ပွႆးယုၵ်ႉယွင်ႈဝၼ်းၵိူတ်ႇ မေႃၵႂၢမ်းတႆး ၸိုဝ်ႈသဵင်ယႂ်ႇ ၸၢႆးသၢႆမၢဝ်း မၢႆတွင်းဢႃယု ၶွပ်ႈတဵမ် 75 ပီ (ပီၵွၼ်းသႅင်) ၸတ်း ႁဵတ်းၵႂႃႇယဝ်ႉတူဝ်ႈလီငၢမ်း မီးပီႈၼွင်ႉတီႈၸမ်ၵႆလႄႈ မေႃၵႂၢမ်းၸိုဝ်ႈသဵင်ယႂ်ႇ မႃးၶဝ်ႈႁူမ်ႈပၼ်ႁႅင်း တင်းၼမ်လၢႆ။

ဝၼ်းတီႈ 6-7/6/2019 ယၢမ်းၵၢင်ၶမ်ႈ 8:30 မူင်းထိုင်ၵၢင်ၼႂ် 2:30 မူင်း ယူႇတီႈၶွမ်ႊပၼီႊမွၵ်ႇၵွၼ်မူႇၸေႊ ၵၢၼ်တေႃႉသူင်ႇ ၵူၼ်းဢွၵ်ႇတၢင်း (ချယ်ရီမူမယ် ခရီးသွားကုမ္ပဏီ) လႄႈ ၸုမ်းပၢႆးမွၼ်းတႆး မူႇၸေႊ ႁူမ်ႈၵၼ်ၶိုင်သၢင်ႈၸတ်းႁဵတ်းပၢင်ပွႆး ယုၵ်ႉယွင်ႈ ဝၼ်းၵိူတ်ႇ ပီၵွၼ်းသႅင် ၸၢႆးသၢႆမၢဝ်း တီႈဝတ်ႉၼၼ်ႇတဝၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

မေႃၵႂၢမ်း ၸၢႆးသၢႆၾူၼ် လၢတ်ႈတီႈၽူႈတွႆႇႁွၵ်ႈဝႃႈ “ ပေႃးတေလၢတ်ႈငဝ်ႈမၼ်းမႃးတႄႉ မိူဝ်ႈပီပူၼ်ႉ ပီႈသၢႆမၢဝ်းလႆႈၶိုၼ်ႈ ႁူင်းယႃၼၼ်ႉ ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ႁဝ်းမူႇၸေႊ ႁၢင်ႈႁႅၼ်းတေၸတ်းႁဵတ်း ပၢင်ပွႆးႁႃငိုၼ်းၵွင်ၵၢင် တႃႇၵမ်ႉထႅမ်ပၢႆးယူႇလီပီႈသၢႆမၢဝ်းၼႆသေ မိူဝ်ႈၽွင်းၼၼ်ႉ တီႈမူႇၸေႊႁဝ်းသမ်ႉ သုၵ်ႉသၵ်ႉ ပဵၼ်ပၢင်တိုၵ်းၵၼ်လႄႈ ဢမ်ႇပဵၼ်ႁဵတ်း။ ထိုင်မႃး ပီၼႆႉ ယူႇတီႈမွၵ်ႇၵွၼ်မူႇၸေႊ လႄႈ ၸဝ်ႈပၢႆးမွၼ်းတီႈမူႇၸေႊ၊ ယဝ်ႉၵေႃႈ ထုင်ႉမၢဝ်း ၸိူဝ်းၼႆႉ ၸင်ႇႁူမ်ႈၵၼ်သေၸတ်းႁဵတ်းၶႃႈဢေႃႈ” ဝႃႈၼႆ။

ပၢင်ပွႆးယုၵ်ႉယွင်ႈ ဝၼ်းၵိူတ်ႇ ၸၢႆးသၢႆမၢဝ်း ဢႃယု ၶွပ်ႈတဵမ် 75 ပီ (ပီၵွၼ်းသႅင်) ဢၼ်ၸတ်းႁဵတ်းၵႂႃႇတီႈဝဵင်းမူႇၸေႊၼႆႉ ယိူင်းဢၢၼ်း ႁႃငိုၼ်းၵွင်ၵၢင် တႃႇၸွႆႈၵမ်ႉထႅမ်ပၼ်ၸၢႆးသၢႆမၢဝ်း လွင်ႈပၢႆးယူႇလီ မၼ်းၸၢႆး မီးၽူႈပၼ်ႁႅင်း မွပ်ႈငိုၼ်း တွင်းၼမ်တႄႉတႄႉဝႃႈၼႆ။

ၸၢႆးသၢႆၾူၼ် သိုပ်ႇလၢတ်ႈဝႃႈ “ ယူႇတီႈႁဝ်းၶႃႈ ၸဝ်ႈပၢႆးမွၼ်းမူႇၸေႊၶွတ်ႇၽွတ်ႈဝႆႉ ၵေႃႇမတီႇသေ လႆႈၵဵပ်းငိုၼ်းၵွင် ၵၢင်မႃး တင်းမူတ်း ပၢၵ်ႇပၢႆသိပ်းဢဵတ်းသႅၼ်ပျႃး။ ယဝ်ႉၵေႃႈ ၸႂ်ႉၸၢႆႇတႃႇၶိူင်ႈတွႆႇၵူႈပိူင်ပိူင်၊ ၸၢၵ်ႈၾႆး၊ ၶိူင်ႈၶူင်ႇ မၼ်း ၸိူဝ်းၼႆႉ ၸၢႆႇၵႂႃႇ 36 သႅၼ်ပျႃး။ လိူဝ်ဝႆႉ မွၵ်ႈပႅတ်ႇသိပ်းသႅၼ်ပျႃးလႄႈ ငိုၼ်းၶႄႇ 4,450 ယႂၼ်။ ငိုၼ်းတင်းမူတ်းၼႆႉ ႁဝ်းၶႃႈ မွပ်ႈပၼ်ပီႈသၢႆမၢဝ်း မူတ်းမူတ်းယဝ်ႉၶႃႈ” ဝႃႈၼႆ။

ၾၢႆႇၼိုင်ႈၵေႃႈ ဢၼ်ပဵၼ်ၶွမ်ႊပၼီႊ မွၵ်ႇၵွၼ်မူႇၸေႊ ၸဝ်ႈတႃႇၼ ပၢင်ပွႆးၼၼ်ႉၵေႃႈ တင်ႈၽိူၼ်ၶၢႆတၢင်းၵိၼ် ႁႃငိုၼ်းၵွင်ၵၢင်ၼင်ႇၵဝ်ႇလႄႈ လႆႈငိၼ်းဝႃႈ ငိုၼ်းဢၼ်ႁႃလႆႈမႃးၼၼ်ႉ မွပ်ႈပၼ်ၸၢႆးသၢႆမၢဝ်းယဝ်ႉ ဝႃႈၼႆ။

ၸၢႆးႁိၼ်လဵၵ်း ၽူႈၸွႆႈၶပ်းၶိုင်ၾၢႆႇၶိူင်ႈၸၢၵ်ႈၾႆး T.4 Lighting Group လၢတ်ႈတီႈၽူႈတွႆႇႁွၵ်ႈဝႃႈ “ ပွႆးယုၵ်ႉယွင်ႈ ပီႈသၢႆမၢဝ်း ပီၵွၼ်းသႅင် 75 ပီၼႆႉ ၵိုၼ်းတႄႉၶႃႈ။ မီးပီႈၼွင်ႉ တီႈၸမ်ၵႆ မႃးၶဝ်ႈႁူမ်ႈပၼ်ႁႅင်းတင်းၼမ်။ ယဝ်ႉၵေႃႈ ဢၼ်ပီႈၼွင်ႉ ႁဝ်း တွၼ်ႈပၼ်ငိုၼ်းသူးၼႂ်းမိုဝ်းပီႈသၢႆမၢဝ်းၵေႃႈၼမ်တႄႉၶႃႈ။ ပႆႇပႃးငိုၼ်းၵွင်ၵၢင် ဢၼ်ၸုမ်းပၢႆးမွၼ်းမူႇၸေႊ လႄႈ တီႈၽိူၼ် ၵိၼ်ၶဝ်ႈၼၼ်ႉ သင်ဝႃႈႁူမ်ႈပႃးတီႈၼၼ်ႈတင်း 2 တီႈတႄႉ လႅပ်ႈလႆႈငိုၼ်းသူး တႃႇၵႃႈယူတ်းယႃ ပီႈသၢႆမၢဝ်းၼမ်ၶႃႈဢေႃႈ ” ဝႃႈၼႆ။

တီႈပၢင်ပွႆးၼၼ်ႉ မီးၽူႈႁွင်ႉၽဵင်းၵႂၢမ်း ၸိုဝ်ႈသဵင်ယႂ်ႇ မိူၼ်ၼင်ႇ ၸၢႆးလၢဝ်သႂ်၊ ၸၢႆးသႅင် ၸွမ်ၾႃႉ၊ ၸၢႆးသႅင်ၸွမ်မၢဝ်း၊ ထႅၼ်ႈလႅဝ်း၊ ဢူးလၢႆး၊ ၸၢႆးသၢႆၾူၼ်၊ ၸၢႆးၶိူဝ်းၼိမ်၊ ၸၢႆးၼုမ်ႇၸၢႆး၊ ၸၢႆးႁၢၼ်လႅင်း၊ ၸၢႆးၼုမ်ႇၾႃႉ(မိူင်းၶွၼ်)၊ ၸၢႆးႁၢၼ်သႅင်၊ ၸၢႆးသႅင်မိူင်း၊ ၸၢႆးမၢဝ်းၶိူဝ်း၊ ၸၢႆးၶုၼ်ၸၢႆး။ ၼၢင်းၼုမ်ႇမၢဝ်း၊ ၼၢင်းသႅင်လိုၼ်းၶမ်း၊ ၼၢင်း ၶမ်းၼွင်ႉ၊ ၼၢင်းလၢဝ်လၢဝ်၊  ၼၢင်းမူၺ်ၽွင်၊ ၼၢင်းသီၼုမ်ႇ၊ လၢဝ်ၼုမ်ႇႁွမ်၊ ယိင်းယိင်းၶိူဝ်း၊ ၼၢင်းႁွမ်ၼူၼ်း၊ ၽူၺ်းၼုမ်ႇသႂ်၊ မွၵ်ႇၵွၼ်၊ ၼၢင်းၼုမ်ႇၼုတ်းလႄႈ ၼၢင်းဢေလႃႉ (မိူင်းၶွၼ်) ၸဵမ်ၸိူဝ်းၼႆႉ မႃးလဝ်ႇမူၼ်ႈပၼ်ႁႅင်းၸႂ်ၵႂႃႇ ဝႃႈၼႆ။

မိူဝ်ႈႁူဝ်လိူၼ်ဢေႊပရိူဝ်ႊ 2018 ၼၼ်ႉ ၸၢႆးသၢႆမၢဝ်း လႆႈၶဝ်ႈယူတ်းယႃတူဝ်တီႈႁူင်းယႃ ဝဵင်းလူင်ၵုင်းထဵပ်ႈ(မိူင်းၵွၵ်ႇ) ၸိုင်ႈထႆး။ လူၺ်ႈတၢင်းပဵၼ်တပ်း၊ တႂ် သဵၼ်ႈလိူတ်ႈတၼ်လႄႈ လိူတ်ႈၶိုၼ်ႈ ၸိူဝ်းၼႆႉ ဝႃႈၼႆ။