UWSA ပိုၼ်ၽၢဝ်ႇဝႃႈ ဢမ်ႇမီးၵၢင်ၸႂ် ၶဵင်ႇတႃႉ လူင်ပွင်ၸိုင်ႈလႄႈ တပ်ႉမတေႃႇ

UWSA ပိုၼ်ၽၢဝ်ႇဝႃႈ ယူႇတီႈတပ်ႉသိုၵ်း UWSA ဢမ်ႇမီးၵၢင်ၸႂ် ၶဵင်ႇတႃႉၵၼ်တင်း လူင်ပွင်ၸိုင်ႈလႄႈ တပ်ႉမတေႃႇ ဝႃႈ ၼႆ။

မိူဝ်ႈဝၼ်းတီႈ 2/6/2019 ၼၼ်ႉ ယူႇတီႈၾၢႆႇတပ်ႉမတေႃႇမၢၼ်ႈ ၸတ်းႁဵတ်းပၢင်သပ်းၸႅင်ႈၶၢဝ်ႇ တီႈၼေႇပျီႇတေႃႇၼၼ်ႉ ႁူဝ်ပဝ်ႈၾၢႆႇပွင်ႇၶၢဝ်ႇ ၸွမ်ႁၢၼ်သူဝ်းၼၢႆႇဢူးလႄႈ ၸွမ်ႁၢၼ်တၢၼ်းထုၼ်းၺီႇ လၢတ်ႈဝႃႈ ဢၼ်တပ်ႉသိုၵ်း UWSA ၸတ်း ႁဵတ်းဝၼ်းၵေႃႇတင်ႈလွင်ႈငမ်းယဵၼ် ၶွပ်ႈတဵမ် 30 ပီသေ ၼႄၾၢင်ႁၢင်ႈသိုၵ်းၼၼ်ႉ မိူၼ်ၶဝ်ၶဵင်ႇတႃႉ တင်းလူင်ပွင်ၸိုင်ႈ မၢၼ်ႈလႄႈ တပ်ႉမတေႃႇဝႆႉ။ လွင်ႈၼႆႉ ယူႇတီႈတၢင်းတပ်ႉမတေႃႇ ဢမ်ႇယွမ်းႁပ်ႉလႆႈ။ ၵူၺ်းၵႃႈ ဢမ်ႇၶႂ်ႈႁႂ်ႈမီးလွင်ႈတုမ်ႉ တိူဝ်ႉ ၼႂ်းၶၵ်ႉၵၢၼ်ငမ်းယဵၼ်။ ပဵၼ်ဢၼ်လႆႈယိူၼ်ႉသီးဝႆႉထိုင်တီႈ ထိုင်လႅၼ် ဝႃႈၼႆ။

ထိုင်မႃး ဝၼ်းတီႈ 4/6/2019 ၼၼ်ႉ ယူႇတီႈတပ်ႉသိုၵ်း UWSA ပိုၼ်ၽၢဝ်ႇဝႃႈ “ဢၼ်ၾၢႆႇတပ်ႉမတေႃႇလၢတ်ႈၼၼ်ႉ ပဵၼ် ၶေႃႈၵႂၢမ်းဢၼ်ဢမ်ႇမီးၼမ်ႉမီးတူဝ် ဢၼ်ဢမ်ႇၶူပ်းငၢမ်ႇၵၼ်တင်းငဝ်းလၢႆးပိူင်ပဵၼ်ဢၼ်တႄႉ။ ယူႇတီႈ UWSA ႁဝ်းၼႆႉ ဢမ်ႇမီးၵၢင်ၸႂ် ပဵၼ်ၽူႈ ၶဵၼ်တင်း တပ်ႉမတေႃႇ။ ယဝ်ႉၵေႃႈ ဢမ်ႇမီးၵၢင်ၸႂ် ပဵၼ်ၽူႈၶဵၼ်ၵၼ်တင်း ၸုမ်းယိပ်းၵွင်ႈၵၢင်ႇ တၢင်ႇၸၢဝ်းၶိူဝ်း” ဝႃႈၼႆ။

ၾၢႆႇ UWSA တူၵ်ႇလၢတ်ႈဝႃႈ “ ယွၼ်ႉပဵၼ် ပၢင်ပွႆးလမ်ႇလွင်ႈ တွၼ်ႈတႃႇတပ်ႉသိုၵ်းဝႃႉလႄႈ ၸင်ႇလႆႈသႂ်ႇပႃးၵၢၼ်ၼႄ ၾၢင်ႁၢင်ႈသိုၵ်း” ဝႃႈၼႆ။

ၸုမ်း UWSA ၼႆႉ ယူႇတီႈပိူင်ငဝ်ႈပိုင်းမိူင်း 2008 ၵၢၼ်ၶွတ်ႇၽွတ်ႈၸိုင်ႈမိူင်း ၵၼ် 2 မတ်ႉတႃ 56 (ၸ) ၼၼ်ႉ တႅမ်ႈဝႆႉ ဝႃႈ ႁူဝ်ပၢင်ႇ၊ မိူင်းမႂ်ႇ၊ ပၢင်ဝၢႆ၊ ၼႃးၽၢၼ်း၊ မၢၵ်ႇမၢင်လႄႈ ပၢင်သၢင်းၼႆႉ ၸႅၵ်ႇပဵၼ် 2 ၸႄႈတွၼ်ႈသေ ပၼ်ဝႆႉပဵၼ် ၼႃႈ လိၼ်ၽွင်းငမ်းတူဝ်ၵဝ်ႇ ဝႃႉ ဢၼ်မီးတႂ်ႈ လူင်ပွင်ၸိုင်ႈငဝ်ႈ ငုၼ်းၵုမ်းၵမ်။ ၵူၺ်းၵႃႈ တေႃႇထိုင်ယၢမ်းလဵဝ် ဝႃႉၽွင်းငမ်း ၼႃႈလိၼ်တူဝ်ၵဝ်ႇဝႆႉ လွတ်ႈလႅဝ်း လူၺ်ႈဢမ်ႇမီး လူင်ပွင်ၸိုင်ႈမၢၼ်ႈမႃးၶဝ်ႈၵႅဝ်ၸွမ်းသေဢိတ်း။