ၵေႃလိၵ်ႈလၢႆးလႄႈ ၾိင်ႈငႄႈတႆး၊ ၶၢင်လႄႈ တဢၢင်း ၸႄႈဝဵင်းမူႇၸေႊ ႁူဝ်ၵူၼ်းမွၵ်ႈ 40 ပၢႆ ဢႅဝ်ႇယဵမ်ႈလဵပ်ႈႁဵၼ်းၼႂ်း သၽႃးမိူင်းတႆး။
ဝၼ်းတီႈ 12/6/2019 ယၢမ်းၵၢင်ၼႂ် 10 ထိုင် 12 မူင်းၵၢင်ဝၼ်း ၸၢႆးၵျေႃႇတဵင်း ၽူႈတႅၼ်းသၽႃး ၸႄႈမိူင်း ၶဵတ်ႇ လိူၵ်ႈတင်ႈ မၢႆ 1 ၸႄႈဝဵင်းမူႇၸေႊ တင်း ဢူးၵဵင်ႇမႆ ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈ ဝဵင်းမူႇၸေႊ မွၵ်ႇထိုင်ၵေႃလိၵ်ႈလၢႆးလႄႈ ၾိင်ႈငႄႈတႆး၊ ၶၢင်လႄႈ တဢၢင်း ၸႄႈဝဵင်းမူႇၸေႊ တႃႇမႃးလဵပ်ႈႁဵၼ်း ၼႂ်းသၽႃးၸႄႈမိူင်း တႆး တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ၸၢႆးတုမ်ႇၶၢဝ် ၽူႈမႃးလဵပ်ႈႁဵၼ်းသၽႃးမိူင်းတႆးလၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈပူၼ်ႉမႃးသွင်လိူၼ်ၼၼ်ႉၵေႃႈ လူင်ပွင်ၸိုင်ႈမိူင်းႁူမ်ႈတုမ် ၽိတ်ႈမွၵ်ႇမႃးတႃႇၵႂႃႇလဵပ်ႈႁဵၼ်းသၽႃးမိူင်းႁူမ်ႈတုမ်။ ၵူၺ်းၵႃႈ ဢမ်ႇလႆႈၶဝ်ႈထိုင်ၼႂ်းႁွင်ႈသၽႃး။ မိူဝ်ႈ လဵဝ် မႃးလဵပ်ႈႁဵၼ်းသၽႃးမိူင်းတႆးၼႆႉ ပဵၼ်ပွၵ်ႈဢွၼ်တၢင်းသုတ်းၶႃႈယဝ်ႉ” ဝႃႈၼႆ။
တွၼ်ႈတႃႇတေမႃးလဵပ်ႈႁဵၼ်းတီႈသၽႃးမိူင်းတႆးၼႆႉ တႄႇဢွၵ်ႇမူႇၸေႊမႃး မိူဝ်ႈဝၼ်းတီႈ 10 လိူၼ်ၵျုၼ်ႊ။ ဝၼ်းတီႈ 11 သမ်ႉ ၵႂႃႇဢႅဝ်ႇလဵပ်ႈႁဵၼ်းၼႂ်းၼွင်ႁၢႆးယႃႈသေ လဵပ်ႈႁဵၼ်းၵၢၼ်ၽုၵ်ႇသွမ်ႈၼိူဝ်ၼမ်ႉ၊ တေႃးသိူဝ်ႈၽႃႈ၊ တေႃးထူင်၊ ႁဵတ်း မိတ်ႈႁဵတ်းၽႃႉ ၸိူဝ်းၼႆႉ။
ထိုင်မႃး ဝၼ်းတီႈ 12 လိူၼ်ၵျုၼ်ႊသမ်ႉ လႆႈၶဝ်ႈလဵပ်ႈႁဵၼ်းၼႂ်းသၽႃးမိူင်းတႆး တင်ႈတႄႇၵၢင်ၼႂ် 10 ထိုင် 12 မူင်းၵၢင် ဝၼ်း။ ဝၢႆးဝၼ်းသမ်ႉ သိုပ်ႇၵႂႃႇလဵပ်ႈႁဵၼ်းသူၼ်မွၵ်ႇ Lily ဢၼ်ၵူၼ်းၼွၵ်ႈမိူင်းမႃးၽုၵ်ႇသွမ်ႈ။ လိူဝ်ၼၼ်ႉ လႆႈလဵပ်ႈႁဵၼ်း ပႃး လၢႆးၽုၵ်ႇဢႃႇလူး၊ ၽၵ်းမီႇလႄႈ ၶဝ်ႈဢၼ်ၵူၼ်းပိုၼ်ႉတီႈၽုၵ်ႇသွမ်ႈဝႆႉၸိူဝ်းၼၼ်ႉ ၼင်ႇႁိုဝ်ပေႃးတေပူင်ႇလီ ဢွၵ်ႇလီ မၢၵ်ႈလီၼၼ်ႉမီးလွၵ်းလၢႆး ၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ။
