ၸဝ်ႈသၢင်ႇဢွၼ်ႇ ဢႃယု 11 ပီ တူၼ်ၼိုင်ႈ ဢၼ်ပႃးသဵၼ်ႈသၢႆမၢႆ တေလႆႈၵႂႃႇသိုပ်ႇၶိုၼ်းႁဵၼ်း တီႈတႃႈၵုင်ႈ လၵ်ႉ ၵႂႃႇလဵၼ်ႈၼမ်ႉ/ ဢၢပ်ႇၼမ်ႉတဵင်းသေ လႆလွင်ႈၸွမ်းၼမ်ႉၸူမ်ႁၢႆလူႉလွၼ်ႇ ဝႃႈၼႆ။

ဝၼ်းတီႈ 4/6/2019 ယၢမ်းဝၢႆးဝၼ်း 4 မူင်းပၢႆၼၼ်ႉ ၸဝ်ႈသၢင်ႇၶေႇမႃႇၸႃႇရ ဢႃယု 11 ပီ ဢၼ်ႁဵၼ်းလိၵ်ႈ ယူႇတီႈတိူၵ်ႈ သွၼ်လိၵ်ႈ ဝတ်ႉ/ ၵျွင်းလူင် ၸႄႈဝဵင်းလၢင်းၶိူဝ်း ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်းၼၼ်ႉ မၼ်းၸဝ်ႈ တင်း ၸဝ်ႈသၢင်ႇဢွၼ်ႇထႅင်ႈ 4 တူၼ် လၵ်ႉၵႂႃႇလဵၼ်ႈၼမ်ႉတဵင်းသေ ၵႂႃႇလဵၼ်ႈၺႃးတီႈၼမ်ႉၸႅဝ်ႈ/ ၼမ်ႉပၼ်ႇလႄႈ ၸူမ်ႁၢႆပႃး ၵႂႃႇၸွမ်းၼမ်ႉ ဝႃႈၼႆ။

ၸဝ်ႈတူၼ်ၶူး ဝၼ်ႇၼသႃႇရ ၽူႈၵွၼ်းတိူၵ်ႈသွၼ်လိၵ်ႈ ၵျွင်းလူင်ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈသၢင်ႇၶေႇမႃႇၸႃႇရၼႆႉ တိုၵ်ႉမီးဢႃယု 11 ပီ။ ပဵၼ်ၵူၼ်းဝၢၼ်ႈၼမ်ႉတိုၼ် မႃးႁဵၼ်းတီႈတိူၵ်ႈသွၼ်လိၵ်ႈၼႆႉ မီးၶၢဝ်းတၢင်း 3 ပီ ယဝ်ႉ။ မၼ်းၸဝ်ႈၼႆႉ ၵတ်ႉၶႅၼ်ႇလိၵ်ႈ လၵ်းလႅမ်သႅမ်းၵႃႈတႄႉ။ ၵူၺ်းၵႃႈ မိူဝ်ႈဝၼ်းတီႈ 4 ယၢမ်းဝၢႆးဝၼ်းၼၼ်ႉ မၼ်း ၸဝ်ႈတင်း ၸဝ်ႈသၢင်ႇ ထႅင်ႈ 4 တူၼ် ၶဝ်ႁူမ်ႈၵၼ်လၵ်ႉၵႂႃႇလဵၼ်ႈတီႈၼမ်ႉတဵင်း။ ၽွင်းၶၢဝ်းၾူၼ်တူၵ်း ၼမ်ႉတဵင်းၶိုၼ်ႈ ၼႆႉ တၢင်းဝတ်ႉၵျွင်းႁဝ်းတိုၼ်းႁၢမ်ႈဝႆႉ ဢမ်ႇပၼ်ၸဝ်ႈသၢင်ႇၵႂႃႇလဵၼ်ႈၼမ်ႉတဵင်း။ ၵူၺ်းၵႃႈ ၸဝ်ႈသၢင်ႇ ၶဝ်သမ်ႉလၵ်ႉ ၵႂႃႇလဵၼ်ႈၼမ်ႉ ႁဵတ်းၼၼ်သေ ၸူမ်ၵႂႃႇၸွမ်းၼမ်ႉ။ လီသေလၢႆတႄႉ” ဝႃႈၼႆ။

ၸဝ်ႈသၢင်ႇ ၶေႇမႃႇၸႃႇရၼႆႉ ပဵၼ်လုၵ်ႈၸၢႆး လုင်းၵေႃးဝိတလႄႈ ပႃႈတဵင်းတိၼ်ႇ။ မၼ်းၸဝ်ႈၼႆႉ ပႃးသဵၼ်ႈၸိုဝ်ႈ ဢၼ် တေ လႆႈၵႂႃႇသိုပ်ႇၶိုၼ်ႈႁဵၼ်းတီႈ တႃႈၵုင်ႈ တူၼ်ၼိုင်ႈ ဝႃႈၼႆ။

ၼၢင်းလၢဝ် တၵ်ႉၵႃႇ/ ဝုၺ်ႇယႃဝိၸ်ႉၸ တီႈၵျွင်းလူင် လၢတ်ႈတီႈၽူႈတွႆႇႁွၵ်ႈဝႃႈ “ တီႈလၢင်းၶိူဝ်းၼႆႉ ၾူၼ်တႄႇတူၵ်း ႁၢင်လိူၼ်မေႊလႄႈ ႁူဝ်လိူၼ်ၵျုၼ်ႊၼႆႉမႃး ၾူၼ်းတူၵ်းထပ်းၵၼ်လၢႆဝၼ်းယဝ်ႉ။ ၼမ်ႉတဵင်းၵေႃႈယိုင်ႈ ၶိုၼ်ႈသေဢူၼ် ႁႅင်းဝႆႉလႄႈ ၵူၼ်းဢမ်ႇႁတ်းလူင်းဢၢပ်ႇၵၼ် ယူႇမွၵ်ႈ 2-3 ဝၼ်းၼႆႉ။ တီႈဢၼ် ၸဝ်ႈသၢင်ႇဢွၼ်ႇ ၸူမ်ၼမ်ႉၼၼ်ႉ မၼ်း ပဵၼ်တီႈၼမ်ႉၸႅဝ်ႈ ၼမ်ႉပၼ်ႇ တီႈဢၼ်ပိူၼ်ႈႁၢမ်ႈၵၼ်။ မၼ်းၸဝ်ႈတေဢမ်ႇႁူႉတီႈၼမ်ႉလိုၵ်ႉၼၼ်ႉသေ လူင်းလဵၼ်ႈ။ ယူႇတီႈပေႃႈမႄႈ၊ ၽူႈပူၵ်းပွင်လုၵ်ႈဢွၼ်ႇၶဝ်ဢွၼ်ၵၼ်သႂ်ႇၸႂ်လုမ်းလႃးလုၵ်ႈလၢင်းၸဝ်ႈၵဝ်ႇလီလီ။ လုၵ်ႈဢွၼ်ႇၼႆႉ မၼ်း လမ်ႇလွင်ႈတႃႇဝၢၼ်ႈမိူင်းလႄႈ ၸိူဝ်ႉၶိူဝ်းမိူဝ်းၼႃႈၶႃႈဢေႃႈ” ဝႃႈၼႆ။

ထိုင်မႃး ဝၼ်းတီႈ 5 ယၢမ်းႁူဝ်ၶမ်ႈၼၼ်ႉ ယူႇတီႈၵူၼ်းဝၢၼ်ႈ လႆႈၵႂႃႇထူပ်းႁၼ် တူဝ်တၢႆ ၸဝ်ႈသၢင်ႇ တီႈၵွင်သၢႆး တၢင်းၵႂႃႇ ဝတ်ႉၵျွင်းၵမ်မထၢၼ်း ယၢၼ်ၵႆတီႈမၼ်းၸဝ်ႈ တူၵ်းတၢႆၼၼ်ႉ မွၵ်ႈ 1 လၵ်းပၢႆ။ ဝၼ်းတီႈ 6 မိူဝ်ႈၼႆႉ ၸင်ႇ ပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ဝႃႈၼႆ။