ပလိၵ်ႈတႃႈၶီႈလဵၵ်း ၶဝ်ႈၵူတ်ႇထတ်းၼႂ်းႁၢၼ်ႉလဵၼ်ႈၵဵမ်း တီႈပွၵ်ႉဝၢၼ်ႈၵွင်း တီႉၺွပ်းလႆႈၸဝ်ႈၶွင်ႁၢၼ်ႉၵဵမ်း၊ ၶူင်ႇလဵၼ်ႈ ၵဵမ်း လႄႈ ငိုၼ်း ၵမ်ႈၽွင်ႈ။
ဝၼ်းတီႈ 9/6/2019 ၶၢဝ်းယၢမ်းမွၵ်ႈ 10 မူင်းၵၢင်ၶိုၼ်းၼၼ်ႉ ပလိၵ်ႈမၢၼ်ႈ ၶဝ်ႈၵူတ်ႇထတ်းၼႂ်းႁၢၼ်ႉလဵၼ်ႈၵဵမ်း တီႈပွၵ်ႉ ဝၢၼ်ႈၵွင်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ တီႉတူႈၵဵမ်းပႃ 6 ၶူင်ႈလႄႈ မဵတ်ႉငိုၼ်းထႆး ဢၼ်ယွတ်ႇလဵၼ်ႈ ၼႂ်းတူႈၵဵမ်းၼၼ်ႉထႅင်ႈ 4 မိုၼ်ႇဝၢတ်ႇပၢႆ။ လိူဝ်ၼၼ်ႉ တီႉလႆႈပႃး ၽူႈၸၢႆး 3 ၵေႃႉလႄႈ ၽူႈယိင်း 1 ၵေႃႉ ဝႃႈၼႆ။
ၽူႈၸၢႆး 3 ၵေႃႉလႄႈ ၽူႈယိင်း 1 ၵေႃႉ ဢၼ်တီႉလႆႈၼၼ်ႉ ၽူႈၸၢႆး ၸိုဝ်ႈႁွင်ႉ သိင်းႁု ဢႃယု 32 ပီ၊ ပေႇဝိၼ်းတဵင်း ဢႃယု 19 ပီ၊ တူႇရဢွင်ႇ ဢႃယု 22 ပီလႄႈ ၽူႈယိင်းသမ်ႉ သီႇရိဢူး ဢႃယု 21 ပီ တေႃႈလဵဝ် ယူႇတီႈပလိၵ်ႈ လႆႈပိုတ်ႇလိူင်ႈၶဝ်ဝႆႉ တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ဝႃႈၼႆ။
ၸၢႆးလူင် ၵူၼ်းပိုၼ်ႉတီႈ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၸႄႈဝဵင်းတႃႈၶီႈလဵၵ်းႁဝ်းၶႃႈၼႆႉ မီးၵၢၼ်တေႃႇလွင်း ဢၼ်ႁွင်ႉဝႃႈ ၵဵမ်းပႃၼၼ်ႉ မီးတင်းၼမ်။ ပေႃးလဵၼ်ႈၵဵမ်းပႃယဝ်ႉ ၵူၼ်းၼုမ်ႇဢၵျၢင်ႉတၢင်းယၢမ်ႈလူႉ။ ၵူၼ်းမီးၼႃႈႁိူၼ်း ၵေႃႈ ၼႃႈႁိူၼ်းလူႉ။ ၼႃႈႁိူၼ်းတႅၵ်ႇပႅတ်ႈၵၼ်ၵေႃႈၼမ်ၼႃႇ ယွၼ်ႉၵဵမ်းပႃ (ၵၢၼ်တေႃႇလွင်း) ၼႆႉ။ ၵွပ်ႈၼႆ ႁၢၼ်ႉၵဵမ်း ၸိူဝ်းၼႆႉ ႁႂ်ႈတီႉၺွပ်းဢဝ်လိူင်ႈမူတ်းမူတ်း လွင်ႈၼႆႉ ၶႃႈႁဝ်းႁၼ်လီၵမ်ႉထႅမ်ၸွမ်းၶႃႈ။ ယွၼ်ႉဝႃႈ ႁၢၼ်ႉမၼ်း မီးၵႂႃႇယူႇ ၵူႈတီႈလႄႈ ပေႃးမီးၶၢဝ်ႇ ပလိၵ်ႈၶဝ်ႈတီႉႁၢၼ်ႉၵဵမ်းၼႆ၊ တၢင်ႇႁၢၼ်ႉၵေႃႈ ပိၵ်ႉဝႆႉ ယဵၼ်ဝႆႉသေ ဝၢႆးမႃး ၶိုၼ်းပိုတ်ႇၶိုၼ်းႁဵတ်း ၼႆတႃႇသေႇယဝ်ႉ။ ပလိၵ်ႈၵူၺ်းႁူႉလိူဝ်ပိူၼ်ႈဝႃႈ ႁၢၼ်ႉလႂ်မီးတီႈလႂ် ဢၼ်ဝႃႈၼၼ်ႉ” ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 7 လိူၼ်မေႊၼၼ်ႉ ယူႇတီႈၸွမ်ၸိုင်ႈ ဢူးဝိၼ်းမိၼ်ႉ လႆႈလူင်းလၢႆးမိုဝ်း ဢၼ်ႁဵတ်းဢွၵ်ႇပၵ်းပိူင်မႂ်ႇ လွင်ႈၵၢၼ်တေႃႇလွင်း။ ၵူၼ်းမိူင်းႁူမ်ႈတုမ်ၵူႈၵေႃႉ ဢမ်ႇမီးသုၼ်ႇၶႂၢင်ႉၶဝ်ႈလဵၼ်ႈၵၢၼ်တေႃႇလွင်း ၼႂ်းၵႃႊသီႊ ၼူဝ်ႊ ဝႃႈၼႆ။
ၼႂ်းပၵ်းပိူင်မႂ်ႇ ၵၢၼ်တေႃႇလွင်းၼၼ်ႉ လူင်ပွင်ၸိုင်ႈမိူင်းႁူမ်ႈတုမ် ပၼ်ၶႂၢင်ႉမၵ်းမၼ်ႈပၼ် ႁႂ်ႈပဵၼ်ၵူၼ်းၼွၵ်ႈ မိူင်းၵူၺ်း လဵၼ်ႈၵဵမ်းလႆႈတေႃႇလွင်းလႆႈ တွၼ်ႈတႃႇၵူၼ်းမိူင်းႁူမ်ႈတုမ်တႄႉ ဢမ်ႇမီးၶႂၢင်ႉတေႃႇလွင်းလႆႈ၊ သင်ဝႃႈ ၵေႃႉလႂ်လဵၼ်ႈ ႁၼ်မႅၼ်ႈၼႆၸိုင် တေတီႉၺွပ်းပၼ်တူတ်ႈတၢမ်ႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီး ဝႃႈၼႆ။
