ႁွင်ႈၵၢၼ်ၾၢႆႇပၢႆးပၺ်ၺႃ မိူင်းႁူမ်ႈတုမ် ပိုၼ်ၽၢဝ်ႇသဵၼ်ႈမၢႆၸိုဝ်ႈလုၵ်ႈႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီ 2019 တင်းမူတ်း ဢွင်ႇပူၼ်ႉ 267,696 ၵေႃႉ ပေႃးဢဝ်ပိူဝ်ႊသႅၼ်ႊမၼ်းဝႃႈသမ်ႉ 31.44 ပိူဝ်ႊသႅၼ်ႊ ဝႃႈၼႆ။
ဝၼ်းတီႈ 8/6/2018 ယၢမ်းၵၢင်ၼႂ် 6 မူင်း ႁွင်ႈၵၢၼ်ၾၢႆႇပၺ်ၺႃ မိူင်းႁူမ်ႈတုမ် ပိုၼ်ၽၢဝ်ႇသဵၼ်ႈမၢႆၸိုဝ်ႈလုၵ်ႈႁဵၼ်း ၸိူဝ်း ဢွင်ႇပူၼ်ႉၸၼ်ႉသိပ်းၼႂ်းပီ 2019 ၼႂ်းမိူင်းႁူမ်ႈတုမ်ပတ်းပိုၼ်ႉ တင်းမူတ်း ဢွင်ႇပူၼ်ႉၸၼ်ႉသိပ်း 267,697 ၵေႃႉ။ လုၵ်ႈ ႁဵၼ်း ၸိူဝ်းၶဝ်ႈတွပ်ႇလိၵ်ႈ ၸၼ်ႉသိပ်း ပီ 2018 -2019 တင်းမူတ်း ၶဝ်ႈတွပ်ႇ 851,524 ၵေႃႉ ဝႃႈၼႆ။
ၼႂ်းပီ 2019 ၼႆႉ လုၵ်ႈႁဵၼ်းၼႂ်းမိူင်းတႆး ပတ်းပိုၼ်ႉဢၼ်ၶဝ်ႈတွပ်ႇလိၵ်ႈ မိူၼ်ၼင်ႇ မိူင်းတႆးပွတ်းဢွၵ်ႇၶူင်း ၶဝ်ႈတွပ်ႇလိၵ်ႈ 5,008 ၵေႃႉ၊ ဢွင်ႇပူၼ်ႉ 1,041 ၵေႃႉ ဢဝ်ပိူဝ်ႊသႅၼ်ႊဝႃႈသမ်ႉ 20.79 ပိူဝ်ႊသႅၼ်ႊ။
ၼႂ်းမိူင်းတႆးပွတ်းၸၢၼ်းသမ်ႉ ၶဝ်ႈတွပ်ႇ 34,155 ၵေႃႉ၊ ဢွင်ႇပူၼ်ႉ 9,457 ၵေႃႉ ပိူဝ်ႊသႅၼ်ႊ 27.69 ပိူဝ်ႊသႅၼ်ႊ။ ၼႂ်းၸိုင်ႈ တႆးပွတ်းႁွင်ႇသမ်ႉ ၶဝ်ႈတွပ်ႇ 17,395 ၵေႃႉ၊ ဢွင်ႇပူၼ်ႉ 5,482 ၵေႃႉ ပိူဝ်ႊသႅၼ်ႊ 31.51 ပိူဝ်ႊသႅၼ်ႊ။
ၼႂ်းမိူင်းႁူမ်ႈတုမ် ပတ်းပိုၼ်ႉ ဢၼ်လုၵ်ႈႁဵၼ်းဢွင်ႇပူၼ်ႉၸၼ်ႉသိပ်း ပီ 2019 ၼႆႉ ဢၼ်ဢွင်ႇၼမ်တီႈသုတ်း ပဵၼ်ၸႄႈ မိူင်းမွၼ်း 37.54 ပိူဝ်ႊသႅၼ်ႊ။ ၼမ်တီႈသွင် တိူင်းဝဵင်းလိူဝ်ႇ 36.13 ပိူဝ်ႊသႅၼ်ႊ။ ၼမ်တီႈသၢမ် တိူင်းၸႄႈၵႅင်း 34.15 ပိူဝ်ႊ သႅၼ်ႊ။
ဢၼ်လုၵ်ႈႁဵၼ်းဢွင်ႇဢေႇတီႈသုတ်းၼႂ်းမိူင်းႁူမ်ႈတုမ်ပတ်းပိုၼ်ႉသမ်ႉ ပဵၼ်ၸႄႈမိူင်းၶျၢင်း 19.59 ပိူဝ်ႊသႅၼ်ႊ ဝႃႈၼႆ။
ပၢင်တွပ်ႇလိၵ်ႈၸၼ်ႉသိပ်း ပီ 2018-2019 ၼႆႉ ၸတ်းႁဵတ်းၼႂ်းလိူၼ်မၢတ်ႉၶျ် ပီ 2019 သေ ပိုၼ်ၽၢဝ်ႇ သဵၼ်ႈၸိုဝ်ႈ လုၵ်ႈ ႁဵၼ်း ဢွင်ႇပူၼ်ႉၸၼ်ႉသိပ်း ၼႂ်းလိူၼ်ၵျုၼ်ႊၼႆႉ ဝႃႈၼႆ။
