ပႃႇတီႇႁူဝ်သိူဝ် ၸတ်းႁဵတ်းပၢင်ၵုမ်လူင် ၸႄႈဝဵင်းၸုမ်ႇၵူႈ တီႈၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တင်းမူတ်း မီးတူဝ် တႅၼ်းပႃႇတီႇ ၶဝ်ႈႁူမ်ႈ 276 ၵေႃႉ။
ပၢင်ၵုမ်လူင် ငဝ်းငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး(ႁိုဝ်) ပႃႇတီႇႁူဝ်သိူဝ် SNLD ဢၼ်ၸတ်းႁဵတ်းတီႈ ႁူင်းႁႅမ်း Sky View Hotel ပွၵ်ႉ 10 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 6-7/6/2019 ၼၼ်ႉ မီးလွင်ႈလႅၵ်ႈလၢႆႈ တၼ်း ႁဵင်း ႁူဝ်ၼႃႈ ၽူႈပွင်ၵၢၼ် လႄႈ ၽိူမ်ႉထႅမ်ၵူၼ်းႁဵတ်းၵၢၼ် ၼႂ်းငဝ်ႈငုၼ်း ပႃႇတီႇႁူဝ်သိူဝ်ထႅင်ႈ ၵမ်ႈၽွင်ႈ။
ၸၢႆးလဵၵ်ႉ ၽူႈၼမ်းၼႂ်းၵူႈလွင်ႈလွင်ႈ ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်ႁဝ်းၶႃႈၼႆႉ ႁွင်ႉဝႃႈပၢင်ၵုမ်ၸႄႈဝဵင်းၸုမ်ႇၵူႈ (ဢမ်ႇၼၼ်) ပၢင်ၵုမ်လူင် ပီ 2019။ ပၢင်ၵုမ်လူင်ၸိူင်ႉၼႆၼႆႉ ႁဝ်းၶႃႈ လႆႈ ႁဵတ်းမႃး မိူဝ်ႈပီ 2016 ၼၼ်ႉပွၵ်ႈၼိုင်ႈ မိူဝ်ႈလဵဝ် ဢႃယုသၢၵ်ႈတမ်းမၼ်းတဵမ် 3 ပီ ယဝ်ႉလႄႈ ႁဝ်းၶႃႈ ၸင်ႇၶိုၼ်းမႃး တေႃႇထႅင်ႈဢႃယုသၢၵ်ႈတမ်းမၼ်းသေ သိုပ်ႇႁဵတ်း” ဝႃႈၼႆ။
“ ယိူင်းဢၢၼ်း ပိူဝ်ႈတႃႇတိူဝ်းၶႂၢၵ်ႈထႅင်ႈ CEC ဢၼ်ႁွင်ႉဝႃႈ ၸုမ်းပွင်ၵၢၼ်ငဝ်ႈငုၼ်းလႄႈ တင်း ဢၼ်ဝႃႈ CC (ဗဟိုကော် မတီ) ၶွမ်ႊမတီႊငဝ်ငုၼ်း။ ၸုမ်းပွင်ၵၢၼ်ငဝ်ႈငုၼ်းလႄႈ ၶွမ်ႊ မတီႊငဝ်ႈငုၼ်း 2 ဢၼ်ၼႆႉ ႁဝ်းၶႃႈဝႆႉဢႃယုသၢၵ်ႈတမ်း မၼ်း 3 ပီ မိူဝ်ႈလဵဝ် မၼ်းတဵမ်ယဝ်ႉလႄႈ ၶိုၼ်းတိူဝ်းၶႂၢၵ်ႈထႅင်ႈ လိူဝ်ၼၼ်ႉ ပေႃးထိုင်ပီ 2020 မႃး ႁဝ်းၶႃႈတေႁဵတ်းႁိုဝ် လတ်းၽၢၼ်ႇပၢင်လိူၵ်ႈ တင်ႈၵႂႃႇၼႆ တီႈၼႂ်းပၢင်ၵုမ်ႁဝ်းၶႃႈၼႆႉ ဢုပ်ႇဢူဝ်းပႃး လွင်ႈၼႆႉၽွင်ႈယူႇ” ဝႃႈၼႆ။
ၵဵဝ်ႇၵပ်းလွင်ႈၵၢၼ်ၶႂၢၵ်ႈတိူဝ်း ၸုမ်းပွင်ၵၢၼ်ငဝ်ႈငုၼ်းပႃႇတီႇႁူဝ်သိူဝ်သမ်ႉ မိူဝ်ႈၵူႈပွၵ်ႈမီး 25 ၵေႃႉ ယၢမ်းလဵဝ် တိူဝ်းၼမ် လိူဝ်မႃး 31 ၵေႃႉ။ CC ၶွမ်ႊမတီႊငဝ်ႈငုၼ်း ဢၼ်မီး 78 ၵေႃႉၼၼ်ႉ တိူဝ်းလိူဝ်မႃး 101 ၵေႃႉ ဝႃႈၼႆ။
ၸုမ်းပွင်ၵၢၼ်ငဝ်ႈငုၼ်း CEC 31 ၵေႃႉၼၼ်ႉ ႁူဝ်ပဝ်ႈ ပဵၼ်လုင်းၶုၼ်ထုၼ်းဢူး၊ ၸၢႆးၺုၼ်ႉလုၼ်ႇ လုၵ်ႈတီႈ ၽူႈၼမ်းၼႂ်း ၵူႈလွင်ႈလွင်ႈသေ တေႃႈလဵဝ် ၶိုၼ်ႈမႃးပဵၼ် ၵႅမ်ႁူဝ်ပဝ်ႈ 1 ၊ ၵႅမ်ႁူဝ်ပဝ်ႈ 2 ပဵၼ်ၸၢႆးၶမ်းပိူင်ႇၾႃႉ။ ၸၢႆးလႃႉ(ႁွင်ႉ) ၸၢႆးလဵၵ်ႉ ၶိုၼ်ႈတၼ်းႁဵင်းမႃးပဵၼ် ၽူႈၼမ်းၼႂ်းၵူႈလွင်ႈလွင်ႈ။ ၸၢႆးၵျေႃႇၺုၼ်ႉသမ်ႉ ၶိုၼ်ႈပဵၼ်ၽူႈၼမ်းၵူႈလွင်ႈလွင်ႈငဝ်ႈငုၼ်း မၢႆ 1။ ၸၢႆးသၢမ်ၽူၼ်သႅင်သမ်ႉ ပဵၼ်ၽူႈၼမ်းၼႂ်းၵူႈလွင်ႈလွင်ႈ မၢႆ 2 ။ ၸၢႆးၸိင်ႇၼ (ႁွင်ႉ) ၸၢႆးပၢၼ်းသူၺ်ႇ လႆႈပဵၼ်ႁူဝ်ပဝ်ႈ လုမ်းငဝ်ႈငုၼ်းၸိုင်ႈတႆးပွတ်းဢွၵ်ႇ၊ ၸၢႆးလႃႉၽေႇ(ႁွင်ႉ) ၸၢႆးသိူဝ်ယွမ် ပဵၼ်ႁူဝ်ပဝ်ႈ လုမ်းငဝ်ႈငုၼ်းၸိုင်ႈတႆးပွတ်းႁွင်ႇ။ ၸၢႆးၶျိတ်ႉတဵင်း ပဵၼ်ႁူဝ်ပဝ်ႈလုမ်းငဝ်ႈငုၼ်းတိူင်းတႃႈလိူဝ်ႇ။ လိူဝ်ၼၼ်ႉ ပဵၼ်ၽူႈၶဝ်ႈၸုမ်းလႄႈ ၽူႈတၢင်တူဝ်သၽႃး ဢိၵ်ႇၶွမ်ႊမတီႊလွင်ႈၵူၼ်းၼုမ်ႇ။
ဝၢႆးသေ ပၢင်ၵုမ်ယဝ်ႉၼၼ်ႉ ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇ တင်းမူတ်း 7 ၶေႃႈ။
ၼႂ်းၶေႃႈပိုၼ်ၽၢဝ်ၼၼ်ႉ“ ယူႇတီႈငဝ်ႈ ငုၼ်း တီႇမူဝ်ႇ ၶရေႇၸီႇ ၸိူဝ်ႉၶိူဝ်းတႆးသေ တေသိုပ်ႇၶတ်းသၢင်ႈႁၢင်ႈပွင် ၵၢၼ် ၽွမ်ႉႁူမ်ႈ ၸိူဝ်ႉၶိူဝ်းတႆး၊ ၵၢၼ်ၽွမ်ႉႁူမ်ႈ ၸၢဝ်းၶိူဝ်းၸိုင်ႈ တႆး ဢိၵ်ႇတင်း ၵၢၼ်ၵေႃႇသၢင်ႈ မိူင်းႁူမ်ႈတုမ် ၾႅတ်ႊတရႄႊ ၵႃႈၼင်ႇပွင်ပဵၼ်လႆႈ” ဝႃႈၼႆ။
လိူဝ်ၼၼ်ႉ ၵဵဝ်ႇၵပ်းလူၺ်ႈ ၽႅၼ်ၵၢၼ်လူင် မိူင်းၶႄႇ (BRI, BCIM, CMEC) ၸိူဝ်းၼၼ်ႉ ငဝ်ႈငုၼ်း တီႇမူဝ်ႇၶရေႇၸီႇ ၸိူဝ်ႉ ၶိူဝ်းတႆး တေၸုၵ်းၾၢႆႇၵူၼ်းမိူင်း တေႁဵတ်း ၸွမ်းၼင်ႇ ၶေႃႈသဵင်ၵၢင်ၸႂ် ၵူၼ်းမိူင်းပိုၼ်ႉတီႈ မၼ်ႈမၼ်ႈၵႅၼ်ႇၵႅၼ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ