ၶွမ်ႊမသျိၼ်ႊၽဵဝ်ႈမူၺ်ႉ ၵၢၼ်ၵိၼ်သူး/ ၵိၼ်လၢပ်ႈ ဢဝ်လိူင်ႈၽူႈႁၢပ်ႇၵၢၼ်လူင်ပွင်ၸိုင်ႈ ၼႂ်းႁွင်ႈၵၢၼ် ၾၢႆႇ ၵဵပ်းသဵၼ်ႈ မၢႆႁူဝ်ၵူၼ်း(လဝၵ) လႃႈသဵဝ်ႈလႄႈ ၽူႈယိင်း 1 ၵေႃႉဢၼ်ႁဵတ်းၶဵဝ်ၵိၼ်ၵၢင်မၼ်း။
ဝၼ်းတီႈ 12/6/2019 ယူႇတီႈၶွမ်ႊမသျိၼ်ႊ ၽဵဝ်ႈမူၺ်ႉ ၵၢၼ်ၵိၼ်သူး/ ၵိၼ်လၢပ်ႈ ဢဝ်လိူင်ႈၸွႆးတြႃး ၽူႈႁၢပ်ႇၵၢၼ် လူင် ပွင်ၸိုင်ႈ ဢၼ်ၵိၼ်သူး/ ၵိၼ်လၢပ်ႈ တီႈၵူၼ်းမိူင်းၸိူဝ်းမႃး ႁဵတ်းဝႂ်ၵပ်းတူဝ်၊ သဵၼ်ႈမၢႆမုင်ႉႁေႃ ႁိူၼ်လႄႈ ဝႂ်ၵိူတ်ႇ ၸိူဝ်း ၼႆႉ။ တင်းမူတ်း 7 ၵေႃႉလႄႈ ၵူၼ်းယူႇၵႄႈၵၢင်(ပွဲးစား) ထႅင်ႈ ၼိုင်ႈၵေႃႉ ႁူမ်ႈၵၼ်တင်းမူတ်း 8 ၵေႃႉ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်းပၼ်ၾၢင်ႉၶဝ် လၢႆၵမ်းယဝ်ႉ။ ၶဝ်ၵေႃႈဝႃႈ ၵူၼ်းႁဵတ်းၵၢၼ်ၶဝ်ၵမ်ႈၽွင်ႈၼႆႉ ဢၵျၢင်ႉ/ တၢင်းတိုဝ်းၵမ် ဢမ်ႇလီ ဢဝ် ငိုၼ်းၼမ်။ ထႅင်ႈ လွင်ႈၼိုင်ႈ ၸၢဝ်းၶိူဝ်းၼႂ်းမိူင်းႁဝ်းၼႆႉ ဢမ်ႇမေႃၵႂၢမ်းမၢၼ်ႈလီလီပဵၼ်ဢၼ်ယၢပ်ႇၽိုတ်ႇသေ လႆႈၵႂႃႇပၼ် ၵူၼ်းႁဵတ်းၶဵဝ် ယူႇၵႄႈၵိၼ်ၵၢင် (ပွဲးစား) ႁဵတ်းပၼ်ၵေႃႈမီး။ တေႃႈလဵဝ် ဢၼ်ပဵၼ်လိူင်ႈယူႇၼႆႉ ယွၼ်ႉၵူၼ်းၵႄႈၵၢင် ဢမ်ႇ ထုၵ်ႇၵၼ်သေ တၢင်ႇၶိုၼ်ႈႁႂ်ႈဢဝ်လိူင်ႈၵၼ်ၶိုၼ်းၵူၺ်း။ လိူဝ်ၼၼ်ႉ ဢၼ်လဝၵ ၶဝ်ႁဵတ်းပၼ်ၼၼ်ႉၵေႃႈ ဢမ်ႇငၢမ်ႇ ၸွမ်းပၵ်းပိူင်မၢႆမီႈ မီးဝႆႉ” ဝႃႈၼႆ။
ယူႇတီႈၶွမ်ႊမသျိၼ်ႊ ၽဵဝ်ႈမူၺ်ႉ ၵၢၼ်ၵိၼ်သူး/ ၵိၼ်လၢပ်ႈ ပိုၼ်ၽၢဝ်ႇဢွၵ်ႇမႃး ၵူၼ်းၸိူဝ်းႁဵတ်းၵၢၼ် ဢမ်ႇတြႃးၼၼ်ႉ ၽူႈၵွၼ်းၵဵပ်းသဵၼ်ႈမၢႆႁူဝ်ၵူၼ်း၊ ၽူႈၵွၼ်းလဝၵ လႄႈ ၽူႈၵွၼ်းၸႄႈဝဵင်း ဢွၼ်ၵၼ်ၵဵပ်းငိုၼ်းတီႈၵူၼ်းမႃးႁဵတ်းဝတ်းဝႂ် (မၢတ်ႉပုင်ႇတိၼ်ႇ) 1 ၵေႃႉ ၵဵပ်းႁူဝ်သိပ်းသႅၼ်ပျႃး။
လိူဝ်ၼၼ်ႉ ၵူၼ်းယူႇၵႄႈၵၢင်(ပွဲးစား) တေႃႇမသျႅင်ႇသၢၼ်းသမ်ႉ ယူႇၼႂ်းၵႄႈသေ ၵပ်းသိုပ်ႇပၼ်တင်းၵူၼ်းဢၼ်တေႁဵတ်း ဝႂ်ၵပ်းတူဝ် မၼ်းၼၢင်းလႆႈငိုၼ်း ၸွမ်းၼပ်ႉႁူဝ်သႅၼ်ပျႃး ၼင်ႇၵဝ်ႇ ဝႃႈၼႆ။
လႃႈသဵဝ်ႈၼႆႉ ယွၼ်ႉဝႃႈ ပဵၼ်ဝဵင်းလူင်ဝဵင်းၼိုင်ႈလႄႈ ၵူၼ်းမႃးႁဵတ်းဝႂ်ၵပ်းတူဝ်ၵေႃႈ မီးၵူႈဝၼ်း ပေႃးလႆႈၶဝ်ႈထႅဝ်ၵၼ်။ တွၼ်ႈတႃႇတေလူင်းပိုၼ်ႉတီႈသေ ႁဵတ်းပၼ်ဝႂ်ၵပ်းတူဝ်ပၼ်ၵူၼ်းမိူင်းၼၼ်ႉ ၾၢႆႇလဝၵ မီးလွင်ႈယၢပ်ႇၽိုတ်ႇ။ ၼႂ်းၵႄႈ ၼႆႉတႄႉ ယွၼ်ႉပိူဝ်ႈမီးၵၢၼ်ဢဝ်လိူင်ႈ ဢဝ်လၢဝ်းၵၼ်လႄႈ တႃႇတေႁဵတ်းဝႂ်ၵပ်းတူဝ်တႄႉ တေလႆႈၸႂ်ႉၶၢဝ်းယၢမ်းႁိုင် ဢိတ်းၼိုင်ႈ ဝႃႈၼႆ။
