ၼႂ်းၸႄႈမိူင်းတႆးပတ်းပိုၼ်ႉၼႆႉ ၵူၼ်းမိူင်းဢမ်ႇပႆႇမီးဝႂ်ၵပ်းတူဝ်/ မၢႆၾၢင်ၵၼ် မီး 5 သႅၼ် 7 မိုၼ်ႇပၢႆ ယူႇတီႈၸဝ်ႈသိုၵ်းလူင် လႃႉဢူး ၽွင်းလူင်ၾၢႆႇႁူမ်ႇလူမ်ႈၸႄႈမိူင်းတႆးလႄႈ လႅၼ်လိၼ် လၢတ်ႈ။
ဝၼ်းတီႈ 12/06/2019 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 15 တီႈလုမ်းသၽႃးၸႄႈမိူင်းတႆး ၸႄႈဝဵင်း တူၼ်ႈတီး ၸိုင်ႈတႆးပွတ်းၸၢၼ်း ယူႇတီႈဢူးၶိၼ်ႇမွင်ႇဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်း ယွင်ႁူၺ်ႈ တွင်ႈထၢမ်ၼႂ်းပၢင်ၵုမ်သၽႃး လွင်ႈဝႂ်ၵပ်းတူဝ်ၵူၼ်းမိူင်းလႄႈ သဵၼ်ႈမၢႆႁူဝ်ႁိူၼ်း (မုင်ႉႁေႃႁိူၼ်း) ၸွင်ႇတေ မီးၽႅၼ်ၵၢၼ်လႄႈ ငဝ်းလၢႆးတေႁဵတ်းပၼ် ၸိူဝ်းပႆႇမီးၸိူဝ်းၼၼ်ႉ။ သင်ႁဵတ်းပၼ်ၸိုင် ၵဵဝ်ႇၵပ်းလွင်ႈၼႆႉ တေၸႂ်ႉၶၢဝ်း ယၢမ်းၵႃႈႁိုဝ် ဝႃႈၼႆ။
ၽွင်းလူင်ၾၢႆႇႁူမ်ႇလူမ်ႈၸႄႈမိူင်းတႆးလႄႈ လႅၼ်လိၼ် (ၼတလ) ၸဝ်ႈသိုၵ်းလူင် လႃႉဢူး တွပ်ႇလၢတ်ႈၼႂ်းပၢင်ၵုမ်သၽႃး ၸႄႈမိူင်းတႆးဝႃႈ “ ၵူၼ်းမိူင်းႁဝ်းၸိူဝ်းဢႃယုတဵမ် 10 ပီ၊ 10 ပီ ၸိူဝ်းၼႆႉ ၵမ်ႈၽွင်ႈၵေႃႈၵႂႃႇႁဵတ်းၵၢၼ်မိူင်းႁိမ်းႁွမ်း။ ၵမ်ႈ ၽွင်ႈၵေႃႈ ၵႂႃႇယူႇၼႂ်းၼႃႈလိၼ်ၶိုၵ်ႉတွၼ်း၊ ၵမ်ႈၽွင်ႈၵေႃႈဢမ်ႇယူႇႁိူၼ်း ၸိူဝ်းၼၼ်ႉ ဢမ်ႇပႆႇလႆႈႁဵတ်း၊ ဢမ်ႇၸၢင်ႈႁဵတ်း ဝႂ်ၵပ်းတူဝ် မီးယူႇ 5 သႅၼ် 7 မိုၼ်ႇၵေႃႉ” ဝႃႈၼႆ။
သိုပ်ႇလၢတ်ႈဝႃႈ “ ၼႂ်းမိူင်းတႆးၼႆႉ ၵူၼ်းမိူင်းဢၼ်မီးမၢႆၾၢင်ပဵၼ်တၢင်းၵၢၼ် တင်းမူတ်းမီး 3 လၢၼ်ႉ 8 သႅၼ်ပၢႆ” ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းတႆး ၸိူဝ်းဢၼ်ပႆႇမီးဝႂ်ၵပ်းတူဝ်ၼၼ်ႉ ၶႂ်ႈပၼ်ႁႅင်းႁႂ်ႈၵႂႃႇႁဵတ်း။ ပီႈၼွင်ႉၸၢဝ်းၶိူဝ်းဢမ်ႇမေႃၵႂၢမ်းမၢၼ်ႈၸိူဝ်း ဢၼ်မီးတၢင်းယၢပ်ႇ ၽိုတ်ႇတႃႇၵႂႃႇႁဵတ်း မၢႆၾၢင်(ဝႂ်ၵပ်းတူဝ်) ၼၼ်ႉ ယွၼ်းတၢင်းၸွႆႈထႅမ်တီႈပႃႇတီႇၵၢၼ်မိူင်းလႄႈ ၽူႈတႅၼ်းသၽႃး ႁႂ်ႈၸွႆႈၶပ်းၶိုင်ပၼ်ၵႂႃႇ” ဝႃႈၼႆ။
မၼ်းၸၢႆး သိုပ်ႇလၢတ်ႈဝႃႈ “ ပေႃးမီးဝႂ်ၵပ်းတူဝ်ၸိုင်ၵႂႃႇမႃးလႂ်ၵေႃႈငၢႆႈ။ တၢင်ႇမိူင်းၼႆႉ ဢမ်ႇယိပ်းဝႂ်ၵပ်းတူဝ်ဢမ်ႇလႆႈ။ လွင်ႈ ၼႆႉပဵၼ်လိူင်ႈယႂ်ႇတႄႉ။ ၵွပ်ႈၼၼ်လႄႈ ထုၵ်ႇလီဢွၼ်ၵၼ်ၵႂႃႇႁဵတ်း” ဝႃႈၼႆ။
