈသဵၼ်ႈတႃႈသၢႆတၢင်း ဝၢၼ်ႈလႄႈ ဝၢၼ်ႈဢၼ်ၵၢႆႇၸူးၵၼ် ႁႂ်ႈသိူဝ်ႇၶႂၢၵ်ႈထႅင်ႈႁႂ်ႈ ၵႂၢင်ႈ၊ ၼႂ်းႁူင်းႁဵၼ်းလူင်ပွင်ၸိုင်ႈ ဢမ်ႇတဵမ်ထူၼ်ႈ၊ လွင်ႈၾႆးၾႃႉ၊ လွင်ႈႁဵတ်းပၼ်ဝႂ်မုင်ႉႁေႃႁိူၼ်းလႄႈ ဝႂ်ၵပ်းတူဝ်၊ လွင်ႈ ဝႂ်တီႈလိၼ်သူၼ်ႁႆႈၼႃး ၽိုၼ်မိူၼ် 7 (ပုံစံ ၇ ) ႁႂ်ႈၶပ်းၶိုင်ႁဵတ်းပၼ်ဝႆးဝႆး ၸဵမ်ၸိူဝ်းၼႆႉ။

ၸၢႆးဝၼ်းလႅင်းၶမ်း လၢတ်ႈတီႈၽူႈတွႆႇႁွၵ်ႈထႅင်ႈဝႃႈ – ၸဝ်ႈၼႃႈတီႈၾၢႆႇၵဵဝ်ႇၶွင်ႈလႆႈတွပ်ႇပၼ်ၶိုၼ်းၵမ်းၶေႃႈၶေႃႈ မိူၼ် ၼင်ႇ “ လွင်ႈမူင်ႈမႅင်းယႃႉသူၼ်ၶဝ်ႈၵၢပ်ႇၼၼ်ႉ ဝၼ်းတီႈ 16/6/2019 ယူႇတီႈႁွင်ႈၵၢၼ်ၾၢႆႇၽုၵ်ႇသွမ်ႈ တေလူင်းၵူတ်ႇ ထတ်းတူၺ်း။ ၵဵဝ်ႇလူၺ်းလွင်ႈၽုၵ်ႇသွမ်ႈတူၼ်ႈမႆႉ တေလႆႈ တူၺ်းတီႈတိူၵ်ႈလိၼ်ၽႂ်မၼ်းသေ ၶၢဝ်းတၢင်း 2 ဝူင်ႈၼႆႉ ၸဝ်ႈၼႃႈတီႈတေလူင်းတႅၵ်ႈၼႃႈလိၼ်။ ယဝ်ႉၵေႃႈ ၵဵဝ်ႇလူၺ်ႈ လွင်ႈၽိုၼ်မိူၼ် 7 (ပုံစံ ၇) ဢၼ်ၵူၼ်းမိူင်းလူဝ်ႇၼၼ်ႉ ၼင်ႇႁိုဝ်တေလႆႈဝႆးၼၼ်ႉ တေၶပ်းၶိုင်ႁဵတ်းပၼ်ၵႂႃႇဝႆးဝႆး။ လွင်ႈသဵၼ်ႈတႃႈသၢႆတၢင်းဝႃႇ၊ လွင်ႈၾႆးၾႃႉဝႃႇ ၸိူဝ်းၼႆႉၵေႃႈ ၶဝ်ဝႃႈတေလူင်းပိုၼ်ႉတီႈၵူတ်ႇထတ်းပၼ်” ဝႃႈၼႆ။

လွင်ႈဝႂ်မုင်ႉႁေႃႁိူၼ်းလႄႈ ဝႂ်ၵပ်းတူဝ်ၼၼ်ႉ ဢၼ်ပီႈၼွင်ႉၸၢဝ်းၵေႃႇရၶႃးဢၼ်ႁူပ်ႉလွင်ႈယၢပ်ႇၽိုတ်ႇၼၼ်ႉ ၼိုင်ႈလိူၼ် လႂ် ၼိုင်ႈပွၵ်ႈ ႁႂ်းမႃးတီႈလုမ်းလဝၵ ၸႄႈဝဵင်းလႃႈသဵဝ်ႈသေ တေၸွႆႈထႅမ်ၶပ်းၶိုင်ပၼ်ၵႂႃႇ ဝႃႈၼႆ။

ၵဵဝ်ႇၵပ်းလွင်ႈ ၵူၼ်းၸိူဝ်းပႆႇမီးဝႂ်မုင်ႉႁေႃႁိူၼ်း၊ ဝႂ်ၵိူတ်ႇ၊ ဝႂ်ၵပ်းတူဝ်လႄႈ ဝႂ်ႁေႃႈၵႃး/ ရူတ်ႉၶိူင်ႈ ၵဵဝ်ႇၵပ်းလွင်ႈၼႆႉ တွၼ်ႈ တႃႇ ပီႈၼွင်ႉဢိူင်ႇပုင်းထုၼ် တေႁဵတ်းပၼ် တီႈၶူင်းၵၢၼ် One Stop Shop (OSS) ႁႂ်ႈယဝ်ႉၵမ်းလဵဝ် ဝႃႈၼႆ။