ယေးငိုၼ်းမိူင်းထႆး ပိၵ်ႉပပ်ႉယေးငိုၼ်းၵူၼ်းၵႃႉမိူင်းတႆး မိူင်းႁူမ်ႈတုမ် ၸွမ်းလႅၼ်လိၼ် ႁဵတ်းႁႂ်ႈၵူၼ်းၵႃႉလႄႈ ၵူၼ်းမိူင်းၵမ်ႈ ၽွင်ႈထူပ်းတၢင်းယၢပ်ႇၽိုတ်ႇ။

ႁူဝ်လိူၼ်ၵျုၼ်ႊ 2019 မႃးၼႆႉ  ယေးငိုၼ်းတၢင်းမိူင်းထႆး ဢၼ်မီးၸွမ်းလႅၼ်လိၼ်တႆး – ထႆး မႄႈသၢႆ – တႃႈၶီႈလဵၵ်းလႄႈ တၢင်းပွတ်း မႄႈသွတ်ႇ – မျဝၻီႇၼၼ်ႉ ပိၵ်ႉမၢႆယေးငိုၼ်း ၵူၼ်းၵႃႉမွၵ်ႈ 20 ၵေႃႉပၢႆ။ ႁဵတ်းႁႂ်ႈၵူၼ်းၵႃႉ မၢင်ၵေႃႉထူပ်းတၢင်းယၢပ်ႇ ယွၼ်ႉဝႃႈမၢင်ၸိူဝ်းမီးငိုၼ်းၶမ်ဝႆႉၼႂ်းမၼ်း ဢၢၼ်ႇႁူဝ်လၢၼ်ႉဝၢတ်ႇ။

ၸၢႆးဝၼ်း ၵူၼ်းတႃႈၶီႈလဵၵ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၸႂ်ႈၶႃႈဢေႃႈ မိူဝ်ႈသိုၼ်းပူၼ်ႉမႃးၼၼ်ႉ ၵူၼ်းတၢင်းပွတ်း တႃႈၶီႈလဵၵ်းမွၵ်ႈ 20 ၵေႃႉၺႃးၵႂႃႇ ၊ ၵမ်ႈၼမ်တႄႉ တေပဵၼ်ၵူၼ်းၵႃႉ၊ ၵူၼ်းႁပ်ႉဢူၼ်းငိုၼ်း ၸိူဝ်းၼႆႉ သမ်ႉဢဝ် Pas sport သေပိုတ်ႇ ဝႆႉပပ်ႉယေးငိုၼ်း ၊ ၶဝ်ႁၼ်ဝႃႈ ပဵၼ်ႁႅင်းၵၢၼ်ဢွၼ်ႇၵူၺ်း ႁဵတ်းသင်လႄႈ ငိုၼ်းၶဝ်ႈဢွၵ်ႇ ပေႉမႃးၼမ် ၶဝ်မီးလွင်ႈထၢင်ႇထိူမ်သေပိၵ်ႉၵႂႃႇ၊ ၵူၼ်းဢၼ်ၺႃးပိၵ်ႉၵႂႃႇၼၼ်ႉ တႃႇတေၵႂႃႇလၢတ်ႈသေ တုၵ်းယွၼ်းႁႂ်ႈၶဝ် ပိုတ်ႇပၼ်ၶိုၼ်း ၼၼ်ႉဢမ်ႇငၢႆႈ ယွၼ်ႉဝႃႈပၵ်းပိူင်ၶဝ်မၼ်းၼမ်ၼႃႇ ပေႃးၺႃးပိၵ်ႉယဝ်ႉတႄႉ ႁူဝ်ပၢၵ်ႇလႂ် 90 % ၼႆႉဢမ်ႇလႆႈၶိုၼ်းယဝ်ႉ ၊ ၵွပ်ႈၼၼ်လႄႈ ပီႈၼွင်ႉႁႅင်းၵၢၼ်ႁဝ်း ဢၼ်ယူႇတၢင်းပွတ်းမိူင်းထႆးသေ ၾၢၵ်ႇငိုၼ်းဝႆႉၼႂ်းယေးငိုၼ်းၼၼ်ႉ ႁႂ်ႈဢွၼ်ၵၼ်ဝႆႉ သတိတႃႉ ” ဝႃႈၼႆ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈႁႅင်းၵၢၼ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ လွင်ႈတၢင်းဢၼ်ၶဝ်ပိၵ်ႉ မၢႆယေးငိုၼ်း ၼၼ်ႉ တေမီးယူႇ 3 လွင်ႈ မိူၼ်ၼင်ႇၵဵဝ်ႇၶွင်ႈယႃႈမဝ်းၵမ် ၊ မီးငိုၼ်းၶဝ်ႈငိုၼ်းဢွၵ်ႇၼမ်ပူၼ်ႉတီႈ၊ ၵဵဝ်ႇၶွင်ႈလွင်ႈၵၢၼ်လွၵ်ႇလႅၼ်ဢဝ်ငိုၼ်းပိူၼ်ႈ ၸိူဝ်းၼႆႉ၊ ၵွပ်ႈၼၼ် ပီႈၼွင်ႉႁဝ်းၶႃႈ ၸိူဝ်းဢၼ်ပိုတ်ႇဝႆႉပပ်ႉယေးငိုၼ်းၼၼ်ႉ ႁႂ်ႈဝႆႉၾၢင်ႉသတိ ငိုၼ်း ဢၼ်ပိူၼ်ႈတေဢူၼ်းမႃးပၼ်ႁဝ်းၼၼ်ႉဝႃႈ ၸွင်ႇမၼ်းၸႂ်ႈငိုၼ်းဢၼ်ၸိုၼ်ႈသႂ် ” ဝႃႈၼႆ။

မိူဝ်ႈလိူၼ်မၢတ်ႉၶျ် 2018 ၼၼ်ႉၵေႃႈ ယေးငိုၼ်းၾၢႆႇၽုၵ်ႇသွမ်ႈ (စိုက်ပျိုးရေးဘဏ်) တီႈမိူင်းမၢဝ်း ၸိုင်ႈမိူင်းၶႄႇၼၼ်ႉ   ယိုတ်းပိၵ်ႉပပ်ႉယေးငိုၼ်း ၵူၼ်းၵႃႉၶၢႆ ၸွမ်းလႅၼ်လိၼ် တႆး-ၶႄႇ ၼင်ႇၵဝ်ႇ ။