ၵူၼ်းမၢၼ်ႈပဵင်း ၼႂ်းဢိူင်ႇဢီႇၼၢႆး 200 ပၢႆ ဢၼ်ပၢႆႈၶဝ်ႈဝဵင်းလႃႈသဵဝ်ႈ ယွၼ်ႉပိူဝ်ႈၶူင်းၵၢၼ် ၽုၵ်ႇတူၼ်ႈမႆႉၶွင်ၶုၼ်သိုၵ်း လူင် SSPP ဢၼ်ဝႃႈၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယဝ်ႉ။
ဝၼ်းတီႈ 5/6/2019 ၼၼ်ႉ ၵူၼ်းမၢၼ်ႈပဵင်း ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁူဝ်ၵူၼ်း 200 ပၢႆ ၼႄ ၵၢင်ၸႂ်သၢၼ်ၶတ်းၶူင်းၵၢၼ်ၽုၵ်ႇသွမ်ႈ ပီယၢဝ်းၶၢဝ်းႁိုင်ၶွင်ၽူႈမီးၸၼ်ႉၶုၼ်သိုၵ်းလူင် SSPP ၼၼ်ႉၼႆသေ ဢွၼ်ၵၼ် ပၢႆႈသွၼ်ႈတီႈၵျွင်းၶရိတ်ႉယၼ်ႇ ပွၵ်ႉ 9 ၸႄႈဝဵင်းလႃႈသဵဝ်ႈ။
ၸဝ်ႈသိုၵ်း ၸၢႆးသူႉ ၽူႈၶၢၼ်ပၢၵ်ႇ SSPP/SSA လၢတ်ႈတီႈၽူႈတွႆႇႁွၵ်ႈဝႃႈ “ ၽိုၼ်လိၵ်ႈဢၼ်ၵူၼ်းမိူင်းပိုၼ်ႉတီႈသူင်ႇမႃး ၼၼ်ႉ ႁဝ်းၶႃႈလႆႈႁပ်ႉယဝ်ႉ။ ယဝ်ႉၵေႃႈ လႆႈႁူပ်ႉတင်းၵူၼ်းပိုၼ်ႉတီႈယဝ်ႉ။ ၵူၼ်းဢၼ်ႁဵတ်းၽိတ်းၼၼ်ႉ ႁဝ်းၶႃႈ တေ ႁွင်ႉမႃးၵူတ်ႇထတ်းထဵတ်ႈထၢမ်သေ ပၼ်တူတ်ႈတၢမ်ႇၵႂႃႇ သင်ဝႃႈတၢင်းလႂ်ၽိတ်း ဢၼ်ဝႃႈၼၼ်ႉ” ဝႃႈၼႆ။
တေႃႈလဵဝ် ၶူင်းၵၢၼ်ၼႆႉ တေဢၢၼ်းၽုၵ်ႇသွမ်ႈမႆႉၼိူဝ်ႉၵႅၼ်ႇၵႂႃႇ ဢွင်ႈတီႈလိၼ်ၵူၼ်းမၢၼ်ႈပဵင်း တီႈႁဵတ်းႁႃၵိၼ်လဵင်ႉ တွင်ႉသူၼ်ႁႆႈၵူၼ်း မၢၼ်ႈပဵင်း။ ၵဵဝ်ႇၵပ်းလူၺ်ႈ ၶူင်းၵၢၼ်ၼႆႉ ၵူၼ်းဝၢၼ်ႈႁူမ်ႈၵၼ် လူင်းလၢႆးမိုဝ်းတႅမ်ႈလိၵ်ႈသၢၼ် ၶတ်း မႃးလၢႆပွၵ်ႈၵေႃႈတိုၵ်ႉမီးလွင်ႈတဵၵ်းတဵင်ယူႇတိၵ်းတိၵ်းလႄႈ ၸင်ႇလႆႈဢွၼ်ၵၼ်ပၢႆႈ” ဝႃႈၼႆ။
ၵူဝ်ႇထွႆႉသျွင်ႇ ၽူႈသၢၼ်ၶတ်းၶူင်းၵၢၼ် ၽုၵ်ႇသွမ်ႈၼႆႉလၢတ်ႈဝႃႈ“ ႁဝ်းၶႃႈ ႁူမ်ႈၵၼ်လူင်းလၢႆးမိုဝ်းသၢၼ်ၶတ်းမႃး။ ဝၢႆး ၼၼ်ႉ ၶဝ်တႅမ်ႈလိၵ်ႈၸိုဝ်ႈၵူၼ်းဝၢၼ်ႈသေ ႁွင်ႉႁဝ်းၶႃႈၵႂႃႇ ၼႂ်းထိူၼ်ႇ။ ၶဝ်ႁွင်ႉ သွင်ၵေႃႉ ႁဝ်းၶႃႈဢမ်ႇၵႂႃႇ။ သင်ၶဝ် ႁွင်ႉႁဝ်းၶႃႈ တင်းမူတ်းၼႆ ႁဝ်းၶႃႈတေဢွၼ်ၵၼ်ၵႂႃႇထူပ်းယူႇ” ဝႃႈၼႆ။
ၵဵဝ်ႇလူၺ်ႈလွင်ႈၵူၼ်းဝၢၼ်ႈသၢၼ်ၶတ်းလူင်းလၢႆးမိုဝ်းၼႆႉ တင်ႈတႄႇၶွမ်ႊပၼီႊ ၶူင်းၵၢၼ်ၽုၵ်ႇသွမ်ႈ ဢဝ်ၵႃးၶုတ်းလိၼ် မႃးလူင်းၼၼ်ႉလႆႈသၢၼ်ၶတ်းမႃး ဝႃႈၼႆ။
ၸဝ်ႈသိုၵ်းၸၢႆးသူႉ လၢတ်ႈဝႃႈ “ ၵူၼ်းၼိုင်ႈၵေႃႉၵူၺ်းၼႆ ၵူၼ်းဝၢၼ်ႈတင်းမူတ်းလႆႈဢွၼ်ၵၼ်ပၢႆႈၸိူင်ႉၼႆ လွင်ႈၼႆႉ ပဵၼ် ဢၼ်လီဝူၼ်ႉယူႇ။ ပေႃးပဵၼ်ပၼ်ႁႃမႃး ဢမ်ႇၵႄႈလိတ်ႈၵမ်းၸၼ်ႉၸၼ်ႉသေ ဢိတ်းဢွတ်းၵေႃႈ လုၵ်ႉၼႄၵၢင်ၸႂ် ပၢႆႈ ဢွၵ်ႇဝၢၼ်ႈတိၵ်းတိၵ်းၼႆတႄႉ မၼ်းၵေႃႈဢမ်ႇလီ။ ပေႃးဢဝ်ၵၢၼ်မိူင်းဝႃႈၵေႃႈ မိူၼ်ၶႂ်ႈယႃႉၸိုဝ်ႈသဵင်ၵၼ်လူႉၵူၺ်း ၶႃႈ။ ၵွပ်ႈၼၼ်တေတွင်ႈထၢမ် တူၺ်းလွင်ႈၼႆႉလီလီ” ဝႃႈၼႆ။
ယွၼ်ႉပိူဝ်ႈၾၢႆႇတၢင်းငဝ်ႈငုၼ်း SSPP ၵေႃႈလၢတ်ႈဝႃႈ တေႁွင်ႉၽူႈၽိတ်းထဵတ်ႈထၢမ်ပၼ်တူတ်ႈတၢမ်ႇၼႆသေဢမ်ႇၵႃး ၾၢႆႇၼိုင်ႈၵေႃႈ ထိုင်ၶၢဝ်းလုၵ်ႈဢွၼ်ႇၶိုၼ်ႈႁူင်းႁဵၼ်း၊ ထိုင်ၶၢဝ်းၵူၼ်းဝၢၼ်ႈ လူဝ်ႇၶဝ်ႈသူၼ်ၶိုၼ်းယဝ်ႉလႄႈ ၵူၼ်းဝၢၼ်ႈ ၵေႃႈ လႆႈဢွၼ်ၵၼ်ပွၵ်ႈၶိုၼ်းဝၢၼ်ႈမိူဝ်ႈဝၼ်းတီႈ 7/6/2019 မူတ်းယဝ်ႉ ဝႃႈၼႆ။
