ၾၢႆႇႁႅင်းၵၢၼ်ၾၢင်ႉ မီးၸုမ်းလွၵ်ႇလႅၼ်ႁဵတ်းပၼ်မၢႆၾၢင် မိူင်းမၢၼ်ႈဢၼ်ပွမ်

ၸုမ်းတူင်ႉၼိုင်ၾၢႆႇႁႅင်းၵၢၼ် ၼႂ်းမိူင်းထႆး ၾၢင်ႉထိုင်ႁႅင်းၵၢၼ်ယၢၼ်မိူင်းဝႃႈ မီးၸုမ်းလွၵ်ႇလႅၼ်ႁဵတ်းပၼ် မၢႆၾၢင်မၢတ်ႈပုင်ႇတိၼ်ႇမၢၼ်ႈၼႂ်းမိူင်းထႆး ။

ဝၼ်းတီႈ 06/06/2019 ၶူင်းၵၢၼ်ပၢႆးယူႇလီလႄႈ ပၼ်တၢင်းႁူႉႁႅင်းၵၢၼ်ၸၢဝ်းၶိူဝ်း ၸတ်းပၢင်ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၵဵင်းမႆႇ ၸိုင်ႈထႆး ။ ၼႂ်းပၢင်ဢုပ်ႇဢူဝ်းၼၼ်ႉ ႁွင်ႈၵၢၼ်ၾၢႆႇၸတ်းႁႃၵၢၼ်ၵဵင်းမႆႇ ၾၢင်ႉထိုင်ပီႈၼွင်ႉ ႁႅင်းၵၢၼ်ဝႃႈ မၢႆၾၢင် (မၢတ်ႈပုင်ႇတိၼ်ႇ မၢၼ်ႈ) ဢၼ်မီးၸုမ်းၵဵပ်းငိုၼ်းသေ ႁဵတ်းပၼ်ယူႇၼႂ်းမိူင်းထႆးၼႆႉ မၼ်းဢမ်ႇၸႂ်ႈဢၼ်တႄႉမၼ်း ၵွပ်ႈၼၼ်လႄႈ ႁႂ်ႈဢွၼ်ၵၼ်ၾၢင်ႉ ဝႃႈၼႆ။

ၾၢႆႇၸတ်းႁႃၵၢၼ် ဝဵင်းၵဵင်းမႆႇ လၢတ်ႈဝႃႈ “ မိူဝ်ႈလဵဝ်ၼႆႉ မီးၵူၼ်းႁူၺ်းသူၼ်း ႁဵတ်းပၼ်ဝႂ်ၵပ်းတူဝ် ( မၢတ်ႇပုင်ႇတိၼ်ႇ မၢၼ်ႈ ) ႁႅင်းၵၢၼ်ၼႂ်းမိူင်းထႆး ၊ လႆႈပၼ်ၼိုင်ႈၵေႃႉလႂ် 1,5000 ဝၢတ်ႇ ၊ မီးႁႅင်းၵၢၼ် မၢင်ၸိူဝ်းႁဵတ်းမႃးယဝ်ႉသေ ၵႂႃႇယိုၼ်ႈတႃႇႁဵတ်း Passport ၵူၺ်းၵႃႈ ႁဵတ်းဢမ်ႇလႆႈ ယွၼ်ႉဝႃႈပဵၼ်ဢၼ်ပွမ် လွင်ႈၼႆႉ ၶႂ်ႈႁႂ်ႈၸုမ်းတူင်ႉၼိုင်ၾၢႆႇ ႁႅင်းၵၢၼ်လႄႈ  ႁွင်ႈၵၢၼ်ၾၢႆႇၵဵဝ်ႇၶွင်ႈ ၸွႆႈၾၢင်ႉထိုင်ပီႈၼွင်ႉႁႅင်းၵၢၼ် ၼင်ႇႁိုဝ်တေဢမ်ႇထုၵ်ႇလွၵ်ႇ ” ဝႃႈၼႆ။

ၸၢႆးယွတ်ႈ ႁွင်ႈၵၢၼ်ၾၢႆႇသိုဝ်ႇ မူလ်လၼိထိ MAP လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ – “ တႃႇႁဵတ်းဝႂ်ၵပ်းတူဝ် မၢၼ်ႈၼၼ်ႉ လီဢွၼ်ၵၼ် မိူဝ်းႁဵတ်းတီႈဝၢၼ်ႈၵိူတ်ႇမိူင်းၼွၼ်းၽႂ်မၼ်းၶႃႈဢေႃႈ ႁဵတ်းတၢင်ႇတီႈဢမ်ႇလႆႈ ” ဝႃႈၼႆ။

ၼင်ႇႁိုဝ်ႁႅင်းၵၢၼ်ယၢၼ်မိူင်း တေမီးတီႈပိုင်ႈဢိင် မိူဝ်ႈထူပ်းတၢင်းယၢပ်ႇၽိုတ်ႇၼႆသေ ၼႂ်းမိူင်းထႆးၼႆႉ ပိုတ်ႇဝႆႉလုမ်း ၽွင်းတၢင် တီႈမိူင်းၵွၵ်ႇလႄႈ ၵဵင်းမႆႇ။

ၵူဝ်ႇမဵဝ်း ၽူႈၸွႆႈၵၢၼ် ၼႂ်းလုမ်းတၢင်မိူင်းႁူမ်ႈတုမ်မၢၼ်ႈ ဢၼ်မီးတီႈၵဵင်းမႆႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈလဵဝ် ၼႂ်းမိူင်းထႆးၼႆႉ ဢမ်ႇမီးပိူင်ႁဵတ်းဝႂ်ၵပ်းတူဝ် (မၢတ်ႈပုင်ႇတိၼ်ႇ မၢၼ်ႈ ) သေတီႈၶႃႈ ၊ ပေႃးမီးၵူၼ်းၵႂႃႇ ႁပ်ႉႁဵတ်းပၼ်ၼႆတႄႉ မၼ်းဢမ်ႇၸႂ်ႈဢၼ်တႄႉမၼ်း ။ ပိူၼ်ႈလွၵ်ႇလႅၼ်ၵိၼ်ငိုၼ်းလၢႆၵူၺ်းၶႃႈ ၊ ပေႃးမီးတၢင်းယၢပ်ႇၸႂ်၊ လွင်ႈၶွင်ႉၶမ်ၸႂ်ၼႆၸိုင် ၵပ်းသိုပ်ႇမႃးတီႈလုမ်းၽွင်းတၢင်လႆႈၵူႈၶၢဝ်းၶႃႈ ” ဝႃႈၼႆ။

လူင်ပွင်ၸိုင်ႈပိုၼ်ၽၢဝ်ႇဝႃႈ ၼႂ်းပၢၼ်လူင်ပွင်ၸိုင်ႈမႂ်ႇ ၶၢဝ်းတၢင်း 3 ပီၼႆႉ လႆႈဢွၵ်ႇပၼ်ဝႂ်ၵပ်းတူဝ်ၵူၼ်းမိူင်း (ဢၼ်မႂ်ႇ) 6 လၢၼ်ႉ 7 သႅၼ်ၵေႃႉပၢႆယဝ်ႉ။ ၼင်ႇႁိုဝ် ၵူၼ်းမိူင်းတႆးၵူႈၵေႃႉတေမီးဝႂ်ၵပ်းတူဝ်ၵၼ်ၵူႈၵေႃႉၼၼ်ႉ ယူႇတီႈပႃႇတီႇ ၵၢၼ်မိူင်းၵေႃႈတေယိုၼ်ႈမိုဝ်းၸွႆႈထႅမ်ပၼ် ဝႃႈၼႆ။