ပလိၵ်ႈၸႄႈဝဵင်းတႃႈၶီႈလဵၵ်း တီႉလႆႈ ယႃႈမဝ်းၵမ် လႄႈ ၶိူင်ႈၵွင်ႈၵၢင်ႇ ဢၼ်ဢမ်ႇမီးၸဝ်ႈၶွင် ၵႃႈၶၼ်ငိုၼ်းမွၵ်ႈ 4 မိုၼ်ႇ သႅၼ်ပျႃးပၢႆ။
ဝၼ်းတီႈ 14/06/2019 ယၢမ်းဝၢႆးဝၼ်း 3 မူင်း ပလိၵ်ႈၸႄႈဝဵင်းတႃႈၶီႈလဵၵ်း ၵူတ်ႇထတ်းထူပ်းႁၼ် ယႃႈမဝ်းၵမ်လႄႈ ၶိူင်ႈ ၵွင်ႈ ၵၢင်ႇ ဢၼ်သႂ်ႇထူင်ဝႆႉ 21 ထူင် ၵွင်ပႅတ်ႈဝႆႉတီႈႁိမ်းၼမ်ႉႁွင်ႈသေ ဢဝ်ၵိင်ႇမႆႉ/ ၽိူဝ်မႆႉ ႁူမ်ႇဝႆႉ ႁိမ်းၸမ်ဝၢၼ်ႈပႃႇၶႃး ၸႄႈ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၼႂ်းထူင်ၼၼ်ႉ ၵူတ်ႇထတ်းထူပ်းႁၼ် ယႃႈမႃႉ 42.54 သႅၼ်မဵတ်ႉ( မႅၼ်ႈငိုၼ်း 42,540 သႅၼ်ပျႃး)၊ ယႃႈၽွင် ၼမ်ႉၼၵ်း 1.9 ၵီႊလူဝ်ႊ(မႅၼ်ႈငိုၼ်း 190 သႅၼ်ပျႃး)၊ ႁူဝ်ၸိူဝ်ႉယႃႈ“ၵႅတ်ႉတမိၼ်း” 900 ၵရမ်ႇ (မႅၼ်ႈငိုၼ်း 90 သႅၼ်ပျႃး)။ ယႃႈၾိၼ်ႇ 5 ၵီႊလူဝ်ႊ (မႅၼ်ႈငိုၼ်း 600 သႅၼ်ပျႃး)။
လိူဝ်ၼၼ်ႉ တီႉလႆႈပႃးထႅင်ႈ ၵွင်ႈ 9 လဝ်း၊ မႅၵ်ႉၵွင်ႈ 8 ဢၼ်၊ မၢၵ်ႇၵွင်ႈ 19,279 လုၵ်ႈလႄႈ ၸၢၵ်ႈလၢတ်ႈၵႂၢမ်း 4 လုၵ်ႈ ဝႃႈ ၼႆ။
ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ဝၼ်းတီႈ 14 လိူၼ်ၵျုၼ်ႊ ယၢမ်းဝၢႆးဝၼ်း 1 မူင်း ပလိၵ်ႈၸႄႈဝဵင်းတႃႈၶီႈလဵၵ်း ၶဝ်ႈ တီႉယႃႈၾိၼ်ႇၽိူၵ်ႇ 5.3 ၵီႊလူဝ်ႊ (မႅၼ်ႈငိုၼ်း 848 သႅၼ်ပျႃး) တီႈႁွင်ႈၶၢတ်ႈ လင်ၼိုင်ႈ တီႈႁိမ်းဝၢၼ်ႈၼမ်ႉဢုၼ်ႇ ၸႄႈ ဝဵင်းတႃႈၶီႈလဵၵ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇပလိၵ်ႈၶဝ် လႆႈပိုတ်ႇလိူင်ႈဝႆႉတီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်း မီး ဝႃႈၼႆ။
